GIYoHVAND JAZOGA TORTILDI

Giyohvandlik insonni zalolatga yetaklovchi, ogʻir oqibatlarga olib keluvchi illatdir. Ushbu illat tufayli yosh umrlar xazon boʻlib, goʻdaklarga nogironlik tamgʻasi bosiladi, oilalar barbod boʻladi.
Fermer xoʻjaligi tashkil etib, binoyidekkina ishlab yurgan Karimjon (ismlar oʻzgartirilgan) birdan oʻzgarib qoldi. Oʻziga notanish boʻlgan moddani avval shunchaki qiziqib, isteʼmol qilib koʻrdi. Soʻng shunchalik qattiq oʻrgandiki, usiz turolmaydigan boʻldi.

Ammo har ishning oxiri boʻlganidek, uning ham qilmishi oshkor boʻldi. Kechki payt oʻziga tegishli boʻlmagan avtomashinada yaqinda uchratgan tanishi bilan  birgalikda giyohvand vositasi geroin moddasini oʻtkazish maqsadini koʻzlamay, qonunga xilof ravishda tayyorlamoqchi va isteʼmol qilmoqchi boʻlgan paytida qoʻlga tushdi.

Avtomashina tegishli tartibda koʻzdan kechirilganida, bir dona oq politilen paket ichiga oq-koʻk chiziqli oq rangli qogʻoz boʻlagiga oʻralgan qaymoq rangli oʻtkir hidli kukunsimon modda,  tibbiyot shpritsi ichiga solingan qaymoq rangli oʻtkir hidli kukunsimon vosita va qogʻoz boʻlagiga oʻralgan qaymoq rangli oʻtkir hidli kukunsimon modda hamda pullar borligi aniqlandi.

Oʻtkazilgan sud-kimyoviy ekspertizasining xulosasiga koʻra, bu moddalar geroin moddasi deb atalishi va uning sof ogʻirligi 0,41 grammga tengligi maʼlum boʻldi va  Karimjonning giyohvand modda qabul qilib kelganligi ham oʻz tasdigʻini topdi.

Shunga muvofiq, Karimjon oʻzining yuqoridagi jinoiy harakatlari bilan Oʻzbekiston Respublikasi JKning tegishli moddasida koʻrsatilgan jinoyatni qasddan sodir qilganlikda ayblandi.

Jinoiy ishlar boʻyicha Toʻrtkoʻl tumanida boʻlib oʻtgan ochiq sud majlisida Karimjonga  4-yil muddatga ozodlikdan mahrum qilish jazosi tayinlandi.

S. Davletmurodov, Qoraqalpogʻiston Respublikasi sudi sudyasi.