Fuqaroning murojaati oʻrganib chiqildi

Qoraqalpogʻiston Respublikasi Amudaryo tumani Farovon mahallasida yashovchi fuqaro Zulxumor Xudayberganovaning uy-joy masalasida internet orqali Prezidentga yoʻllagan videomurojaati tumandagi tegishli masʼullar tomonidan oʻrganib chiqildi.

Oʻrganishlar natijasida aniqlanishicha, tuman hokimligi tomonidan 2019-2021-yillarda arzonlashtirilgan uy-joyga muhtoj oilalar roʻyxati shakllantirilgan boʻlib, 2021-yil 24-may sanasida roʻyxat asosida Zulxumor Xudayberganovaning navbati kelgan. Mazkur fuqaro tuman hokimligiga amaldagi nizom asosida kerakli hujjatlarni taqdim etmagan. Zulxumor Xudayberganovaga bu haqida arizalarni koʻrib chiqishning oxirgi muddati tugashidan avval ogohlantirish xati yuborilgan.

Aytish kerakki, murojaatchiga tuman Mahalla va oilani qoʻllab-quvvatlash boʻlimi, Farovon mahalla fuqarolar yigʻini tomonidan ham muntazam ravishda har tomonlama yordam koʻrsatib kelingan. Xususan, Zulxumor Xudayberganova turmush oʻrtogʻi bilan qonuniy ajrashmaganligini inobatga olib, yarashtirish komissiyasi aʼzolari bir necha bor murojaatchini turmush oʻrtogʻi bilan yarashtirishga harakat qilganlar. Turmush oʻrtogʻi oilasi bilan birga yashash istagi borligini, shu maqsadda uy imoratini tiklaganligini, ajrashish niyati yoʻq ekanligini maʼlum qilgan. Shunga qaramasdan, Zulxumor Xudayberganova yarashish niyati yoʻqligini bildirgan.

Zulxumor Xudayberganova tumanimizdagi yordamga muhtoj ayollarni qoʻllab-quvvatlash maqsadida tuzilgan “Ayollar daftari”ga kiritilgan. Unga kasb-hunarga yoʻnaltirish orqali bandligini taʼminlash maqsadida tikuvchilik boʻyicha oʻqitilib, sertifikat berilgan. Qolaversa, tikuvchilik bilan shugʻullanishi, tikuv dastgohini sotib olish uchun kredit mablagʻlarini olishiga amaliy yordam berilgan.

Fuqaro Z.Xudoyberganovaga kelgusida ipoteka krediti asosida uy-joy sotib olishda boshlangʻich badalning bir qismini qoplash uchun "Uy-joy sotib olish uchun fuqarolarga subsidiya toʻlash tartibi toʻgʻrisida"gi nizom talablariga muvofiq maxsus komissiyaga hujjat topshirish tartibi tushuntirildi. Mazkur fuqaroning uy-joy kreditining qolgan qismini oʻz muddatida toʻlab borishi uchun doimiy daromadga ega boʻlishini taʼminlash maqsadida fuqaroning oʻzini va uning oʻgʻlini ishga joylashtirish choralari koʻriladi.

Tuman hokimligining Axborot xizmati.