TAʼTIL HAM MAQSADLI VA MAZMUNLI OʻTMOQDA

Bizning 1-maktab jamoasi 2019-2020 oʻquv yili koronavirus infektsiyaga qarshi oʻrnatilgan karantin davrida onlayn darslarda faol ishtirok etishi bilan tashabbuskorligini yana bir bora isbotladi.
Shu jumladan, men rahbarlik qilayotgan 7-“v” sinfda olib borilgan onlayn darslarga oʻquvchilar qiziqishi yanada oshdi. Nafaqat oʻquvchilar, ularning ota-onalari ham eʼtibor qaratib, farzandlarining bu tarzda ilm olishiga oʻz hissalarini qoʻshdilar va sharoit yaratdilar.
Oʻquvchilar internet tarmogʻidan unumli foydalanib, onlayn darslardan tashqari ham koʻplab izlanishlar qilishdi, topshiriqlarni bajarib bordi, yangiliklardan xabardor boʻlib bordi, oʻquvchilar har kuni aʼlo baholar olishga intildi.
Hozirgi kunda ham biz fan oʻqituvchilari toʻgarak kanal ochib, oʻquvchilarning geografiya faniga boʻlgan qiziqishlarini oshirib bormoqdamiz.
Odatda koʻpchilik ota-onalar yozgi taʼtilni farzand tarbiyasida xotirjam, tashvishlarsiz oʻtadigan davr deb hisoblaydi. Lekin farzandlari maktabdan uzilib, tarbiyasida boʻshliq paydo boʻlib qolishidan xavotir olishmaydi.
Masofadan turib oʻqitish afzalliklaridan foydalangan holda, shu boisdan ayni kunlarda ham toʻgarak mashgʻulotlariga bolalarni jalb qilib, taʼtil kunlarining ham maqsadli, mazmunli oʻtishiga harakat qilayapmiz.

Dilfuza OʻPOZBOYeVA,
1-sonli maktab oʻqituvchisi.