Qoraqalpogʻiston Respublikasi poytaxti - Nukus shahri haqida

Nukus shahrining yer maydoni 221 kv.ni, doimiy aholi soni 303800 nafarni tashkil etadi. 2016 yilning dastlabki 6 oyida Nukus shahrida 106 ta loyiha amalga oshirildi. Shu asosda jami 432 ta yangi ish oʻrni tashkil etildi. Shu yili eksporter korxonalar qatoriga yangidan 5 ta korxona qoʻshildi.

Shaharda oliy oʻquv oʻrinlari 8 tani, oʻrta maxsus taʼlim muassasalari 20 tani, akademik litseylar 6 tani, umumtaʼlim maktablari soni 43 tani, maktab internatlari 89 tani tashkil etadi. Yil davomida 306736 kv.m hajmdagi turar joylar foydalanishga topshirildi.

Qoraqalpogʻiston Respublikasida Mamlakatimizning barcha hududlaridagi kabi keng koʻlamli bunyodkorlik ishlari amalga oshirilmoqda. Jumladan, 2009-2016-yillarda hududning 134 qishloq massivida namunaviy loyihalar asosida 3 ming 650 uy-joy qurilib, foydalanishga topshirildi. Nukus shahrida 34 koʻp qavatli uy, zamonaviy amfiteatr, Yoshlar markazi, I.Savitskiy nomidagi Qoraqalpoq davlat sanʼat muzeyining yangi binolari, turli sport majmualari bunyod etildi. Bu boradagi ishlar izchil davom ettirilmoqda.

Yurtimizdagi barcha shaharlar qatorida Nukus shahri ham yil sayin chiroy ochib, tobora zamonaviy qiyofa kasb etmoqda. Keng va ravon koʻchalar boʻyidagi muhtasham koʻp qavatli turar joylar, savdo va xizmat koʻrsatish shoxobchalari, soʻlim xiyobonlar shahar koʻrkiga koʻrk qoʻshmoqda.

Koʻcha va xiyobonlarni koʻkalamzorlashtirish, bozorlar va qabristonlarni obodonlashtirish, koʻp qavatli uylar atrofini tozalash, maishiy chiqindilarni shahar tashqarisiga chiqarib tashlash borasida izchil ishlar olib borilmoqda. Shahar hududidagi barcha ekin maydonlarini texnik suv bilan sugʻorishni yaxshilash maqsadida zamonaviy qurilmalar oʻrnatilmoqda. Tuproqning meliorativ holatini yaxshilash, yangi koʻchat va nihollarning meʼyorda oʻsib-rivojlanishi uchun agrotexnik tadbirlar oʻz vaqtida oʻtkazildi, mahalliy oʻgʻit bilan oziqlantirildi.

Obodonlashtirish va koʻkalamzorlashtirish oyligi davomida boshqarma tomonidan shahar boʻylab 21 ming tupga yaqin turli manzarali daraxt koʻchatlari oʻtqaziladi. 50 gektardan ziyod maydonga 13 mingdan ortiq gul koʻchatlari ekiladi va turfa gullar urugʻi sepiladi.

Nukus shahar markazidan kesib oʻtuvchi "Doʻstlik” kanalining ikki sohilida olib borilayotgan keng koʻlamli bunyodkorlik ishlarida ham boshqarma jamoasi faol qatnashmoqda. Yangi barpo etilayotgan xiyobon va sayilgohlarga ekilgan 7 ming 248 tup turli manzarali daraxt koʻchatlari parvarishlanmoqda.

Shaharning irrigatsiya tizimini yaxshilash, mavjud suv yoʻllarini taʼmirlashga ham alohida eʼtibor qaratilmoqda. Ayni paytga qadar boshqarma tasarrufidagi 137 kilometr ariq va 24 suv nasosi taʼmirlandi. 2,2 kilometr yopiq gorizontal drenaj tozalandi. Koʻcha va xiyobonlarni yoritadigan 221 kilometrlik elektr tarmoqlarining holati tekshiruvdan oʻtkazildi. 245 markaziy va ichki koʻchalarga 6 ming 614 dona yoritgich, "Doʻstlik guzari” koʻchasi va Amfiteatrga 38 dona projektor oʻrnatildi. Eskirgan koʻcha yoritgichlari energiya tejaydigan zamonaviylariga almashtirildi.

Poytaxt - shaharning sanitariya tozaligini taʼminlash maqsadida koʻcha boʻylari, aholi dam olish maskanlari, koʻp qavatli uylar atrofini chiqindilardan tozalash doimiy eʼtiborda. Bu borada boshqarma huzurida tashkil etilgan "Nukusmaxsustrans” shoʻʼba korxonasi tomonidan chiqindilar oʻz vaqtida chiqarib tashlanmoqda. Aholi uchun yanada qulaylik yaratish maqsadida koʻp qavatli uylar qoshida maxsus zamonaviy chiqindixonalar tashkil etilgan. Ular suyuq va qattiq chiqindilar uchun alohida maxsus konteynerlar bilan taʼminlangan.Shuningdek, boshqarma tomonidan shahar hududidagi 12 qabriston ham obodonlashtirilmoqda. "Salmen ota”, "Shoʻrsha bobo”, "Qushxona”, "Oʻroz oxun”, "Gʻani ota” kabi qabristonlarda taʼmirlash ishlari olib borildi.

Qoraqalpogʻiston shaharlari orasida Nukus shahrining nufuzi aniq koʻzga tashlanadi. Nukus shahri aholisi Xoʻjayli shahari aholisidan 3-marta, Taxiatosh, Toʻrtkoʻl, Beruniydan 4-marta, Qoʻngʻirot, Chimboy, Mangʻitdan 7-marta koʻpligi bilan ajralib turadi.

Nukus shahri 212 kv.km maydoniga 261,7 ming aholisiga ega boʻlgan, Oʻzbekistonning shimoliy-gʻarbida joylashgan katta markaziy shahar hisoblanadi. Uning milliy tarkibini 122,4 ming kishini (46,8% ni) qoraqalpoqlar, 32,4 mingini (12,4%ni) oʻzbeklar, 57,8 mingini (22,1% ini) qozoqlar, 17,5 mingini (6,7%ni) ruslar, 31,4 mingini boshqa millatlar vakillari tashkil qiladi.

Mustaqillik yillarida Nukus shahri iqtisodiy, ijtimoiy-madaniy, ekologik muammolar hal qilinadigan asosiy markazga aylandi. Oʻzbekiston Respublikasi Prezidenti I.A.Karimov Orol inqirozini yechishda Qoraqalpogʻiston poytaxtining yetakchi roli borligini koʻrsatdi.