MAQSADIM – DOIMO OLDINDA BOʻLISh

Bu hayotda kasb tanlash imkoniyati juda katta. Qaysi kasbni tanlagan boʻlsang, oʻsha sening hayot yoʻling, saodatga erishish manziling  ham oʻsha. Bu – ayni hayot haqiqati.

Umida Qurbonboyeva onasi Toʻlgʻonoyning kasbini tutdi – biolaboratoriya ishlari bilan qiziqdi. Mittigina jonivorlarni laboratoriya  sharoitida koʻpaytirish va ulardan bahor oylaridan boshlab qishloq xoʻjalik zararkunandalariga qarshi  biologik usulda kurashishda foydalanish usullarini oʻrganib oldi. Bu ham oʻziga xos koʻzga koʻrinmas biologik kurash usuli boʻlib, paxtachilikning ashaddiy dushmani boʻlgan turli xil zararkunanda hashoratlarga qiron keltirib, hosilni toʻla-toʻkis saqlab qolish imkoniyatini beradi. Mana shu oʻta masʼuliyatli, murakkab ish jarayonlari Umidaning unumli mehnat qilish qobiliyatini oshirdi. Oʻz vaqtida harakat qilinmasa, talab qilingan paytda biologik mahsulotlar tayyor boʻlmasa zararkunanda hasharotlar "hujumi”ning oldi olinmasdan, ekinlar nobud boʻlib, dehqonchilikdan olinadigan daromad boy beriladi. Buni yaxshi tushungan Umida Qurbonboyeva onasi Toʻlgʻonoy Ahmedova rahbarligida profilaktik agrotadbirlarni oʻz vaqtida amalga oshirdi. Buni oʻtgan yillardagi natijalar yaqqol koʻrsatib turibdi. Shu asnoda Umida Qurbonboyeva paxtachilik agrotexnikasiniyam puxta oʻrganib, oʻzlashtirib oldi va  "Zarifboy-Toʻlgʻonoy” fermer xoʻjaligiga rahbarlik qilib, har yili paxtadan, gʻalladan va pilladan moʻl hosil yetishtirib kelmoqda.

– 35  gektar paxta maydonidan   108 tonna "oq oltin” durdonalarini yigʻishtirib olib, davlat xazinasiga topshirdik. Nafaqat yillik shartnomaviy rejamizni, balki majburiyatimizni ham oshirib bajardik. Mavsum oxirigacha yalpi xirmonimizni 142 tonnaga yetkazamiz. Bu bilan tumanimiz va respublikamiz "oq oltin” xirmonlarining yanada yuksalishiga oʻz hissamizni qoʻshgan boʻlamiz.

Maqsadim doimo oldingi safda boʻlishdir. Davr talabi ham shu, – deydi  ilgʻor fermer Umida Qurbonboyeva qatʼiyat bilan.

Qobul ShOMURODOV.

Suratda: «Xizr eli» MFY hududidagi «Zarifboy-Toʻlgʻonoy» fermer xoʻjaligi ilgʻor terimchisi (chapdan-oʻngga) Yulduz Rahimboyeva, fermer xoʻjaligi raisi Umida Qurbonboyeva, ilgʻor terimchilar Mahfuza Jumaboyeva va Sharofat Jumamurodovalar.