HAShAR – AHILLIK VA BIRDAMLIK RAMZI

11-12-mart kunlari mamlakatimizning barcha hududlarida boʻlgani kabi tumanimizda ham umumxalq xayriya hashari oʻtkazilmoqda.

Bu yilgi hashar Prezidentimiz Shavkat Mirziyoyev rahnamoligida demokratik davlat, fuqarolik jamiyati, farovon kelajak barpo etishga yoʻnaltirilgan islohotlar yangi bosqichga koʻtarilgan bir sharoitda oʻtayotgani har bir yurtdoshimizning yurt taqdiriga daxldorlik tuygʻusini kuchaytirmoqda.

Oʻzbekiston Respublikasi Vazirlar Mahkamasining 2017-yil 2-martdagi farmoyishi asosida mamlakatimizda mart-aprel oylari obodonlashtirish va koʻkalamzorlashtirish oyligi, deb eʼlon qilindi. Uning doirasida 11-12-mart kunlari umumxalq xayriya hashari oʻtkazilmoqda.

Bugun erta tongdan mamlakatimizning barcha hududlarida boʻlgani kabi tumanimizda ham butun xalqimiz, yoshu qari hamjihatlikda aholi punktlari, xiyobonlar, koʻchalar, yoʻllar, koʻp qavatli uylar atrofi, hovli-joylarni tozalashga kirishdi.

Tuman hokimligi binosi oldida oʻtkazilgan hasharda tumanimiz hokimi Sultonboy Yoʻldoshev ham ishtirok etdi va manzarali daraxt koʻchatlarini oʻtqazdi.

Hasharda tumanimizdan 100 mingdan koʻproq aholi ishtirok etayotgani yurtdoshlarimizning yurt obodligi, toʻkinlik, farovonlikka oʻz ulushini qoʻshishga intilishidan dalolatdir. Shundan 60 ming nafardan ortigʻini yoshlar tashkil qiladi. Barcha mahallalar, mehnat jamoalari, taʼlim, tibbiyot va boshqa muassasalarda tozalik, obodonlashtirish ishlari uyushqoqlik bilan tashkil etilmoqda.

Rejaga koʻra, ikki kunlik hashar davomida jami 217 ga maydonlar obodonlashtiriladi, 94 tonnamaishiy va qurilish chiqindilari 116 ta texnika yordamida chiqarib tashlanadi. 143 kilometr uzunlikdagi ariq va zovurlar tozalanib, 1 ta ziyoratgoh va 45 ta qabristonlar obodonlashtiriladi.

Hashar davomida 50 ming dona manzarali va 31 mingdan ortiq mevali daraxt koʻchatlari, 32 ming dona gul koʻchatlari ekish rejalashtirilmoqda. 148 nafar kam taʼminlangan, yakka yolgʻiz, nogiron, boquvchisini yoʻqotgan kishilar istiqomat qiladigan oilalarning xonadonlari hashar yoʻli bilan taʼmirlanadi. Shuningdek, 158 ta oilaga muruvvat yordamlari koʻrsatiladi.

Hasharchilarning saʼy-harakati bilan qabristonlar, muqaddas qadamjolar, tarixiy yodgorliklar atrofi obodonlashtirilmoqda. Qabristonlarda hashar uyushtirilib, oʻtganlar ruhi yod etilmoqda. Tumanimizning "Uyshin” mahallasi hududida joylashgan "Polvon bobo” qabristonida ham hashar tashkil qilindi. Mahalla ahlining hamjihatlikdagi mehnatlari va xomiylarning moddiy koʻmaklari natijasida qabriston atrofi devor bilan oʻralib, hududi obodonlashtirildi. Hashar mamlakatimizning barcha hududlarida ana shunday uyushqoqlik va hamjihatlik ruhida davom etmoqda.