OʻQUVChILAR UChUN YaGONA MAKTAB FORMASINING AFZALLIKLARI KOʻP
Mening oʻqituvchilik faoliyatimni boshlaganimga 8-yil boʻldi. Oʻtgan shu sakkiz yil mobaynida oʻzim bolaligimdan orzu qilganim oʻqituvchilik kasbining mashaqqatini, zalvorini tobora chuqurroq his qilayapman. Chunki turli oilada turlicha tarbiya koʻrgan oʻttiz nafarcha bolalar bilan muomala qilish, koʻngliga yoʻl topish, ularning diqqat-eʼtiborini oʻtilayotgan dars mashgʻulotiga jalb qila olish oson ish emas. Baʼzan ayrim oʻquvchilar bilan alohida suhbatlashish yaxshi samara bersa, baʼzilarini oʻrtoqlari oldida ragʻbatlantirish orqali yoʻlga solamiz.
Oʻquvchilarning ota-onalari oʻtkaziladigan yigʻilishlarda baʼzan kiyinish borasida eʼtirozlar bildirishadi. Falon soʻmga yaqindagina yangi kiyim olib bergandim, formaga oʻxshaydi, kiyaversin, deyishadi. Baʼzi onalar esa qimmatbaho kiyimlarni tanlashga intilishadi. Xullas, oʻquvchilarning kiyinishi doimo munozara, eʼtiroz, takliflarga sabab boʻlar edi.
Yangi oʻquv yili boshlanishi oldidan barcha oʻqituvchilar uchun muhim va quvonarli yangilik boʻldi: shu yilning 15-avgustida Oʻzbekiston Respublikasi Vazirlar Mahkamasining umumiy oʻrta taʼlim muassasalari oʻquvchilarining kiyinish madaniyati va tartib-intizomga amal qilish koʻnikmalarini mustahkamlash, salomatliklarini muhofaza qilish uchun tegishli shart-sharoitlar yaratish, maʼnaviy va jismoniy sogʻlom avlodni kamol toptirish maqsadida “Davlat umumiy oʻrta taʼlim muassasalari oʻquvchilarini zamonaviy yagona maktab formasi bilan taʼminlash chora-tadbirlari toʻgʻrisida”gi 666-sonli Qarori qabul qilindi.
Qarorga muvofiq davlat umumiy oʻrta taʼlim muassasalari oʻquvchilari uchun zamonaviy yagona maktab formasining shakllari hamda davlat umumiy oʻrta taʼlim muassasalari oʻquvchilari uchun zamonaviy yagona maktab formasini joriy etish toʻgʻrisidagi nizom tasdiqlandi. Nizomga koʻra, umumiy oʻrta taʼlim muassasalari oʻquvchilari 2018-2019 oʻquv yilida davlat umumiy oʻrta taʼlim muassasasiga tasdiqlangan shakllardagi maktab formasida kelishlari ixtiyoriy, 2019-2020 oʻquv yilidan boshlab esa majburiydir.
Qarorning muhim jihatlaridan biri shuki, aholining farzandlari uchun maktab formasi sotib olishlariga imkoniyat yaratish maqsadida istagan kishiga olti oydan kam boʻlmagan muddatga kreditlar ajratilishi belgilangan.
Yagona maktab formasining joriy etilishi oʻquvchilar oʻrtasida ijtimoiy tenglikni mustahkamlaydi va sifatli taʼlim-tarbiya olishlari uchun sharoit yaratadi.
Qaror endilikda oʻqituvchilar va ota-onalar orasida oʻquvchilarning maktabga qanday kiyimda kelishi borasidagi barcha kelishmovchiliklariga barham berishi bilan juda ahamiyatli hujjat deb hisoblayman.
Nafisa SAFARBOYeVA, 31-maktab oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
