QATʼIY SANITARIYa NAZORATI OʻRNATILDI

Tuman DSENM tomonidan har yilgidek, "Paxta – 2017” yigʻim-terim mavsumiga puxta hozirlik koʻrildi. Tumanimiz paxtakorlariga yordam berayotgan hasharchilarning mehnat va dam olish sharoitlari, oziq-ovqat va ichimlik suvi bilan taʼminlanishi ustidan qatʼiy sanitariya nazorat ishlari olib borish maqsadida tuman DSENMning 30-sonli buyrugʻi, 2-bandiga asosan hududlar kesimida MMTP va OFY larga DSENM xodimlari biriktirildi. Biriktirilgan mutaxassislar tomonidan paxta terimida qatnashayotgan yordamchi-hasharchilar tushlikda dam oladigan dala shiyponlarining toʻliq dislokatsiyasi olinib, hasharchilarga sharoit yaratish, sifatli ichimlik suvi, oziq-ovqat taʼminoti, yuvinish joylarini tashkil etish, hojatxonalarni tartibga keltirish, surunkali yuqumli kasalliklar bilan kasallanganlar va kasallik tashuvchilari aniqlangan xonadonlarda hasharchilarni  joylashtirishni taʼqiqlash toʻgʻrisida MMTP va OFY raislariga tegishli tavsiyalar berildi. DSENM mutaxassislari tomonidan oʻrganilgan hududlarda yuqumli va parazitar kasalliklarning oldini olish maqsadida dezinfektsiya, dezinsektsiya va deratizatsiya ishlari olib borilmoqda. Har bir hududga tuman tibbiyot birlashmasining 25-sonli buyrugʻi, 1-bandiga asosan tibbiyot xodimlari biriktirilgan boʻlib, tibbiy yordam koʻrsatish uchun tegishli dori-darmon bilan taʼminlash, doimiy tibbiy koʻrik ishlarini olib borish topshirildi. Hasharchilar orasida ovqatdan zaharlanish va boshqa yuqumli kasalliklarning kelib chiqishining oldini olish maqsadida tibbiy shtab tashkil qilinib, tegishli dori-darmonlar bilan taʼminlanib, malakali mutaxassislar jalb etildi. Hasharchilar isteʼmol qiladigan ichimlik suvining sifatini tekshirish uchun suv namunalari olinib, sanitariya-gigiyena va bakteriologiya laboratoriyalarida tekshirib borilmoqda. 

Har qanday ishning samarasi – sogʻlom inson mehnatining mahsulidir. Demak, bugun  tumanimizning yuksak paxta xirmonini bunyod etish maqsadida beliga etak bogʻlab dalaga chiqqan har bir paxtakorning, hasharchining sogʻligi nafaqat uning oʻzi uchun, balki, el-yurt uchun ham aziz va qadrlidir. Shu bois, tuman DSENM xodimlari har kuni, har soatda va har daqiqada oʻz oʻrinlarini dalada deb bilib, paxtakor-u dehqonlar, koʻngilli hasharchilar sogʻligi uchun qaygʻurishni oʻz burchlari deb hisoblaydilar.

Durbek Bobojonov, tuman DSENM bosh shifokori.