EL-YuRT HURMATIGA SAZOVOR USTOZ
Insonni kelajakka umid, ishonch tuygʻusi va ezgu orzular ulgʻaytiradi, deyishadi donolar. Haqiqatan ham ertangi kunni, yorugʻ tonglarni kutib, orzu-umidlar sari intilib yashash insonga kuch bagʻishlaydi, yaxshi niyatlarga yoʻldosh boʻlib yashashga oʻrgatadi. Oʻquvchilik davridanoq ana shunday yaxshi niyatlar, orzu-umidlar va kelajakka ishonch tuygʻulari ogʻushida yashab, oʻqituvchilik kasbiga havas qilgan va shu kasbni egallab, umrini yosh avlodga bilim berishga bagʻishlagan Gulasal Matyoqubova deyarli 38-yil davomida taʼlim sohasida faoliyat koʻrsatdi. Yaqinda uni oʻzi 13-yildan buyon direktorlik qilib kelayotgan 10-sonli maktab jamoasi katta hurmat va ehtirom bilan pensiyaga kuzatishdi. Yillar davomida bir taʼlim dargohida, bir maqsad yoʻlida yonma-yon mehnat qilgan hamkasblari, shogirdlari ustozga samimiy dil soʻzlarini izhor etdilar.
Gulasal Matyoqubova Toshkentdagi Rus tili va adabiyoti institutini 1982-yilda tamomlagan. U dastlab 30-sonli rus tiliga ixtisoslashgan umumtaʼlim maktabiga yoshlar yetakchisi qilib ishga yuborildi. U besh yil davomida mazkur maktabda yoshlar yetakchisi va rus tili oʻqituvchisi sifatida faoliyat yuritib, 1987-yilda tuman yoshlar tashkilotida yetakchi mutaxassis sifatida oʻz faoliyatini davom ettirdi.
Gulasal Matyoqubova 1991-yilda 10-sonli maktabda rus tili va adabiyoti fani oʻqituvchisi vazifasida ishlay boshladi. U oʻqituvchilik faoliyati davomida qatʼiyatliligi, atrofidagilarga, oʻziga nisbatan talabchanligi, dars mashgʻulotlarini oʻtkazishdagi oʻziga xos uslubi, ishni qatʼiy intizom asosida tashkil etish qobiliyati bilan maktab oʻqituvchilar jamoasining hurmatiga sazovor boʻldi va uni 2007-yilda 10-sonli maktab direktori vazifasiga tayinlashdi.
Gulasal Matyoqubova rahbarligida mazkur maktab pedagogika jamoasi taʼlim-tarbiya sohasini zamon talablari darajasiga koʻtarish, maktab taʼlimida innovatsion gʻoyalardan foydalangan holda har bir fan boʻyicha alohida taʼlimiy rejalar ishlab chiqish boʻyicha hamjihatlikda ish olib borishdi. Fan toʻgaraklari samaradorligiga erishildi. Darsdan tashqari mashgʻulotlarning uzviyligi taʼminlandi. Oʻquvchilarning fanlarni oʻzlashtirish darajasi oshdi. Natijada maktab bitiruvchilari oliy taʼlim muassasalariga oʻqishga kirish boʻyicha yuqori natijalarga erishildi. Maktabda oʻzaro hamjihatlik, qatʼiy mehnat intizomiga ega pedagogika jamoasi shakllandi. Erishilgan bu yutuqlar Gulasal Matyoqubovaga ham, maktab pedagogika jamoasiga ham obroʻ-eʼtibor keltirdi. Xalq deputatlari tuman Kengashiga boʻlib oʻtgan saylovlarda ketma-ket ikki marta Gulasal Matyoqubova nomzodini saylovchilar qoʻllab-quvvatlashdi va u 2011-2019-yillarda “Milliy tiklanish” Demokratik partiyasidan xalq deputatlari Amudaryo tuman Kengashi deputati sifatida tuman ijtimoiy-siyosiy hayotida faol ishtirok etdi.
Oʻz mehnati, fidoyiligi bilan obroʻ-eʼtibor topgan, xalq ishonchini qozongan Gulasal Matyoqubovaning halol va sharafli mehnati davlatimiz tomonidan munosib baholandi. U Qoraqalpogʻiston Respublikasi Xalq taʼlimi aʼlochisi, “Mustaqillikning 20 yilligi” koʻkrak nishoni sohibasi boʻldi. Namunali oila bekasi sifatida umr yoʻldoshi, rahmatli, Qoʻshnazar aka bilan 3 nafar farzandni el-yurt koriga kamarbasta insonlar qilib voyaga yetkazishdi.
El-yurt ishonchini qozongan, yuzlab shogirdlarning fidoyi ustozi Gulasal Matyoqubovaga ona Vatanga, xalqqa sodiq farzand sifatida qilgan xizmatlari rohat-farogʻatini koʻrib yashash baxti nasib etsin, deb qolamiz.
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
