MAQSADIMIZ – ILMLI VA YuQORI KASBIY MAHORATGA EGA YoShLARNI TARBIYaLASh

Tumanimizda 2020-2021 oʻquv yilida tashkil etilgan 1-son kasb-hunar maktabi ham ilmga intiluvchan, oʻzlari tanlagan kasb-hunarni egallashga ishtiyoqmand yoshlarning iqtidorlarini namoyon etishlari, mukammal oʻrta maxsus taʼlim olish va kasb-hunar egallashlari uchun davlatimiz tomonidan yaratilgan katta imkoniyatlardan biri hisoblanadi.

Qoraqalpogʻiston Respublikasi kasbiy taʼlimni rivojlantirish va muvofiqlashtirish boshqarmasiga qarashli mazkur kasb-hunar maktabining quvvati 900 oʻquvchi oʻringa moʻljallangan boʻlib, umumiy yer maydoni 5,17 gektarni tashkil etadi. Muassasa 1 ta oʻquv binosi va 100-oʻrinli yotoqxona hamda amaliy mashgʻulotlar uchun  maxsus ustaxonaga ega.

Ayni kunda kadrlar tayyorlash rejalashtirilayotgan kasb va mutaxassisliklar boʻyicha loyihalar shakllantirilib, 2020-2021 oʻquv yili uchun oʻquvchilarni tanlash va qabul qilish ishlari nihoyasiga yetkazilmoqda. Joriy oʻquv yili uchun 6 ta mutaxassislik boʻyicha 180 nafar oʻquvchiga qabul kvotasi rejalashtirilgan. Kasb-hunar maktabida asosan avtomobillarni taʼmirlash chilangari, asalarichi, payvandlovchi (elektr gaz payvandlash ishlari boʻyicha), tikuvchi, issiqxona va parnik xoʻjaligi laboranti, qishloq xoʻjaligi mashinalarini taʼmirlash chilangari yoʻnalishlari boʻyicha mutaxassislar tayyorlanadi. Kadrlar buyurtmachilari bilan shartnomalar tuzish, sinfxonalarni kadrlar tayyorlashga rejalashtirilayotgan kasb va mutaxassisliklar uchun mos jihozlar bilan taʼminlash, issiqxona va parnik xoʻjaligini tashkil etish, oʻquv muassasasi binosi atrofini obodonlashtirish ishlariga alohida eʼtibor qaratilmoqda.

1-oktyabr – Oʻqituvchi va murabbiylar kuni. Ushbu qutlugʻ kunda taʼlimning yangi yoʻnalishida oʻz faoliyatlarini boshlayotgan kasb-hunar maktablari oʻqituvchilarini, tumanimizdagi barcha ustoz va murabbiylarni bayram bilan muborakbod etaman!

A.BOLTABOYeV, Amudaryo tumani 1-sonli kasb-hunar maktabi direktori.