Tumanimiz maktablari PISA va PIRLS xalqaro baholash dasturlari haqidagi qoʻllanmalar bilan taʼminlandi

Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspektsiyasi, Taʼlim sifatini baholash boʻyicha xalqaro tadqiqotlarni amalga oshirish milliy markazi, Xalq taʼlimi vazirligi bilan hamkorlikda xalqaro PISA va PIRLS baholash dasturlari haqida tayyorlangan toʻrt nomdagi metodik qoʻllanmalarni ishlab chiqib, amaliyotga tatbiq etishga tavsiya etgan edi. Ushbu qoʻllanmalar tumanimizdagi 87 ta umumtaʼlim maktablariga yetkazib berildi.

Oʻzbekiston Respublikasi Prezidentining farmoniga muvofiq Oʻzbekiston Respublikasining 2030-yilga kelib, PISA xalqaro dasturi reytingida jahonning birinchi 30 ta ilgʻor mamlakatlari qatoriga kirishiga erishish hamda xalq taʼlimi tizimida taʼlim sifatini baholash sohasidagi xalqaro tadqiqotlarni tashkil etish vazifalari yuklatildi. Shu bilan birga, muhtaram Prezidentimiz Sh.M.Mirziyoyevning Oliy Majlisga Murojaatnomasida 2021-yildagi xalqaro baholash jarayonlariga tayyorgarlik koʻrish yuzasidan aniq vazifalar belgilab berildi.

“Xalqaro tadqiqotlarda oʻquvchilarning oʻqish savodxonligini baholash”, “Xalqaro tadqiqotlarda oʻquvchilarning matematik savodxonligini baholash”, “Xalqaro tadqiqotlarda oʻquvchilarning tabiiy fanlar boʻyicha savodxonligini baholash”, “Xalqaro tadqiqotlarda boshlangʻich sinf oʻquvchilarining oʻqish savodxonligini baholash” nomli mazkur metodik qoʻllanmalar ishlab chiqildi. Mamlakatimizdagi oʻquvchi-yoshlar savodxonligini baholash boʻyicha xalqaro PISA tadqiqoti hamda boshlangʻich 4-sinf oʻquvchilarining oʻqish savodxonligini baholash, PIRLS tadqiqoti haqida umumiy tushunchalar, asosiy tamoyillar haqida maʼlumotlar beradigan ushbu qoʻllanmalar oʻquvchilarda amaliy koʻnikmalarni rivojlantirishga xizmat qiladi.

Metodik qoʻllanmalarni ishlab chiqishda oʻqituvchilar va oʻquvchilarning PISA va PIRLS tadqiqotlari haqidagi tasavvurlarini boyitish, xalqaro tadqiqotlarga tayyorgarlik darajasini oshirish, oʻquvchilarning ijodiy va mantiqiy fikrlash koʻnikmalarini rivojlantirish, shu orqali taʼlim sifatini oshirishga hissa qoʻshishiga erishish maqsad qilingan boʻlib, uning ahamiyati katta.

Ushbu qoʻllanmalarning ahamiyati shundaki, ulardagi topshiriqlar namunalari respublikadagi bir nechta maktablarda tajriba-sinovdan oʻtkazilib, takomillashtirilgan holda nashr etilgan. Ushbu qoʻllanmalardan sinfdan tashqari va toʻgarak mashgʻulotlari davomida yoki mustaqil ravishda oʻquvchilarning savodxonligini oshirish, berilgan topshiriqlarni yechish orqali ularda ijodiy, mantiqiy fikrlash, hayotiy muammolarni hal qilish koʻnikmalarini rivojlantirishda hamda 2021-yilda oʻtkaziladigan xalqaro PISA va PIRLS tadqiqotlariga tayyorgarlik koʻrishda foydalanish tavsiya etiladi.

Qoʻllanmalar umumiy oʻrta taʼlim muassasalari, akademik litsey va kasb-hunar kollejlarining oʻqituvchilari va oʻquvchilari, xalq taʼlimi xodimlarini qayta tayyorlash va malakasini oshirish muassasalarining tinglovchilari hamda sohaga qiziqqan mutaxassislar uchun moʻljallangan boʻlib, taʼlim samaradorligini oshirishda muhim ahamiyat kasb etadi.

R.XOLMURODOV,
tuman Xalq taʼlimi boʻlimi taʼlim sifati monitoringi bosh-inspektor metodisti.