Amudaryo tumanidagi sektorlarda aholi murojaatlari boʻyicha sayyor qabullar oʻtkazildi

27-iyul kuni Amudaryo tumanidagi sektorlarda aholi murojaatlari boʻyicha sayyor qabullar tashkil etildi.

2-sektor hududidagi Doʻrman ovulida aholi muammolarini oʻrganish boʻyicha sayyor qabul oʻtkazildi. Sayyor qabulda tuman prokurori, sektor rahbari Javlon Muftullayev, muassasa va tashkilotlar masʼullari hamda ovul aholi vakillari ishtirok etdilar. Qabul jarayonida fuqarolardan 15 ga yaqin murojaatlar kelib tushdi. Murojaatlardagi masalalar ovuldagi yoʻllar, koʻpriklar, elektr simyogʻochlarini taʼmirlashga, banligini taʼminlashga, elektr hisoblagich oʻrnatishda, 20-sonli maktab kutubxonasi va oshxonasini taʼmirlash hamda faollar zali qurilishida, joy oʻrin olishda amaliy yordam berish mazmunida boʻldi. Murojaatlarni ijobiy hal qilish boʻyicha tegishli tashkilotlar bilan kelishib olindi.

Shuningdek, aholi muammolarini oʻrganish maqsadidagi sayyor qabul tumandagi 3-sektor hududiga qarashli Bobur ovulida ham tashkil etildi. Ovul fuqarolar yigʻini binosida oʻtkazilgan qabul jarayoniga aholi vakillari katta qiziqish bilan ishtirok etdilar. Mutasaddilar insonlarni qiynayotgan muammoli masalalarni tingladilar hamda muroaatlarni qabul qildilar. Sayyor qabulda tuman Ichki ishlar boʻlimi boshligʻi, sektor rahbari Ulugʻbek Xudayberganov, Oʻzbekiston Respublikasi Prezidentining tumandagi Xalq qabulxonasi mudiri Erkin Rajabov hamda aholi vakillari qatnashdilar.

Sayyor qabulda 31 nafardan ortiq fuqarolar murojaatlari koʻrib chiqildi. Qabul jarayonida ichki  ishlar, kadastr, yer, moddiy yordam, kredit, tibbiyot, bandlik  masalalari boʻyicha murojaatlar oʻrganildi. Muammoli masalalar tegishlicha hal qilinadigan boʻldi. Qator murojaatlar shu yerning oʻzida yechimini topdi. Jumladan, Muhabbat Abduxalikovaning 2-guruh nogironi boʻlgan farzandiga bir martalik moddiy yordam puli olish haqidagi, "Ayollar daftari" roʻyxatida turuvchi Nazokat Jumamuratovaning jismoniy imkoniyati cheklangan farzandiga kompyuter olib berishda amaliy yordam berish haqidagi murojaatlari shu kunning oʻzida ijobiy hal qilindi.

4-sektor hududidagi Navoiy mahallasida ham insonlarni qiynayotgan muammolarni oʻrganish boʻyicha sayyor qabul oʻtkazildi. Sayyor qabulda tuman Davlat soliq inspektsiyasi boshligʻi, sektor raxbari Aydos Seitov, tuman hokimining birinchi oʻrinbosari Maʼmur Temirbayev xamda masʼul idora va tashkilotlar mutasaddilari, aholi vakillari ishtirok etdilar.

Oʻtkazilgan sayyor qabulda aholini qiynab kelayotgan qator muammolar va turli sohalar boʻyicha takliflar oʻrganildi. Muammoli masalalar asosan ishsizlik, elektr taʼminoti, obodonlashtirish va ichki yullarni taʼmirlash mazmunida boʻlib, ularni ijobiy hal etish yuzasidan tegishli idora va tashkilotlarga topshiriklar berildi. Masʼullar aholi murojaatlarini joyiga chiqib, uyma-uy yurgan holda oʻrgandilar.

Tuman hokimligining Axborot xizmati.