AMUDARYo TUMANIDA YoShLAR FORUMI OʻTKAZILDI

Mamlakatimiz aholisining koʻpchilik qismini tashkil etuvchi yoshlarni qoʻllab-quvvatlash, ular orasida sogʻlom turmush tarzini keng targʻib etish orqali jismoniy faol, zararli odatlardan saqlanishiga erishish, yaratilgan imkoniyatlardan unumli foydalangan holda oʻqib, intilishga ruhlantirishga ulkan eʼtibor qaratilmoqda. Shu maqsadlarga xizmat qiluvchi turli tadbirlar, tanlovlar, sport musobaqalari oʻtkazilayapti.

Muhtaram Yurtboshimizning 2020-yil 29-dekabr kungi oliy Majlisga qilgan Murojaatnomasidan ham yoshlar taʼlim tarbiyasiga, ularning ilmli, yuksak maʼnaviyatli shaxslar boʻlib mustaqil hayotga dadil kirib kelishiga erishish yuzasidan koʻlamdor vazifalar belgilangan edi. Murojaatnomadagi va “Yoshlarni qoʻllab-quvvatlash va aholi salomatligini mustahkamlash yili” Davlat dasturida belgilangan vazifalarning ijrosini taʼminlash yuzasidan Oʻzbekiston Yoshlar ishlari agentligining Qoraqalpogʻiston Respublikasi va viloyatlar boshqarmalari tuman, shahar boʻlimlari tomonidan tizimli ishlar amalga oshirilmoqda. Jumladan Davlat dasturi ijrosini taʼminlanishini nazorat qiluvchi maxsus shtablar faoliyati yoʻlga qoʻyildi, ishsiz yoshlar bandligini taʼminlash, yordamga muhtojlariga amaliy koʻmak koʻrsatilib, ularning bandligini taʼminlanib, daromad topishlariga sharoit yaratilmoqda.

Dehqonchilik bilan shugʻullanish istagida boʻlgan yoshlarga yer maydonlari ajratilayotgani, “Har bir ishbilarmon – yoshlarga tayanch”, “Yoshlar – 1+1” loyihalari asosida yoshlar tadbirkorlikka, kasb-hunarga oʻqitilmoqda.

Joriy yilning 11-mart kuni Yoshlar ishlari agentligi Qoraqalpogʻiston Respublikasi boshqarmasi tashabbusi bilan tumanimizda oʻtkazilgan “Yoshlar forumi” ham tumanimizda amalga oshirilayotgan yangilanishlar, bunyodkorliklar bilan yoshlarni tanishtirish, ularning davlatimiz gʻamxoʻrliklariga munosib boʻlishlariga erishish, yaratilayotgan imkoniyatlar haqida batafsil maʼlumotlar berish, sportga keng jalb qilishga qaratildi.

Avvalo forum ishtirokchilariga tadbir mazmun-mohiyati batafsil tushuntirilgach, ular Yoshlar mehnat guzari faoliyati bilan tanishtirildi, Olmazor mahallasida qad rostlagan “Street Workout” maydonchasida boʻldilar va yoshlarning sport sogʻlomlashtirish mashqlarini bajarishlari uchun oʻrnatilgan jihozlar bilan tanishdilar.

Maʼlumki, suzish sporti inson salomatligini taʼminlashda muhim oʻrin tutadi. Buni inobatga olgan holda tuman Bolalar-oʻsmirlar sport maktabida qurilib, faoliyat koʻrsatayotgan suzish havzasida koʻplab yoshlar sportning ushbu turi bilan shugʻullanishayapti va iqtidorini yuksaltirayapti.

Forum doirasida suzish sporti bilan shugʻullanayotgan yoshlar oʻrtasida oʻtkazilgan musobaqani barcha ishtirokchilar qiziqib tomosha qildilar.

Qilichboy ovulida hudud qizlari oʻrtasida oʻtkazilgan mini futbol musobaqasida 5ta jamoa qatnashdi va keskin kurashlar ostida oʻtgani tufayli Forum ishtirokchilariga zavq-shavq bagʻishladi.

Shuningdek, tadbir rejasidan oʻrin olgan boʻsh ish oʻrinlari mehnat yarmarkasi Qilichboy madaniyat markazida boʻlib oʻtdi. Xolimbeg ovuli hududidan “Har bir yoshga – bir gektar” loyihasi doirasida dehqonchilik bilan shugʻullanishlari uchun ishsiz yoshlarga yer maydonlari ajratib berildi va bandiligi taʼminlandi.

Forum doirasidagi barcha tadbirlar davlatimizning yoshlar manfaatlarini himoya qilish, ularga munosib turmush sharoitlari yaratish borasidagi gʻamxoʻrligining yorqin namunasi boʻldi.

O.RAJABOVA.