RAMAZON OYI FAZILATLARI

Ramazon oyi kelganida Paygʻambarimiz (s.a.v) saxovatlari yanada oshib ketar ekan. Biz ham Paygʻambarimiz  ummati ekanmiz, u zotdan oʻrnak olib, ramazon oyida avvalo oilamizga, yaqin-qarindoshimizga, mahallamizdagi beva-bechoralarga, qolaversa, kam taʼminlangan qariyalarga imkon qadar moddiy va maʼnaviy yordam qilishimiz kerak.

Paygʻambarimiz (s.a.v.) taʼlim berganlarki: «Agar insonlar ramazon oyidagi mukofotlar, savoblar, neʼmatlar va rahmatlar koʻpligini bilishsa edi, ramazonning yil boʻyi davom etishini xohlagan boʻlur edi». Boshqa  bir rivoyatda Jobir ibn Abdulloh (r.a.) rivoyat qilgan hadisda Paygʻambarimiz (s.a.v.): "Kim bir musulmonning dunyo qaygʻularidan birini ketkazsa, Alloh uning qiyomat kunidagi qaygʻularidan birini ketkazadi. Kim bu dunyoda bir qiynalgan birodarining ogʻirini yengil qilsa, Alloh taolo uning qiyomatdagi ogʻirini yengil qiladi. Qaysi bir banda bir bandaga yordam qilsa, Alloh taolo unga ham yordam koʻrsatadi», deganlar. (Termiziy rivoyati).

Dinimiz taʼlimotlari har vaqt insonlarni adolat, mehr-muruvvat, olijanoblik, poklik, yaxshilik, doʻstlikka chorlaydi va buning evaziga ikki dunyoda mukofotlar vaʼda qiladi. Alloh taolo marhamat qiladi: Alloh yoʻlida mollarini ehson qilguvchilar (savobi) misoli  goʻyo bir donga oʻxshaydiki, u har bir boshogʻida yuztadan don boʻlgan yettita boshoqni undirib chiqaradi. Alloh xohlagan kishilarga (savobini) yanada koʻpaytirib beradi. Alloh (karami) keng va bilimdon zotdir» («Baqara» surasi, 261-oyat). 

Paygʻambarimiz (s.a.v.) hadisida marhamat qilganlar:  «Beva-miskinga gʻamxoʻrlik qilgan kishi Alloh taolo yoʻlida saʼy-harakat qiluvchi yoki toat-ibodat qilib, kunduzi roʻza tutuvchi kishi kabidir». Biz qilayotgan ehsonlar savoblari naqadar katta amal ekaniga  yana bir bor ishonch hosil qilamiz.  Aslida ehson qilish bilan mol-mulk kamaymaydi, aksincha, koʻpayadi. Chunki har bir ehson Alloh roziligi uchun.   Paygʻambarimiz (s.a.v.) marhamat qilganlar: «Mol-mulk sadaqa qilish bilan zinhor kamaymaydi» (Muslim rivoyati).

Alloh taolo barchalarimizni ushbu muborak oyda ezgu amallarni qilishga muyassar aylasin. Alloh taolodan yurtimizni hamisha obod, xalqimiz oʻzaro tinch va ittifoqchilikda yashashini, farovon boʻlishini soʻrab, duoyi xayrlar qilamiz.

Rajabboy HABIBULLAYeV, «Hoji eshon bobo» masjidi imomi.

(Foto - http://protoday.uz)