“Amu quyoshi” nodavlat maktabgacha taʼlim tashkilotida fidoyi tarbiyachilar mehnat qilmoqda

Bugungi kunda yosh avlod taʼlim-tarbiyasi jamiyat hayotidagi, yurt ravnaqiga erishish yoʻlidagi ustuvor vazifaga aylangan. Shu boisdan ham farzandlarimizni barkamol avlod qilib shakllantirishda eng muhim ahamiyat kasb etuvchi taʼlim-tarbiya fidoyilari boʻlgan ustoz va murabbiylar, tarbiyachilarning jamiyatdagi oʻrni va mavqei tobora oshirilib, ularning oʻz sohalarida samarali faoliyat olib borishlari uchun barcha imkoniyat va shart-sharoitlar yaratib berilmoqda. Shu maqsadda zamonaviy shart-sharoitlar mavjud boʻlgan taʼlim-tarbiya maskanlari bunyod etilmoqda.

Ayniqsa, yurtimizda farzandlarimizning maktabgacha boshlangʻich taʼlim olishlariga jiddiy etibor qaratilib, maktabgacha taʼlim muassasalari soni yildan yilga ortib bormoqda. Yangi zamonaviy koʻrinishga va qulayliklarga ega boʻlgan taʼlim-tarbiya dargohlari tashkil qilinib, kelajagimiz egalari boʻlgan jajji bolajonlar zamon talablari asosida tarbiyalanmoqda.

Tumanimizda 2019-yil 1-martdan oʻz faoliyatini boshlagan “Amu quyoshi” nodavlat maktabgacha taʼlim tashkilotida ham farzandlarimizning munosib taʼlim hamda tarbiya olishlari uchun barcha imkoniyat, shart-sharoitlar yaratilgan. Jami 100 nafar tarbiyalanuvchi oʻrniga moʻljallangan tarbiya maskani tadbirkor Manzura Jumaniyozova tashabbusi bilan davlat-xususiy sherikchilik asosida tashkil qilingan. Muassasa 1 mlrd. 284 mln. soʻm kredit mablagʻi hamda 500 mln. soʻmdan ortiq tadbirkorning oʻz mablagʻi, jami 1 mlrd. 800 mln. soʻmga yaqin mablagʻ evaziga bunyod etilgan. Tarbiya maskani kerakli jihozlar bilan jihozlangan, turli xildagi oʻyinchoqlar bilan taʼminlangan, binoda zamon talabiga mos isitish uskunalari oʻrnatilgan, bolajonlar uchun choʻmilish havzasi qurilgan.

Hozirda “Amu quyoshi” nodavlat maktabgacha taʼlim tashkilotida jami 23 nafar xodim bolajonlarga taʼlim-tarbiya berishda oʻzlarining munosib hissalarini qoʻshmoqdalar. Shundan 15 nafari pedagog xodimlar hisoblanadi. Muassasada rahbarlik qilayotgan Sayyora Jumamurodova boshchiligidagi ahil jamoa ertamiz egalari boʻlgan barkamol avlodni voyaga yetkazishda fidoiylik bilan mehnat qilmoqda.

Maʼlumot tariqasida aytish joizki, bugungi kunda tumanimizdagi maktabgacha taʼlim tashkilotlari soni 106 ta boʻlib, shundan 50 tasi davlat, 3 tasi davlat xususiy sherikchilik asosida tashkil qilingan nodavlat maktabgacha taʼlim tashkiloti va 53 tasi oilaviy nodavlat maktabgacha taʼlim tashkilotlari hisoblanadi. Ularga qamrab olingan bolalar soni 9 ming 627 nafardan iboratdir. Hozirgi kunda tumanimizda maktabgacha yoshdagi bolalarni qamrab olish koʻrsatkichi 58,2 foizga yetdi.

Hukumatning bugungi kundagi ogʻir sinovli vaziyat – pandemiya sababli maktabgacha taʼlim tashkilotlarida koronavirus infektsiyasining profilaktikasi boʻyicha chora-tadbirlarni kuchaytirish maqsadida qabul qilingan tegishli qarori bilan tumandagi barcha turdagi barcha turdagi maktabgacha taʼlim tashkilotlari faoliyati vaqtincha toʻxtatildi.

Mamlakatda epidemiologik vaziyat biroz yaxshilanishi bilan pandemiya sharoitida nodavlat maktabgacha taʼlim tashkilotlari faoliyatini qayta tashkil etishga qaratilgan chora-tadbirlar asosida tumandagi 3 ta davlat-xususiy sherikchilik asosidagi hamda 41 ta oilaviy nodavlat maktabagacha taʼlim tashkilotlari karantin qoidalariga amal qilgan holda faoliyatini qayta tikladi hamda guruhlardagi tarbiyalanuvchilar sonini 15 nafardan oshirilmagan holda taʼlim-tarbiya berib kelinmoqda. Shu jumladan, “Amu quyoshi” nodavlat maktabgacha taʼlim tashkilotida ham barcha karantin qoidalariga amal qilgan holda oʻz faoliyatini davom ettirmoqda. Hozirda tarbiya maskanida 4 ta guruhda 15 nafardan jami 60 nafar tarbiyalanuvchilarga talim-tarbiya berilmoqda.  

Charos Arslonova, tuman hokimliging Axborot xizmati rahbari