EL ARDOGʻIDAGI AYoL

Yurtdoshlarimiz orasida hayot soʻqmoqlarida oʻz yoʻlini, oʻrnini topib, Vataniga, el-yurtiga fidoyiligi, chin insonligi bilan boshqalarga oʻrnak boʻlib kelayotgan kishilarni koʻrib, hamisha quvonib yuramiz.

Men ana shunday el ardogʻidagi kishilar orasida oʻz shogirdim va hamkasbim Ayimjon Jumaniyozovaning ham borligidan doimo faxrlanaman.

Ayimjon Jumaniyozova 2017-yilning 1-iyunidan nafaqaga chiqib, jonajon maktabi, shu maktabning ahil jamoasi bilan xayrlashdi. Men shu damlarda koʻz oldimda ulgʻayib, kasbidan kamol topgan shogirdimning hayot yoʻllari haqida oʻyladim.

1978-yilda 17-sonli umumtaʼlim maktabiga ishga kelganimda  Ayimjon hamma fanlardan aʼlo baholarga oʻqiydigan, jamoat ishlarida faol qatnashadigan oʻquvchi qiz edi. U maktabning voleybol toʻgaragi aʼzosi sifatida turli musobaqalarda ishtirok etib, maktabda epchil va chaqqon sportchi sifatida tanilgan edi.

Ayimjon maktabni aʼlo baholarga tugatib, 1980-yilda Nizomiy nomli Toshkent davlat pedagogika institutining tarix-huquq fakultetiga oʻqishga kirdi va uni 1985-yilda muvaffaqiyatli tugatdi.

Oliy maʼlumotga ega boʻlgan Ayimjon shu yili oʻzi oʻqigan 17-sonli maktabda oʻqituvchi sifatida ish boshladi. Bu qizdagi gʻayrat-shijoatni oldindan payqagan ustozi, maktab direktori Zarifboy Sobirov va maktab jamoasi uni iliq kutib olishdi.

Pedagog sifatida ish boshlagan Ayimjon Jumaniyozova oʻzining masʼuliyatni chuqur his qilishi, talabchanligi, bolajonligi, oʻz fanining bilimdoni, ayniqsa samimiy va ochiqkoʻngilligi bilan boshqalardan ajralib turardi. Bu xislatlar uning oʻquvchilarga  mehribon ustoz, kasbdoshlariga sodiq doʻst va eldoshlariga yurt fidoyisi boʻlib tanilishida muhim omil boʻldi.

Ayimjon 32 yillik ish faoliyati davomida sinf rahbari va ustoz sifatida oʻquvchilar hamda ularning ota-onalari hurmatiga sazovor boʻldi.

U 1999-2012-yillarda "Yil oʻqituvchisi” koʻrik-tanlovida muvaffaiqyatli ishtirok qildi. Shuningdek, u 2007-2013 oʻquv yillarida oʻtkazilgan avgust kengashlarida oʻz fanining bilimdoni, taʼlim sohasidagi yangi innovatsiyalarning ilgʻor targʻibotchisi sifatida tuman tarix-huquq fani oʻqituvchilariga murabbiylik qilib keldi.

U samimiyligi, qatʼiyatliligi tufayli tuman miqyosida oʻtkazilgan fan olimpiadalari va bilimlar bellashuvlarida, jumladan, 2014-yilda fan olimpiadasining huquqshunoslik fani boʻyicha Respublika bosqichida hakamlik qildi.

Ayimjon shogirdlari Nasiba Matasheva, Roza Rajabova, Muhabbat Sobirovalar bilan doimo tajriba almashib ishladi. Bunday faoliyat Ayimjon va uning shogirdlari pedagogik mahoratlarining oshishiga samarali taʼsir koʻrsatdi.

Uning tajribali oʻqituvchi mavqeiga yetishishida ustozlari – Roza Mustayeva, Rajab Avazboyev, Tursunoy Saʼdullayeva, Tojimurod Oʻrozboyev va Rahimboy Oʻrozboyevlarning katta hissasi borligini chuqur his qiladi. Shu boisdan ham u oʻz ustozlariga doimo hurmatda boʻladi.

Tajribali va jonkuyar muallima Ayimjon Jumaniyozova maktab-mahalla hamkorligining mustahkamlanishiga ham munosib hissa qoʻshdi.

Ayimjon turmush oʻrtogʻi Oʻktamboy Yoʻldoshev bilan 3 nafar qiz va 2 nafar oʻgʻilni tarbiyalab, voyaga yetkazdi. Katta qizi Nasiba Yoʻldosheva oʻqituvchi, Shahnoza ingliz tili fani oʻqituvchisi, Sevara esa tarix fani oʻqituvchisi boʻlib yetishayapti.

Katta oʻgʻli Bekzod – iqtisodchi. Kenja oʻgʻil Shahzodbek ham iqtisod yoʻnalishini tanlagan.

Yoʻldoshevlar oilasi namunali oila sifatida Xolimbeg ovulidagi barcha oilalarga oʻrnak, desak xato boʻlmaydi.

Men mehnatdan obroʻ topib, baxt topib, el nazariga tushgan, qalbi ezguliklarga toʻla shogirdim Ayimjon Jumaniyozova va uning umr yoʻldoshi Oʻktamboyga sogʻlik, omonlik tilayman.

Yangiboy EShIMMATOV,

17-sonli maktabning jismoniy tarbiya fani oʻqituvchisi, "Shuhrat” medali sohibi.