UMUMTAʼLIM MAKTABLARIGA “KITOBLAR KARVONI” KIRIB BORDI

Prezidentimiz Shavkat Mirziyoyev yoshlar maʼnaviyatini yanada yuksaltirish maqsadida ilgari surgan 5 ta muhim tashabbusning biri yoshlar oʻrtasida  kitobxonlik muhitini yaratish, intellektual bilimdon yoshlarni shakllantirishda kitobning ahamiyatini yanada oshirish, ularni kitob oʻqishga qiziqtirish va shu orqali mustaqil fikr-mulohaza yurituvchi insonlar boʻlib yetishishlarini taʼminlashdan iboratdir.

Shu maqsadda soʻnggi yillarda umumtaʼlim muassasalari huzuridagi kutubxonalar faoliyatini yanada jonlantirish, oʻquvchi-yoshlar oʻrtasida kitobxonlik tadbirlari, koʻrik-tanlovlarini tashkil etish orqali ularning intellektual salohiyatini yuksaltirishga alohida eʼtibor qaratilmoqda.

Tumanimizda ham umumtaʼlim maktablarining oʻquvchi-yoshlari oʻrtasida turli mavzularda kitobxonlik kechalari, “Men sevgan adib”, “Mening  sevimli asarim”, “Eng yoqimli abadiy asar qahramoni”, “Zamonamiz qahramonlari haqidagi eng yazshi asar” mavzularida insholar tanlovlari oʻtkazilib, gʻoliblar maʼnaviy jihatdan ragʻbatlantirib borilmoqda. Shu barobarida umumtaʼlim maktablari huzuridagi kutubxonaar, elektron kutubxonalar har yili yangi-yangi adabiyotlar bilan boyitib borilayotgani bois, kitobsevar yoshlar safi tobora ortmoqda.

Joriy  2021-2022 oʻquv yilida ham oʻquvchi-yoshlarning kitobga boʻlgan maʼnaviy ehtiyojini qondirish, oʻzlari sevgan yozuvchilarning kitoblarini hech muammosiz mutolaa qilishlarini taʼminlash maqsadida tuman Xalq taʼlimi boʻlimi tomonidan “Kitoblar karvoni” tadbiri oʻtkazildi. Umumtaʼlim maktablaridagi kutubxonalar kitob jamgʻarmalarini  yanada boyitishni koʻzlab amalga oshirilgan ushbu tadbir davomida oʻquvchi-yoshlar jahon va mumtoz oʻzbek adabiyoti namoyondalari, shuningdek hozirgi zamon oʻzbek hamda qardosh xalqlar adabiyotlarining taniqli vakillari ijod namunalaridan bahramand boʻlishdi.

Tadbir jarayonida “Kitoblar karvoni” kirib bormagan bironta ham umumtaʼlim maktabi qolmadi. Tuman Xalq taʼlimi boʻlimi mudiri Akmal Ismoilov hamda Xalq taʼlimi boʻlimining darsliklar boʻyicha uslubchisi Ozod Qidirboyevlar ishtirokida amalga oshirilgan tadbir jarayonida 3 ming 260 ta badiiy va ilmiy-maʼrifiy kitoblar 87 ta umumtaʼlim maktablari kutubxonalariga bepul tarqatildi.

Tadbirdan mamnun kutubxonalar aʼzolari boʻlgan oʻquvchi-yoshlar xalqimizning sevimli farzandi, yirik davlat va jamoat arbobi hamda jahonda taniqli yozuvchi Sharof Rashidov hayoti va serqirra faoliyati, ijod yoʻli haqida hikoya qiluvchi asarlar, shuningdek, qoraqalpoq bolalar adabiyoti durdonalari bilan yaqindan tanishish maqsadida kitoblar tanlab oldilar.

Bugungi kunda  umumtaʼlim maktablarining barchasida kutubxonalar kitobsevar yoshlar bilan hamisha gavjum boʻladi. Ayniqsa, qoraqalpoq bolalar adabiyoti namunalari, shuningdek, oʻzbek, rus, qozoq adabiyoti durdonalarini sevib mutolaa qilinadi.

Darhaqiqat, kitob – bilim bulogʻi, kitob – kelajak shamchirogʻi. Oʻz hayotini kitob bilan doʻst-u qadrdonlikda oʻtkazuvchi inson, shubhasiz, barcha orzulariga yetishadi. Chunki, kitob orqali yoshlikda egallangan bilim toshga oʻyilgan naqsh kabi aslo oʻchmasdir.

Risolat IBRAGIMOVA.