Feruza Oʻrozmatova “Yilning eng yaxshi tarbiyachisi” koʻrik-tanlovining Oʻzbekiston Respublikasi bosqichida ishtirok etadi

Oʻz kasbining mohir ustasi boʻlishi uchun inson eng avvalo kasbiga mehr qoʻya olishi, sir-u sinoatlarini izchillik bilan oʻrganib maʼlum maʼnoda tajriba va uslub jihatidan ustuvorlikka erishishi joiz. Bunday natijaga jrishish uchun esa kasb egasidan oʻzi faoliyat yuritayotgan soha boʻyicha yuksak bilim va mahorat talab etiladi.

Bolaligidan kichkintoylarga mehri baland boʻlgan Feruza Oʻrozmatova tarbiyachilik kasbini tanlaganida koʻpchilik yaqinlari bolalarning injiqliklariga bardosh beraolarmikan, deya xavotirganishgan edi. Boz ustiga Feruzaxon 42-sonli maktabgacha taʼlim tashkilotida tarbiyachi sifatida ilk ish faoliyatini boshlagan yillarda nafaqat tumanimizdagi, balki butun mamlakatimizdagi maktabgacha taʼlim tashkilotilarida sharoitlar unchalik qoniqarli emas edi. Hatto bolajonlarning emin-erkin oʻynab, miriqib dam olishlari uchun ham sharoitlar koʻngildagidek emasdi.

Soʻnggi 4-5-yildirki, Prezidentimizning alohida eʼtiborlari tufayli maktabgacha taʼlim tashkilotlari faoliyatini takomillashtirish, sohani zamon talablari darajasida qayta isloh qilish boʻyicha Prezident Farmonlari, hukumat Qarorlari qabul qilinib, hayotga izchil tatbiq etilmoqda. Buni 42-sonli maktabgacha taʼlim tashkiloti faoliyatida ham yaqqol koʻrish mumkin.

Ayni kunda mazkur tashkilotda 4 ta guruhda 90 nafar bolajonlar taʼlim-tarbiya olishmoqda. Nafaqat tarbiyalanuvchilar, balki tarbiyachi va enagalar uchun ham zarur shart-sharoitlar yaratilgan.

Maktabgacha taʼlim tashkilotida yaratilgan shart-sharoitlardan unumli foydalangan holda oʻz bilimi va tajribasini muntazam oshirib borayotgan yosh, iqtidorli tarbiyachi Feruza Oʻrazmatova esa maktabgacha taʼlim tashkiloti tarbiyachilari oʻrtasida har yili oʻtkaziladigan turli koʻrik-tanlovlarning doimiy ishtirokchisigina emas, gʻolibi hamdir.

Bir necha yildan beri tumanda anʼanaviy tarzda oʻtkazilib kelinayotgan “Yil tarbiyachisi” koʻrik-tanlovida Feruzaxonga teng keladigani yoʻq. U joriy yilda ham mazkur koʻrik-tanlovning tuman bosqichi gʻolibligini qoʻlga kiritib, joriy yilning 1-, 2-, 3-avgust kunlari boʻlib oʻtgan Qoraqalpogʻiston Respublikasi bosqichida ham muvaffaqiyatli ishtirok etdi.

Asosiy beshta shart boʻyicha oʻz bilim va iqtidorlarini, kasbiy mahoratlarini amalda namoyon etgan ishtirokchilar orasida yana Feruzaxonga omad kulib boqdi. 14 ta tumandan  90 nafar yosh tarbiyachilar  ishtirok  etgan mazkur koʻrik-tanlovning Qoraqalpogʻiston Respublikasi bosqichida Feruza Oʻrozmatova “Eng chevar qoʻllar ustasi” yoʻnalishi boʻyicha faxrli 1-oʻrinni egalladi va “Yilning eng yaxshi tarbiyachisi” koʻrik-tanlovning Oʻzbekiston Respublikasi bosqichida ishtirok etish huquqini qoʻlga kiritdi. Albatta, Feruzaxon uchun bu muvaffaqiyat osonlikcha kelmadi. U oʻz sohasi boʻyicha uslubiy qoʻllanmalarni chuqur oʻzlashtirdi, ustozlari tajribasini puxta oʻrgandi. Ayniqsa, bolalar psixologiyasi boʻyicha mustaqil izlanishlar olib bordi va barcha oʻrganganlarini amaliyotga tatbiq etdi.

“Yilning eng yaxshi tarbiyachisi” koʻrik-tanlovining Qoraqalpogʻiston Respublikasi bosqichi gʻolib va sovrindorlariga tanlov tashkilotchilari tomonidan faxriy yorliqlar, esdalik  sovgʻalari topshirildi. Feruza esa koʻrik-tanlovning mamlakat bosqichida ham tumanimiz, ham Qoraqalpogʻiston Respublikasi sharafini munosib himoya qilib, tanlovning mutlaq gʻolibi boʻlish maqsadida qizgʻin tayyorgarlik koʻrmoqda.

Biz ham Feruzaxon Oʻrozmatovaning galdagi bellashuvlarda ham gʻoliblik tojini kiyishiga tilakdoshmiz.

Robiya YOʻLDOShEVA.