“BARKAMOL AVLOD” BOLALAR MAKTABI: BU YeRDA YoSh AVLODNING IQTIDORI RIVOJLANTIRILADI

Oʻzbekiston Respublikasi Prezidentining 2019-yil 30-sentyabrdagi PQ- 4467-sonli “Xalq taʼlimi tizimidagi maktabdan tashqari taʼlim   samaradorligini tubdan oshirish chora-tadbirlari toʻgʻrisida”gi Qarori asosida  Respublika  “Barkamol  avlod”  bolalar  markazlari   negizida “Barkamol  avlod”  bolalar   maktablari tashkil  etildi. Tumanimizdagi “Barkamol  avlod”  bolalar   maktabi joriy yil yanvar oyidan  oʻz   faoliyatini boshladi. Endilikda “Madaniyat  va sanʼat”, “Texnika, konstruktorlik  va modellashtirish”, “Jismoniy tarbiya  va  sport”, “Hunarmandchilik va qoʻl mehnati”, “Turizm va Ekologiya”, “Oliy   taʼlim muassasalari va maktabga tayyorlov”, “Xorijiy tillar” yoʻnalishlarida  toʻgaraklarni tashkil etish imkoniyatiga ega boʻldik. 2020-2021 oʻquv yilidan boshlab, “STEAM - taʼlim” (Science-Tabiiy  fanlar, Technology-texnologiyalar, Engineering-muhandislik, Art – sanʼat, Mathematics- matematika) dasturi joriy  etiladi. “Texnika, konstruktorlik va modellashtirish” yunalishiga 2 ta robot-konstruktor va  3 D printerga plastik xom ashyo material bilan taʼminlandi.  Ishonamizki, bu  oʻquvchilar   qiziqishini   oshirish uchun xizmat  qiladi.
“Barkamol  avlod” bolalar maktabida tashkil etilgan   toʻgaraklarda  yoshlarga taʼlim-tarbiya berish  bilan  birgalikda  ularning  iqtidorini   shakllantirish ,  qiziqishlari, dunyoqarashlarini kengaytirish, oʻz fikrini erkin namoyon   etishlariga alohida eʼtibor berilmoqda. Maktab pedogogik jamoasi esa oʻz  ustida ijodiy izlanishlar olib bormoqda.
Ijodiy salohiyatni rivojlantirish maqsadida joriy yil fevral oyidan har haftaning payshanba kunlari “Zakovat” intelektual oʻyinlari tashkil etilgani oʻquvchilarda katta qiziqish uygʻotmoqda.
Prezidentimizning yoshlar maʼnaviyatini yuksaltirish va ularning boʻsh    vaqtini mazmunli tashkil etish boʻyicha 5 ta muhim   tashabbusi  faoliyatimizning   asosiy  mezoni  boʻlib  hisoblanadi. Har haftaning dushanba kuni – yoshlarning  musiqa,  rassomchilik, adabiyotga qiziqishlarini oshirish, isteʼdodini yuzaga  chiqarish, seshanba kuni – yoshlarni jismoniy chiniqtirish,ularning sport  sohasida qobiliyatini namoyon qilish, chorshanba kuni – yoshlar oʻrtasida kompyuter   texnologiyalari  va  internetdan  samarali  foydalanish,   payshanba    kuni – yoshlar maʼnaviyatini yuksaltirish, ular  oʻrtasida   kitobxonlikni  keng   targʻib  qilish, juma kuni – xotin-qizlarni ish bilan taʼminlash boʻyicha qizlarimizga bichish-tikish, toʻqish, pazandachilik  kabi  kasb-hunarlar oʻrgatilmoqda. Shanba kuni beshta tashabbus yuzasidan amalga oshirilgan ishlar, erishilgan yutuq, yoʻl qoʻyilgan kamchiliklar muhokama qilinib, yangi rejalar tuziladi.  Ertalabdan yangragan jarangdor, yoqimli qoʻshiq ovozi, turli xil koʻzni   quvontiruvchi rasmlar namoyishi maktabimizga kirib kelgan har bir kishiga koʻtarinki kayfiyat   bagʻishlamoqda.
Maktabimizda muhim sanalar, buyuk allomalar, yozuvchi va shoirlarning  tugʻilgan kunlarini nishonlash anʼanaga aylangan. Yangi yil  bayramida “Assalom,  yangi yil” deb nomlangan katta bayram tadbiri oʻtkazildi. Oʻquvchilar ishtirokida Sh.Xudoyberganov boshchiligida tayyorlangan “Qish  ertagi” nomli sahna   koʻrinishi tuman Madaniyat boʻlimida namoyish qilinib, Amudaryo televideniyesi orqali   tumanimiz oʻquvchilariga yangi yil sovgʻasi sifatida tuhfa etildi.
Z.M.Bobur tavalludiga bagʻishlab “Shoh va shoir bobom”, Zulfiya Isroilova  tavalludiga bagʻishlab “Zulfiyaxonim bahor va muhabbat kuychisi” mavzusida   insholar tanlovi oʻtkazildi.   Maktab  maʼmuriyati tamonidan gʻolib oʻquvchilar  faxriy yorliq  va  sovgʻalar bilan taqdirlandi.
8  mart - Xalqaro xotin-qizlar bayrami munosabati bilan toʻgarak  rahbarlari   oʻrtasida “Balli, qizlar” koʻrik-tanlovi oʻtkazildi. Izlanish va intilishdan   toʻxtamagan toʻgarak rahbarlari turli yoʻnalishda oʻz mahoratini   namoyon  etishdi. “Onamga sovgʻa” mavzusidagi tanlovda esa oʻquvchilarmiz onalariga maktabda oʻrgangan hunarlari asosida oʻz qoʻllari bilan har  xil  rasmlar, qoʻlda yasagan gullar, toʻqilgan buyumlardan sovgʻalar tayyorlashdi. Bayram  munosabati bilan “Mehrim, sizga Onajon” nomli tadbir ham oʻtkazildi va “Shoʻx bolalar” jamoasining kontsert dasturi namoyish etildi. Shuningdek, maktabimiz  yigitlari tomonidan ijro etilgan “Muqaddas ayol” qoʻshigʻi hamda bayram tilaklari bildirilgan video rolik namoyishi jamoamiz xotin-qizlariga oʻzgacha kayfiyat baxsh etdi.   
Mamlakatimizga koronavirus infektsiyasi kirib kelishi va karantin  holati  joriy qilinishi tufayli toʻgarak rahbarlari oʻz ishiga maʼsuliyat bilan yondoshgan   holda ayni paytda darslarni masofadan turib amalga oshirishmoqda. Dars-mashgʻulotlari “Barkamol avlod” bolalar maktabining telegrammdagi kanali orqali oʻz vaqtida oʻquvchilarga yetkazilmoqda. Bundan tashqari, Amudaryo televideniyesida ham mashgʻulotlar berib borilmoqda. Jumladan, “Landshaft dizayni” boʻyicha toʻgarak rahbari M.Ashirboyeva, “Robototexnika” yoʻnalishida toʻgarak rahbari A.Nurjanov, “Bichish- tikish” ishlari yuzasidan toʻgarak rahbari M.Matmurodova hamda X.Matkarimovalarning dars jarayonlari namoyish qilindi.
Maktabimizda bir yil taʼlim olib, kasb-hunarga ega boʻlgan oʻquvchilarga   egallagan kasbi boʻyicha guvohnomalar beriladi. Maqsadimiz zimmamizga   yuklatilgan maʼsuliyatni toʻla anglagan holda farzandlarimiz qalbida Vatanga muhabbat tuygʻularini rivojlantirish, kasb-hunarga yoʻnaltirish, eng muhimi, ularning boʻsh vaqtini mazmunli tashkil etish hamda maktabimizni haqiqiy hunar maskaniga aylantirishdan iboratdir.

D.KAMALOVA, “Barkamol avlod” bolalar maktabi direktorining  oʻquv va

maʼnaviy-maʼrifiy ishlar boʻyicha oʻrinbosari.