Taʼlim sohasiga innovatsion pedagogik texnologiyalarni keng joriy qilish boʻyicha yigʻilish oʻtkazildi

Tumanimizdagi 82-sonli umumiy oʻrta taʼlim maktabi majlislar xonasida tuman Xalq taʼlimi boʻlimi rahbariyati, boʻlim boshliqlari, tumanimizdagi umumiy oʻrta taʼlim maktablari direktorlari ishtirokida yigʻilish boʻlib oʻtdi.

Yigʻilishni  tuman Xalq taʼlimi boʻlimi mudiri O.Yoʻldoshev ochdi va  Prezidentimiz Sh.Mirziyoyevning Oliy Majlisga qilgan Murojaatnomasidan kelib chiqadigan vazifalar, taʼlim tizimida amalga oshirilishi lozim boʻlgan chora-tadbirlar haqida maʼruza qildi.

Yigʻilishda mamlakatimizning kelajagi bugun maktablarda ilm olayotgan bolalar qoʻlidaligi, ularni har jihatdan barkamol qilib, zamonaviy bilimlar bilan mustahkam qurollantirish, mustaqil hayotga uchirma qilish taʼlim tizimi xodimlarining zimmasida ekanligi taʼkidlandi. Shuningdek, masʼullar buning uchun sohaga innovatsion pedagogik texnologiyalarni, ilgʻor tajribalarni keng joriy qilishi lozimligiga keng toʻxtaldi.

Oʻzbekiston Respublikasi Vazirlar Mahkamasi huzuridagi taʼlim sifatini nazorat qilish davlat inspektsiyasi, Taʼlim sifatini baholash boʻyicha xalqaro tadqiqotlarni amalga oshirish milliy markazi, Xalq taʼlimi Vazirligi bilan hamkorlikda xalqaro PISSA va PIRLS baholash dasturlari haqida toʻrt nomdagi “Xalqaro tadqiqotlarda oʻquvchilarning oʻqish savodxonligini baholash, “Xalqaro tadqiqotlarda oʻquvchilarning matematik savodxonligini baholash, “Xalqaro tadqiqotlarda oʻquvchilarning tabiiy fanlar boʻyicha savodxonligini baholash”, “Xalqaro tadqiqotlarda boshlangʻich sinf oʻquvchilarining oʻqish savodxonligini baholash” nomli metodik qoʻllanmalarni chop etilgani haqida soʻz yuritildi.

Tuman Xalq taʼlimi boʻlimi taʼlim sifati monitoringi boʻlim boshligʻi Ravshan Xolmurodov ushbu qoʻllanmalar tumanimizdagi barcha maktablarga yetkazib berilgani, bundan koʻzlangan maqsad oʻqituvchilar va oʻquvchilarning PISSA va PIRLS tadqiqotlari haqidagi tasavvurlarini boyitish, xalqaro  tadqiqotlarga tayyorgarlik darajasini oshirish, oʻquvchilarning ijodiy va mantiqiy fikrlash koʻnikmalarini rivojlantirish, shu orqali taʼlim sifatini oshirishga erishish ekanligi xususida yigʻilish ishtirokchilariga keng maʼlumot berdi.

Shuningdek, yigʻilishda mazkur boʻlim huquqshunosi Nilufar Jumaniyozova Oʻzbekiston Respublikasi Prezidentining 2019-yil 9-dekabrda qabul qilingan “Byurokratik toʻsiqlarni yanada qisqartirish hamda davlat organlari va tashkilotlari faoliyatiga zamonaviy boshqaruv tamoyillarini joriy qilish chora-tadbirlari toʻgʻrisida”gi Qarori mazmun-mohiyati, tuman Ichki ishlar boʻlimi xodimi Islom Davlatboyev esa umumiy oʻrtataʼlim maktablarining 9-sinfini tugatgan oʻquvchilarni Nukus shahridagi Qoraqalpogʻiston Respublikasi Ichki ishlar Vazirligi akademik litseyiga hajjat topshirishi, sinovlardan oʻtish tartibi haqida maʼlumotlar berdilar.

Yigʻilishda koʻrilgan barcha masalalar yuzasidan ishtirokchilarni qiziqtirgan savollarga batafsil javoblar berildi.

O.Rajabova.