YoShLAR TARBIYaSI UChUN MASʼULMIZ

Barchamizga yaxshi maʼlumki, 2016-yil Birinchi Prezidentimiz tashabbusi bilan "Sogʻlom ona va bola yili” deb eʼlon qilingan edi. Bu borada davlat dasturi tasdiqlanib, koʻplab tadbirlar amalga oshirildi. Bu har tomonlama sogʻlom avlodni voyaga yetkazish yoʻlidagi ishlarimizni izchil davom ettirib, yanada yuksak bosqichga koʻtarishga xizmat qilmoqda. Joriy yilda qabul qilingan "Yoshlarga oid davlat siyosati toʻgʻrisida”gi Qonun ushbu sohaning asosiy yoʻnalishlari boʻlgan ijtimoiy, iqtisodiy, huquqiy va tashkiliy chora-tadbirlarni aniq belgilab berdi. Yosh oilalar, tadbirkor ayollar, kollej bitiruvchilari, oilaviy biznes va hunarmandchilikni qoʻllab-quvvatlash uchun tijorat banklari tomonidan yil davomida 2 trillion soʻmdan ortiq kreditlar ajratildi.

Muxtasar qilib aytganda, ana shu maqsadlar uchun barcha manbalar hisobidan 7 trillion 480 milliard soʻm va 190 million dollardan ziyod mablagʻ sarflandi.

Shuning oʻzi, oʻylaymizki, bu boradagi amalga oshirilgan ishlar koʻlami va miqyosi naqadar ulkan ekanidan dalolat beradi.

Oʻzbekiston Respublikasi Prezidenti Shavkat Mirziyoyev: – "Biz taʼlim va tarbiya tizimining barcha boʻgʻinlari faoliyatini bugungi zamon talablari asosida takomillashtirishni oʻzimizning birinchi darajali vazifamiz deb bilamiz, – deya taʼkidladilar oʻz maʼruzasida. – Abdurauf Fitrat bobomizning mana bu fikrlariga har birimiz, ayniqsa, endi hayotga kirib kelayotgan oʻgʻil-izlarimiz amal qilishlarini men juda-juda istardim. Mana, ulugʻ ajdodimiz nima deb yozganlar: "Xalqning aniq maqsad sari harakat qilishi, davlatmand boʻlishi, baxtli boʻlib izzat-hurmat topishi, jahongir boʻlishi yoki zaif boʻlib xorlikka tushishi, baxtsizlik yukini tortishi, eʼtibordan qolib, oʻzgalarga tobe va qul, asir boʻlishi ularning oʻz ota-onalaridan bolalikda olgan tarbiyalariga bogʻliq”. Bugungi kunda yon-atrofimizda diniy ekstremizm, terrorizm, giyohvandlik, odam savdosi, noqonuniy migratsiya, "ommaviy madaniyat” degan turli balo-qazolarning xavfi tobora kuchayib borayotganini hisobga oladigan boʻlsak, bu soʻzlarning chuqur maʼnosi va ahamiyati yanada yaqqol ayon boʻladi”.

Haqiqatan ham, hozirgi vaqtda yoshlar tarbiyasi biz uchun oʻz dolzarbligi va ahamiyatini hech qachon yoʻqotmaydigan masala boʻlib qolmoqda. Gʻarazli kuchlar sodda, gʻoʻr bolalarni oʻz ota-onasiga, oʻz yurtiga qarshi qayrab, ularning hayotiga, umriga zomin boʻlmoqda. Bunday keskin va tahlikali sharoitda biz ota-onalar, ustoz-murabbiylar, jamoatchilik, mahalla-koʻy bu masalada hushyorlik va ogohlikni yanada oshirishimiz kerak. Bolalarimizni birovlarning qoʻliga berib qoʻymasdan, ularni oʻzimiz tarbiyalashimiz lozim. Buning uchun yoshlarimiz bilan koʻproq gaplashish, ularning qalbiga quloq solish, dardini bilish, muammolarini yechish uchun amaliy koʻmak berishimiz kerak. Bu borada uyushmagan yoshlar bilan ishlashga alohida eʼtibor qaratishimiz zarur. Bu vazifalarni amalga oshirishda biz asrlar mobaynida shakllangan milliy anʼanalarimizga, ajdodlarimizning boy merosiga tayanamiz.

Shu barobarida taʼlim-tarbiya ishi ayniqsa, yoshlar tarbiyasi borasida bor kuch va bilimimizni sarflashga har lahzada burchlimiz.

O.YOʻLDOShOV,