YOʻL-TRANSPORT HODISASI MAHALLA FAOLLARI IShTIROKIDA MUHOKAMA ETILDI

Yoʻl qoidasi – umr foydasi, deb bekorga aytilmagan. Haqiqatan ham yoʻllarda yurish, faqat belgilangan joylardan kesib oʻtish,maxsus malakaga, haydovchilik guvohnomasiga ega boʻlmay turib avtomotransport vositalarini boshqarish qoidalariga qatʼiy amal qilgan inson hayoti uchun hech qanday xavf-xatar tugʻilmaydi. Aksincha, bu kabi qoidalarga eʼtiborsizlik bilan munosabatda boʻlgan inson ham, uning yaqinlari va atrofidagilar ham jiddiy zarar koʻrish bilan birga, oʻzgalar hayotini xavf-xatarga qoʻyishadi. Yoʻl qoidasiga amal qilmaslik oqibatida sodir etilayotgan yoʻl-transport hodisasi oqibatida begunoh insonlar bevaqt hayotdan koʻz yumayotganini hisobga olsak, yoʻl qoidasiga amal qilish harbir fuqaro uchun vazifalardan biri hisoblanadi.

Mangʻit shahrining Doʻstlik mahalla fuqarolar yigʻini binosida boʻlib oʻtgan yoʻl-transport hodisalarining oldini olishga bagʻishlangan yigʻilishda aynan ana shu masala, yaʼni yoʻl-transport hodisalari va ularning kelib chiqish sabablari atroflicha muhokama etildi.

Yigʻilishda tuman prokurori Javlon Muftullayev, tuman hokimi oʻrinbosari Mahmud Shermetov, prokuratura, Ichki ishlar boʻlimi masʼullari, ovul va mahalla fuqarolar yigʻinlarining oila va xotin-qizlar masalalari boʻyicha oʻrinbosarlari, tumandagi korxona va tashkilotlar rahbarlari, Doʻstlik va Yangiobod mahallalarida istiqomat qiluvchi aholi vakillari ishtirok etdilar.

Yigʻilishni Doʻstlik mahalla fuqarolar yigʻini raisi Ilmira Ismoilova ochdi va olib bordi hamda yigʻilish kun tartibidagi masala - Mangʻit shahrining Doʻstlik mahallasi hududida 2021-yil 10-iyul sanasida yuz bergan yoʻl-transport hodisasi va uning oqibatlari xususida qisqacha toʻxtalib oʻtdi.

Shundan soʻng, tuman Ichki ishlar boʻlimi boshligʻining soʻzga chiqib, 2021-yil 10-iyul kuni soat 10:00 larda  Amudaryo tumani Doʻstlik mahallasi hududida joylashgan chorrahada bir fuqaro tomonidan sodir etilgan yoʻl-transport hodisasi va unda jabr koʻrgan fuqaroning tan jarohatlari bilan tuman tibbiyot birlashmasida uzoq vaqt davolangani, ushbu yoʻl-transport hodisasini sodir etgan fuqaroning ham, jabrlanuvchi va uning oila aʼzolarining ham ancha qiyinchiliklarni boshlaridan oʻtkazishganlari haqida batafsil toʻxtalib oʻtdi. Mazkur holat yuzasidan tuman Ichki ishlar boʻlimi huzuridagi tergov boʻlinmasi tomonidan Oʻzbekiston Respublikasi Jinoyat Kodeksining tegishli moddasiga asosan jinoyat ishi qoʻzgʻatilganligi maʼlum qilindi.

Ushbu jinoyat ishi boʻyicha muhokamada ishtirok etgan mahalla masʼullari mazkur hodisa natijasida jabrlanuvchining oilasi qiyin holatda qolganligini, olgan tan-jarohati yuzasidan jabrlanuvchi va uning oila-aʼzolari azoblanganligini, kelgusida bunday holatlarning takrorlanmasligi hamda boshqa turdagi koʻngilsizliklar boʻlishining oldini olishda jamoatchilik vakillari tegishli masʼullar bilan birgalikda harakat qilishlari zarurligini, shuningdek, haydovchilar va piyodalar ham bu borada masʼuliyatli boʻlishlari yuzasidan tushuntirish ishlari olib borish foydali boʻlishini taʼkidladi.

Shundan soʻng, Amudaryo tuman ichki ishlar boʻlimi yoʻl harakati xavfsizligi boʻlinmasi boshligʻi, katta leylenant Dilshod Aminov  tuman hududida jinoyatchilikning barvaqt oldini olish va huquqbuzarliklarga qarshi kurashish boʻyicha bir qancha ishlar amalga oshirilayotganligini, olib borilayotgan ishlar natijasida tuman hududida umumiy jinoyatchilik oldingi yillarga qaraganda ancha kamayganini, bu boradagi profilaktik tadbirlarda mahalla faollari va keng jamoatchilik yaqindan yordam berib kelayotganligini va bundan keyin ham hamkorlik asosida ish yuritib, tumanimiz hududida jinoyatchilikning oldini olish yuzasidan olib borilayotgan ishlarni yanada takomillashtirish boʻyicha oʻz fikr-mulohazalarini bildirdi.

Shuningdek, yigʻilishda joriy yilning 3-avgust sanasida tumanimizning Oʻrta qalʼa ovuli hududida yashovchi yana bir yurtdoshimiz “Neksiya” rusumli transport vositasida Mangʻit-Gurlan yoʻlining 76-kilometrida gʻarbdan sharqqa tomon xarakatlanib borayotib yoʻlning piyodalar yoʻlakchasidan kesib oʻtayotgan yoʻlovchi, Bosuv mahallasida yashovchi fuqaroni urib yuborgani natijasida fuqaro ogʻir tan jarohati olib tuman tuman tibbiyot birlashmasiga yotqizilganini taʼkidladi.

Mazkur holat yuzasidan tuman tibbiyot birlashmasining birlamchi maʼlumotnomasiga koʻra fuqaro bosh miya ochiq jarohati, bosh miya lat yeyishi  ogʻir darajasi, oʻng boldir suyaklarining siljib sinishi, boshi, qoʻllari ezilib, jarohat olganligi va shifoxonada vafot etgani maʼlum qilindi. Mazkur holat yuzasidan ham Amudaryo tumani ichki ishlar boʻlimi tergov boʻlinmasi tomonidan Oʻzbekiston Respublikasi jinoyat kodeksining tegishli moddasiga asosan jinoyat ishi qoʻzgʻatilgan.

Yoʻl-transport hodisalari muhokamasiga bagʻishlangan yigʻilishda mahalla faollari ham soʻzga chiqishib, yoʻl harakati qoidalarini tartibga solish boʻyicha oʻzlarining fikr va mulohazalarini bildirib, Mangʻit shahrining ayrim koʻchalari, xususan, Berdaq nomli koʻchada piyodalar yoʻlakchasi yoʻqligini, ushbu markaziy koʻchada tirbandliklar koʻp boʻlishini aytishib, albatta markaziy koʻchalarda piyodalar yoʻlakchalari boʻlishi zarurligini, bundan tashqari, Mangʻit dehqon bozori roʻparasiga ham svetafor oʻrnatish maqsadga muvofiqligini taʼkidladilar.

Yigʻilishda muhokama etilgan masala yuzasidan bildirilgan fikr va mulohazalar atroflicha tahlil etilib, tegishli qaror qabul qilindi.

Robiya YOʻLDOShEVA.