VATANGA XUSh KELGAN OYDIN YOʻL – EPK VA ISTIQLOL AYYoMI QUTLUGʻ BOʻLSIN!

Yoʻl azobini, masʼuliyatini va gashtini ham yoʻlovchi biladi, koʻngillar his qiladi. Yoʻlovchi kim? Yoʻlovchi – biz, xalq! U to manziliga yetguncha oldinga intilaveradi. Surinib-surinib, mashaqqatlar azobini chekib, goh yiqilib, goh turib talpinaveradi. Qayerga? Quyosh nurlari porlab koʻringan  koʻzlagan manziliga! Bu manzilga yetish orzusi taqdir yozigʻimidi? Balki... Balki bu orzu xalqimizning koʻnglidan boshlangandir?

Ha, shunday edi, azizlar. Quyosh nurlari ila nurafshon manzil – mustaqillik tomon eltuvchi yoʻl xalqimizning koʻnglidan boshlangani rost! Koʻngillar qaramlik kishanlarini yanchib tashlashga intildi, hurlik, erk istagan dillar birlashdi. Elim, yurtim, degan koʻkraklar qalqon boʻldi mustaqillik manziliga eltuvchi yoʻl azoblariga. Erk istagan koʻngillardan boshlangan bu yoʻllarda qurbonlar berdi xalq. Fisq, tuhmat, gʻarazli niyatlar bolalab yotgan pistirmalarni, tuzoqlarni yorib oʻtdi yovqur yuraklar. 28-yil avvalgi Oʻzbekiston xalqi hayotiga, dalalariga, shahar-u yovonlariga, togʻ-u qirlariga ildiz otgan illatlarni bir-bir sanang-a! Yuraklardagi yaralar yangilanadi... millatchilik urugʻini sochmoqqa intilgan gʻarazgoʻylar, har zarrasi oltinga teng Vatan tuprogʻiga xoinlik qilmoqqa shaylangan vatanfurushlar, xalqni bor budidan ayirmoqqa intilgan mulkparastlar... Ularning  yoʻlini toʻsib chiqmoqqa shaylangan xalqqa yetkazilgan ziyon-zahmatlardan yelkalar yagʻir boʻlmadimi?

Bu adolatsizliklarga koʻngillardan boshlangan hurlik yoʻli chek qoʻydi! Ana shu ezgu Istiqlol yoʻli Vatanga xush lahzalarni ato etdi. Bu – siyosatda, iqtisodiyotda, ijtimoiy hayotda yaqqol namoyon boʻldi. Xalqimiz hayotini tubdan oʻzgartirib yuborgan islohotlar, ichki va tashqi siyosat sohasidagi rivojlanish tamoyillari har bir inson hayotiga ziynat bagʻishladi.

Azizlar, Vatanda tong otayotgan lahzalarni hech kuzatganmisiz? Oqshomlarni-chi? Osmon bulutlardan xalos boʻlib, samoda quyosh porlagan damlarga bir nigoh tashlang-a! Nimalarni koʻrdingiz?

– Osudalikni! Oqshomlarda butun oila jam boʻlgan dasturxonlari noz-neʼmatlarga toʻla toʻkin xonadonlarni! Vatan zamini bilan quyosh nurlari qorishgan fasllardagi otashin haroratni!

Ona Yurt boʻylab yayov kezing. Darvozalari lang ochiq xonadonlar ostonasidan mahallaga ilk qadam qoʻyib, kunni shodon qarshilayotgan bolajonlarning yuz-u koʻzida hayrat va hayajon oftobi porlaydi. U kenglikni – ulugʻlikni va demakki, Vatanni kashf etayotir. Uning koʻnglida Istiqlolning ulugʻ manzillari – yorqin kelajak tomon intilish istagi uygʻonayotir. Istiqlol va kelajakni tutashtirgan yoʻl ochilayotir uning koʻnglida! Bu yoʻlning ufqi yorqin. Toki, xalqimiz, yuz-u koʻzlarida hayrat va hayajon oftobi porlab turgan avlodlar basalomat ekan, Vatanda Istiqlol quyoshi mangu nur sochaveradi.

Vatan osmonidan to zamin qadar,
Nur yoʻli toʻshalgan, yorqin, charogʻon.
Yuraklar bir hisdan hapriqib ketar,
Farogʻat qoʻynida har shahru yovon.
Oʻshal nur yoʻlidan oq tonglar kelar,
Oppoq orzularga chulgʻanar Vatan.
Elim, yurtim degan ahil millatlar
Oʻshal nur yoʻlida mangu birlashgan.
Bu yoʻl koʻngillardan boshlangan asli,
Tabarruk aylagay Istiqlol nasli!

Pobiya YOʻLDOShEVA.