Ogoh boʻling, aldovlarga uchmang

Ayrim fuqarolar xorijda ishlashning qonuniy yoʻllari turib, noqonuniy tarzda chet elga borib ishlashga harakat qilayotgani sir emas. Bundaylar esa deyarli barcha hollarda firibgarlarning tuzogʻiga tushib, odam savdosining qurboniga aylanmoqda. Xoʻsh, buning oldini olish uchun qanday yoʻl tutish kerak?

Oʻzbekistonda tashqi mehnat migratsiyasi borasida fuqarolarimizning xorijda mehnat qilishini tartibga soluvchi huquqiy asoslar yaratilgan boʻlib, oʻtgan davr mobaynida yuzlab tumanimiz fuqarolari ana shu imkoniyatlardan foydalangan holda xorijiy davlatlarda ishlab, tajriba va koʻnikmalarini orttirishga muvaffaq boʻldilar.

Oʻzbekiston Respublikasida amalda boʻlgan "Odam savdosiga qarshi kurashish toʻgʻrisida”gi qonun hujjatlari ijrosini taʼminlash yuzasidan tuman Bandlikka koʻmaklashish va aholini ijtimoiy muhofaza qilish markazida bir qator amaliy ishlar amalga oshirildi. Markazning odam savdosiga qarshi kurashish borasida 2014-yilga moʻljallangan ish rejasiga asosan tuman hududidagi ovul, mahalla, shaharcha fuqarolar yigʻinlarida fuqarolarning chet ellarga noqonuniy ish izlab ketishining oldini olish maqsadida aholi oʻrtasida profilaktik ishlar boʻyicha uchastka tayanch punkti nozirlari va Markazning hududlarga biriktirilgan nozirlari bilan hamkorlikda tushuntirish ishlari, seminarlar oʻtkazib borilmoqda.

Markazda odam savdosiga qarshi kurashish maqsadida tashkil etilgan ishonch telefoni haftaning dushanba-juma kunlari ishlab turishi taʼminlangan. Ishonch telefoniga murojaat qilgan fuqarolarga Markazning malakali mutaxassislari tomonidan tegishli tushuntirishlar berilib kelinmoqda.

Odam savdosiga qarshi kurashish va ularning oldini olish boʻyicha ishlarni kuchaytirish maqsadida hududlarda fuqarolarning fikrlarini oʻrganishga alohida eʼtibor beriladi.

2013-yilning 12 oyi davomida va 2014-yilning 4 oyi davomida tuman Bandlikka koʻmaklashish va aholini ijtimoiy muhofaza qilish Markazi, tuman hokimligi, tuman prokuraturasi tashabbusi bilan 12-marta boʻsh ish oʻrinlar va vakant lavozimlar yarmarkasi oʻtkazildi. Yarmarkalarda tumanning 363 ta korxona va tashkilotlari oʻzlarida mavjud boʻlgan 1343 ta boʻsh ish oʻrinlari bilan qatnashdilar. Bundan tashqari, yarmarkada 1191 nafar tuman fuqarolari, shundan 567 nafar kollej bitiruvchilari hamda 20 nafar voyaga yetmaganlar ishtirok etdilar. Yarmarka davomida jami 864 nafar fuqarolarga ishga joylashish uchun yoʻllanmalar berildi, shundan 498 nafari yoshlar, 365 nafari kasb-hunar kolleji bitiruvchilari, 1 nafari qurolli kuchlardan boʻshatilganlardir. Yarmarkada qatnashgan 20 nafar voyaga yetmagan yoshlarga ishga joylashishdagi huquq va imtiyozlari toʻgʻrisida maslahatlar berildi.

Odam savdosi - inson qadr-qimmatiga tahdid solayotgan transmilliy uyushgan jinoyatchilik koʻrinishlaridan biridir va unga qarshi kurashishda nafaqat huquq-tartibot idoralari xodimlari, balki har bir fuqarodan doimiy ogohlik va hushyorlik, bu mudhish illatga qarshi kurashishda hamjihatlik talab qilinadi. Barchamiz ogoh va hushyor boʻlaylik.

Gulnoza Jumaniyozova,

Amudaryo, Beruniy tumanlararo Bandlikka koʻmaklashish va aholini ijtimoiy muhofaza qilish markazi Davlat mehnat huquq noziri.

(Foto - http://zakovat.uz)