URUSh FAXRIYSI IMTIYoZLI SERTIFIKAT ASOSIDA AVTOMOBIL SOTIB OLDI

Mamlakatimizda 9-may – Xotira va qadrlash kuni oldidan oʻtkazilayotgan tadbirlarda yoshi ulugʻ insonlarni eʼzozlash, ularga hurmat-ehtirom va gʻamxoʻrlik koʻrsatishdek xalqimizga xos olijanob fazilatlar yanada yaqqol namoyon boʻlmoqda.

Prezidentimizning shu yil 4-apreldagi "Ikkinchi jahon urushi qatnashchilarini ragʻbatlantirish toʻgʻrisida”gi farmoni hamda "Xotira va qadrlash kuniga tayyorgarlik koʻrish va uni oʻtkazish chora-tadbirlari toʻgʻrisida”gi qaroriga muvofiq Respublikamizning barcha hududlarida boʻlgani kabi tumanimizda istiqomat qiluvchi Ikkinchi jahon urushi ishtirokchilariga mamlakatimizda ishlab chiqarilgan zamonaviy avtomobillarni bir martalik navbatsiz sotib olish va ularga bepul texnik xizmat koʻrsatish uchun imtiyozli sertifikatlar topshirilgan edi.

Yaqinda tumanimizning Qipchoq ovulida yashovchi Oʻtamurod bobo Bozorboyev xonadonida quvonchli voqea sodir boʻldi. Otaxon farzandlari va nevaralari bilan maslahatlashib, davlatimiz tomonidan berilgan sertifikatdan foydalangan holda oʻzimizda ishlab chiqarilgan "Damas” avtomashinasini olishga qaror qildi. Maxsus hisob raqamiga belgilangan pullarni toʻlagach, bir necha kun ichida, navbat kutmasdan ushbu mashinani olishga muvaffaq boʻldi.

Shu kunlarda otaxonning xonadoni har qachongidan ham gavjum. Farzandu nabiralar, qarindosh-urugʻ, qoʻni-qoʻshni bilan birga hokimlik, jamoat tashkilotlari vakillari kelib, Oʻtamurod boboni bayram bilan, yangi mashina xarid qilgani bilan tabriklamoqda.

Tumanimiz hokimi Sultonboy Yoʻldoshev tuman prokurori, ichki ishlar boʻlimi boshligʻi va jamoat tashkilotlari vakillari bilan urush qatnashchisi Oʻtamurod boboning xonadonida boʻlib, otaxonni yangi avtomashina olgani bilan samimiy tabrikladi.

Bundan koʻngli togʻdek koʻtarilgan Oʻtamurod bobo tinch-osoyishta, farovon hayotimiz barqaror boʻlishini soʻrab, duo qildi. Koʻpni koʻrgan, boy hayotiy tajribaga ega insonlarning oʻgitlari yoshlar uchun ibrat. Ikkinchi jahon urushining dahshatli janggohlaridan omon chiqib, yurtga gʻalaba bilan qaytgan otaxon uyiga yoʻqlab kelganlarga yoshligidagi suratlarini koʻrsatishni xush koʻradi. Quroldosh doʻstlari haqida eslaydi, xalqimizning bagʻrikeng va samimiyligi xususida toʻlqinlanib gapiradi. Yoshlarga Prezidentimiz rahnamoligida erishilayotgan yutuq va marralar qadriga yetishni uqtiradi.

– Yurtimiz tinch-osoyishta boʻlsin. Yoshu keksasini birday qadrlaydigan, fuqarolari salomatligi, farzandlari kamoloti yoʻlida barcha sharoitlarni yaratib berayotgan davlatimiz rahbarining umrlari uzoq boʻlsin, – deydi otaxon qoʻlini duoga ochib.

Ikkinchi jahon urushi qatnashchilari hamda Vatanimiz ravnaqi yoʻlida fidokorona mehnat qilgan faxriylarga yuksak hurmat-ehtirom koʻrsatilayotgani mamlakatimizda inson shaʼni va qadr-qimmati oliy qadriyat darajasiga koʻtarilganining dalolatidir.