QIPChOQ ShAHARChASIDA “HOJI EShON BOBO” JOMEʼ MASJIDI BINOSI QURILIShIGA TAMAL TOShI QOʻYILDI
Yurtimizdagi tinchlik, osoyishtalik hamda muqaddas dinimiz, bebaho qadriyatlarimizni asrab-avaylashga boʻlgan davlat darajasidagi eʼtibor sabab, muqaddas qadamjolar, masjidlarimiz koʻrkam qiyofa kasb etmoqda. Aziz avliyolar, olim-u ulamolar qoʻnim topgan ziyoratgoh maskanlar obodonlashtirilib, ziyoratchilarga sharoitlar yaratilmoqda.
24-iyul kuni Qipchoq shaharchasidagi “Hoji eshon bobo” jomeʼ masjidi binosi qurilishini boshlash uchun tamal toshi qoʻyish marosimi oʻtkazildi. Marosimda Qoraqalpogʻiston Respublikasi Vazirlar Kengashi raisi oʻrinbosari Baxtjon Habibullayev, Qoraqalpogʻiston Respublikasi Qoziyati qozisi Shamsuddin Bahouddinov, tuman hokimi Sultonboy Yoʻldashev, “Yusuf eshon bobo” jomeʼ masjidi imom-xatibi Abdurahmon Matsafoyev va boshqa mutasaddilar, masjid jamoati ishtirok etdilar.
Tadbirda taʼkidlanganidek, Vazirlar Mahkamasining “Muqaddas qadamjolar, ziyoratgohlar, masjidlar va qabristonlarni obodonlashtirish ishlarini samarali tashkil etish toʻgʻrisida”gi qaroriga muvofiq hududlarda faoliyat yuritayotgan masjidlarning eski binolarini rekonstruktsiya qilish va taʼmirlash boʻyicha “Yoʻl xaritasi” tasdiqlangan boʻlib, unga koʻra hududlarda yangi masjidlar qurilmoqda. Eskilari qayta taʼmirlanib, yangidan rekonstruktsiya qilinmoqda. Qoraqalpogʻiston Respublikasi hududida yana 15 ta masjid ish boshlashi arafasida boʻlib, yangidan qurilayotgan masjidlar soni koʻpaymoqda.
Qipchoq shaharchasida joylashgan ushbu “Hoji eshon bobo” jomeʼ masjidi ham katta yoʻli yoqasida joylashgan boʻlib, mahalliy yoʻlovchilarning ibodatlarini ado etib olishlari uchun qulay joy hisoblanadi. Masjidning loy paxsadan tiklangan eski binosi 1989-yilda qurilgan boʻlib, 1-2 boʻlmadan iborat bu inshoot hozirgi kun talabiga javob bermaydi. Shu bois, olti sotixdan ortiq maydonda hashar yoʻli bilan tadbirkorlar va xayriya qiluvchilarning homiylik yordami hisobiga qurilayotgan yangi masjid 1000 kishini sigʻdira oladigan katta xonaqoh, namozxona, tahoratxona, qoʻshimcha maʼmuriy xonalardan iborat boʻlishi rejalashtirilgan. Qoʻshimcha 80 sotix yer maydonida esa obodonlashtirish va koʻkalamzorlashtirish maqsadida ignabargli, manzarali daraxtlar, butalar va gullar ekilishi, yashil maysalar bilan qoplanishi koʻzda tutilgan. Shuningdek, taxminiy qiymati 3,5 mlrd. soʻmga yaqin boʻlgan loyihaga koʻra qurilayotgan ushbu yangi binoni tabiiy gaz va elektr, aloqa tarmoqlariga ulash, ibodatchilar uchun qulay shart-sharoitlar yaratish ham koʻzda tutilgan.
Tadbirda qatnashchilar bugungi kunda masjidlar kundan-kunga obod boʻlayotgani, sharqona uslubda qayta qurilib, chiroyli koʻrinishga keltirilayotgani, namozxonlar uchun qulay sharoitlar yaratilayotgani, xalqimiz qulayliklarga ega, shinam masjidlarda emin-erkin ibodatlar qilayotganini mamnuniyat bilan eʼtirof etishdi.
Marosimda Qurʼon tilovat qilindi va yangidan qurilishi boshlanayotgan masjid tez orada bunyod boʻlishi, ularda moʻmin-musulmonlar ibodatlar qilishini soʻrab duolar qilindi. Duoga qoʻl ochganlar ushbu masjidning to qiyomatgacha Alloh taologa ibodat qilinadigan, tarovehlar, xatmi Qurʼonlar, zikr-u tasbehlar qilinadigan sajdagoh, moddiy va maʼnaviy obod maskanga aylanishini tiladilar. Shundan soʻng, yigʻilganlar duo va ezgu niyatlar bilan ramziy qoziqni qoqib, masjid qurilishiga oq fotiha berdilar.
Qipchoq shaharchasidagi Amudaryo daryosi ustida bunyod etilayotgan yangi va zamonaviy koʻprik yaqinida joylashgan ushbu masjid tumanda ziyorat turizmi rivojlanishini taʼminlaydigan maskanga aylanib, hudud aholisining ibodatlari, diniy-maʼrifiy bilimlari, dunyoqarashi kengayishi uchun xizmat qilishi shubhasiz.
Ozoda Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
