“AYoLLAR DAFTARI”GA KIRITILGAN XOTIN-QIZLARGA TIKUV MAShINALARI BERILDI

Bugungi kunda Amudaryo tumanida ham Xalq deputatlari tuman Kengashining qarorlari asosida 370 nafar, ayol-qiz “Ayollar daftari” roʻyxatidan chiqarilgan. Bu mazkur roʻyxatga kiritilgan ayol-qizlarning 20,1 foizini tashkil qiladi. “Ayollar daftari”da roʻyxatda turgan ayol-qizlardan 287 nafariga kredit ajratish, 12 nafariga huquqiy yordam koʻrsatish, 74 nafariga psixologik maslahat berish orqali muammolari hal qilinishiga koʻmaklashildi.  Shuningdek, ushbu daftar roʻyxatida turgan ayol-qizlarga tuman «Ayollar daftari» jamgʻarmasi hisobidan moddiy yordamlar koʻrsatish yoʻlga qoʻyildi.

19-iyun kuni tuman Amudaryo tuman hokimi oʻrinbosari, tuman Mahalla va oilani qoʻllab-quvvatlash boʻlimi boshligʻi Alisher Yoʻldoshev boshchiligida boʻlim xodimlari Xitoy ovuli hududidagi “Ayollar daftari”ga kiritilgan ayol-qizlar holidan xabar olishdi. Yuzma-yuz oʻtkazilgan oʻzaro suhbat chogʻida ayollar muammolari tinglandi. Ularni hal etish boʻyicha tegishli vazifalar belgilab olindi. Shuningdek, masʼullar suhbat davomida tumanda kambagʻallikni qisqartirish va bandlikni taʼminlash borasida olib borilayotgan ijobiy ishlarni taʼkidlash bilan bir qatorda mavjud muammolarni bartaraf etish choralari haqida ham toʻxtalib oʻtishdi. Mahalla va oilani qoʻllab-quvvatlash boʻlimi tomonidan ushbu ayol-qizlarga oʻz oilalarini daromad bilan taʼminlashlariga koʻmaklashish maqsadida «Ayollar daftari» jamgʻarmasi hisobidagi mablagʻlardan olingan tikuv mashinalari topshirildi.

Tuman «Ayollar daftari» jamgʻarmasida jami 787 mln. 210 ming 400 soʻm miqdoridagi mablagʻlar shakllantirilgan boʻlib, shundan 129 mln. 850 ming soʻm mablagʻlar 265 nafar boquvchisini yoʻqotgan, ijtimoiy yordamga muhtoj 2-guruh nogironligi boʻlgan, qaramogʻida bir va undan ortiq I yoki II guruh nogironligi boʻlgan bolalari mavjud xotin-qizlardan har biriga 490 ming soʻmlik bir martalik yordam uchun sarflangan.

Tuman Mahalla va oilani qoʻllab-quvvatlash boʻlimi tomonidan Choykul ovulidagi “Ayollar daftarida” roʻyxatda turgan ishsiz  xotin-qizlardan 6 nafariga ham “Ayollar daftari” jamgʻarmasi mablagʻlari hisobidan olingan tikuv mashinalari berildi.

Aytish kerakki, noturar joylarda istiqomat qilayotgan, oʻzining yoki birgalikda yashovchi oila aʼzolarining nomidagi turar joy uchun 10 nafar ayol-qizga 26 mln. 460 ming soʻm miqdorida ijara kompensatsiyasi, uy-joyini taʼmirlashga muhtoj I guruh nogironligi boʻlgan 13 nafar ayolga 12 mln.740 ming soʻm miqdorida bir martalik moddiy yordam, tibbiy himoyaga muhtoj ehtiyojmand ayollarning 66 nafariga 65 mln. 660 ming soʻm miqdorida bir martalik moddiy yordam, 24 nafar ayol-qizga esa davolanish uchun 55 mln. soʻm miqdorida moddiy yordam,  ishsiz toifasidagi 30 nafar ayolga 120 mln. soʻm miqdoridagi mablagʻga  tikuv mashinasi berildi. “Ayollar daftari” jamgʻarmasidan jami 279 mln. 860 ming soʻm miqdorida moddiy yordam koʻrsatildi.

Qilichboy ovuli hududida ham “Ayollar daftari” roʻyxatida turgan xotin-qizlar bilan suhbatlar olib borilib, oilaviy sharoitlari, ehtiyoj va imkoniyatlari birma-bir oʻrganildi. Xotin-qizlarga yangi tikuv mashinalari topshirilib, shu orqali oʻz oilalariga daromad olib kirishlari, oʻzlari uchun yaratilgan bu imkoniyatlardan unumli foydalanib, turmush sharoitlarini yaxshilash yoʻlida ildam qadam tashlashga harakat qilish, yangi ish yaratish boʻyicha tavsiyalar berildi.

Taʼkidlash lozimki, tibbiy himoyaga muxtoj, ehtiyojmand 92 nafar ayollarni tibbiy koʻrikdan oʻtkazish va kerakli dori vositalarini sotib olish uchun bir martalik moddiy yordam pul mablagʻlari ajratilgan, huquqiy yordamga muhtoj 12 nafar ayollarga tegishli yuridik maslahat berilgan, psixologik maslahatga muhtoj 75 nafar ayollarga mutaxassislar tomonidan konsultatsiyalar tashkil etilgan.

“Ayollar daftari”ga kiritilgan xotin-qizlarni moddiy va maʼnaviy jihatdan qoʻllab-quvvatlash ishlari tizimli ravishda davom ettirilmoqda.

Muqaddas Beknazarova, tuman Mahalla va oilani qoʻllab-quvvatlash boʻlimi boshligʻi oʻrinbosari.