XITOY OVULIDA DAVLAT XIZMATLARI MARKAZINING FILIALI ISh BOShLADI

Xitoy ovulidagi fuqarolar yigʻini maʼmuriy binosi qayta taʼmirlanib, foydalanishga topshirildi. Ushbu binoda Davlat xizmatlari markazi filiali ham tashkil etildi.

Shu munosabat bilan boʻlib oʻtgan tadbirda Davlat xizmatlari agentligining Qoraqalpogʻiston Respublikasi boshqarmasi boshligʻi M.Abdijaliyev hamda tuman hokimi S.Yoʻldashev soʻzga chiqib, mamlakatimizda amalga oshirilayotgan islohotlar xususida soʻz yuritdilar.

Shuningdek, tuman faollari nomidan T.Abdullayev nutq soʻzlab, bu kabi bunyodkorlik ishlari yurtimizning yanada taraqqiy etishida muhim ahamiyat kasb etishi xususida toʻxtaldi.

Mamlakatimizdagi davlat xizmatlari markazlari tomonidan olis hududlarga chiqib, sayyor davlat xizmatlarini koʻrsatish amaliyoti yoʻlga qoʻyilgan boʻlib, tuman Davlat xizmatlari markazi joriy yilning shu davriga qadar 3 mingga yaqin davlat xizmatlarini sayyor tartibda amalga oshirgan.

Davlatimiz rahbarining “Davlat xizmatlari koʻrsatish milliy tizimini jadal rivojlantirish boʻyicha qoʻshimcha chora-tadbirlar toʻgʻrisida”gi Farmoniga koʻra, shaharchalar, qishloqlar va ovullardagi mahallalarda Davlat xizmatlari markazlari filiallarini bosqichma-bosqich tashkil etish belgilab berildi.

Mazkur hujjat asosida tuman markazidan 22 km. olisda joylashgan Xitoy ovulida ham Davlat xizmatlari markazi filialining tashkil qilinishi hududda istiqomat qiluvchi aholining uzogʻini yaqin, ogʻirini yengil, vaqtini hamda moddiy xarajatlarini tejash imkonini beradi.

Tadbirda soʻzga chiqqanlar Xitoy ovulida tashkil etilgan Davlat xizmatlari markazi filialining samarali faoliyat yuritishida muvaffaqiyat tiladilar.

Hashar – elga yarashar

Tumanimizda umumxalq Xayriya hashari uyushqoqlik bilan OʻTKAZILDI

Joriy yilning 21-avgust sanasida mamlakatimizda umumxalq obodonlashtirish xayriya hashari oʻtkazilib, yurtimiz boʻylab barcha hududlarda obodonlashtirish va tozalash ishlari amalga oshirildi.

“Yangi Oʻzbekistonda erkin va farovon yashaylik!” shiori ostida oʻtkazilgan xayriya hasharida aholining barcha qatlamlari ishtirok etib, yurtimiz obodligi va farovonligiga oʻz hissalarini qoʻshdilar.

Tumanda “Mahallalarni obodonlashtirish” oyligida samarali ishlar tashkil qilinib, obodonlashtirish xayriya hashari doirasida mahallalar, aholi yashash xonadonlari, koʻp qavatli uylar atroflari, guzar va xiyobonlar, ziyoratgoh va qabristonlar, bolalar maydonchalarida keng koʻlamli obodonlashtirish  va koʻkalamzorlashtirish ishlari olib borildi.

Shuningdek, hashar ishtirokchilari tomonidan tumanimizdagi yordamga muhtoj, boquvchisini yoʻqotgan oilalar, yolgʻiz yashovchi hamda nogironligi boʻlgan fuqarolar, keksalar holidan xabar olinib, ularning yashash sharoitlari yaxshilanib, uy-joylarini taʼmirlashga koʻmaklashildi. Mahalla faollari boshchiligida ehtiyojmand kishilarning taʼmirtalab holga kelib qolgan uy-joylarini taʼmirlash ishlari olib borildi, uylari ohaklab berildi.

Ulugʻ ayyom kunlari arafasida amalga oshirilgan bu kabi xayrli ishlar xalqimizning eng ezgu anʼanalaridan biriga aylangan. Koʻngli oʻksik hamyurtlarimiz bu kabi eʼtibor va gʻamxoʻrlikdan gʻoyat xursand boʻldilar hamda masʼullarga minnatdorchilik bildirdilar.

Tuman hokimligining Axborot xizmati.