Saylov jarayoni demokratik tamoyillar asosida oʻtmoqda

Xalq deputatlari Amudaryo tuman Kengashining boʻshab qolgan 24-Oq oltin va 28-Daryoboʻyi saylov okruglarida deputatlar saylovini oʻtkazishga munosib tayyorgarlik koʻrilgani sababli bugun, yaʼni 20-sentyabr kuni saylov jarayoni demokratik tamoyillar asosida oʻtmoqda. Saylov uchastkalarida saylovchilar roʻyxati shakllantirilib, ovoz berish joylari tayyorlandi. Binolarda uchastka saylov komissiyalari aʼzolari, kuzatuvchilar va OAV vakillari uchun maxsus oʻrinlar ajratilgan boʻlib, ovoz berish uchun kelayotgan saylovchilarning tana horaratlari oʻlchanib, dezinfektsiya qilinmoqda.

Keyingi yillarda yurtdoshlarimizda ushbu siyosiy jarayonga boʻlgan qiziqish hamda oʻz siyosiy huquqlarini amalga oshirish masʼuliyati har qachongidan ham oshdi. Bu ularning saylovlardagi faolligida yaqqol namoyon boʻlmoqda. Mazkur saylovda 24-Oq oltin saylov okrugi hududida 4407 nafar, 28-Daryoboʻyi saylov okrugi hududida 4215 nafar saylovchilar roʻyxati shakllantirilgan.

Mamlakatimiz fuqarolarining jamiyat va davlat ishlarini boshqarishda bevosita hamda oʻz vakillari orqali ishtirok etish huquqini amalga oshirishga qaratilgan ushbu muhim demokratik jarayon – saylovlar asnosida insonning saylov huquqlari va erkinliklarini taʼminlash, erkin, demokratik, adolatli saylovlarni tashkil etish gʻoyatda muhim ahamiyat kasb etadi. Shu sababli saylov jarayonlari koʻngildagidek oʻtishi uchun saylov uchastkalari joylashgan binolarda barcha zarur shart-sharoitlar yaratildi. Xususan, uchastkalar joylashgan binolar zamonaviy kompyuter va aloqa vositalari, mebel va boshqa jihozlar, nomzodlar haqida maʼlumotlar hamda ularning saylovoldi dasturlari aks etgan tashviqot materiallari, koʻrgazmali vositalari bilan toʻliq taʼminlandi. Shuningdek, jismoniy imkoniyati cheklangan, keksa yoshdagi insonlar hamda baʼzi sabablarga koʻra saylov kuni saylov uchastkasiga kelolmaydigan fuqarolarning roʻyxati tuzilib, ularga uy sharoitida ovoz berish imkoniyati yaratilgan.

Saylov uchastkalari odamlar bilan gavjum. Saylovchilar oʻz konstitutsiyaviy huquqlarini roʻyobga chiqarib, oʻzlari munosib deb bilgan nomzodlarga ovoz bermoqdalar.

Tuman hokimligining Axborot xizmati.