OYBEK NOMLI MAHALLADA FHDYo MASʼULLARINING SAYYoR UChRAShUVI OʻTKAZILDI

Mamlakatimizdagi Fuqarolik holatlarini qayd etish boʻlimlari faoliyatida eksterritorial tamoyilning joriy etilishi munosabati bilan fuqarolarga va yuridik shaxslarga doimiy  yashash joyidan, joylashgan yeridan qatʼiy nazar, istalgan hududda murojaat qilish imkoniyati yaratildi. Mazkur tizim aholiga koʻrsatiladigan xizmatlarning sifat jihatidan yaxshilanishini va osonlashishini taʼminlamoqda.

Amudaryo tumanidan ham Fuqarolik holatlarini qayd etish boʻlimi tomonidan bu boradagi ishlar samarali yoʻlga qoʻyilgan. Boʻlim tomonidan hududlarga borgan holda aholi bilan uchrashuvlar oʻtkazilib, mazkur tamoyil asosida fuqarolarga hujjatlashtirish ishlarida koʻmak berilmoqda.

1-oktyabr kuni Oybek nomli mahallada ham sayyor uchrashuv oʻtkazilib, tizim faoliyatini takomillashtirish borasida amalga oshirilayotgan chora-tadbirlar haqida maʼlumot berildi. Uchrashuvga tashrif buyurgan fuqarolarga shu yilning 1-iyunidan etiboran fuqarolarning doimiy roʻyxatdan oʻtgan joyidan qatʼiy nazar fuqarolik holati dalolatnomalarini qayd etish, nikohlanuvchi shaxslarni tibbiy koʻrikdan oʻtkazish va xorijga chiqish biometrik pasportini rasmiylashtirish eksterritorial tamoyil asosida amalga oshirilayotgani aytib oʻtildi. Shuningdek, notarial xizmatlarni amalga oshirish jarayonida ham fuqarolik holati dalolatnoma yozuvlari bilan bogʻliq barcha maʼlumotlar notarial idoralari tomonidan davlat xizmatlari agentligi yoxud Fuqarolik holati dalolatnomalarini qayd etish organlariga murojaat qilmasdan mustaqil ravishda, fuqarolardan ortiqcha maʼlumot talab etmasdan, “FHDYoning yagona elektron arxivi” axborot tizimi orqali olinayotgani maʼlum qilindi.

Taʼkidlanganidek, Prezidentimizning 2018-yildagi “Fuqarolik holati dalolatnomalarini qayd etish tizimini yanada takomillashtirish chora-tadbirlari toʻgʻrisida”gi Qaroriga asosan tuman hududida qonuniy nikohdan vaqtida oʻtmasdan yashayotgan fuqarolar, vaqtida farzandlariga tugʻilganlik hamda yaqinlarining oʻlimi  haqida guvohnomalarini hujjatlashtirmagan eʼtiborsiz, beparvo oilalar bilan uchrashuvlar oʻtkazilib, tushuntirishlar berilgan. Oʻtgan davr mobaynida jami  9 ta tugʻilganlik haqidagi, 6 ta oʻlim haqidagi, oʻz vaqtida qayd qilinmagan 101 ta oilaning nikoh guvohnomalari rasmiylashtirilgan.

Hozirgi kunda muddatida qayd qilinmasdan qolgan fuqarolik holati dalolatnomalarini oʻz vaqtida qayd qilishda davlatimiz tomonidan koʻpgina imkoniyatlar yaratib kelinmoqda. Eksterritorial tamoyil asosida fuqarolarning doimiy va vaqtincha roʻyxatdan oʻtgan joyidan qatʼiy nazar fuqarolik holati dalolatnomalarini qayd etish, nikohlanuvchi shaxslarni tibbiy koʻrikdan oʻtkazish va xorijga chiqish biometrik pasportini rasmiylashtirish amalga oshirilmoqda. Tumanimizda boshqa hududlardan kelgan 8 ta hujjat eksterritorial tartibda joʻnatildi hamda 7 ta hujjat tuman Fuqarolik holatlarini qayd etish boʻlimi tomonidan fuqarolarga boshqa viloyatlardan olib berildi. Buning natijasida fuqarolarimizning ogʻiri yengil boʻlib, ortiqcha ovoragarchiliklarining oldi olinmoqda.  

Uchrashuv davomida mahalla fuqarosi Murodboy Saidovga 1990-yilda vafot etgan, oʻlimi ayrim sabablarga koʻra  qayd qilinmasdan qolgan  buvisi Ayim Karabayevaning oʻlimi tegishli hujjatlar asosida rasmiylashtirildi va guvohnoma tegishli shaxsga topshirildi.

Boʻlim masʼullari mahalla fuqarolari tomonidan berilgan savollarga batafsil javoblar berib, hujjatlarni rasmiylashtirish tartibini tushuntirishdi. Mahalla fuqarolar yigʻini masʼullari va faollari huquqiy bilimlarini boyitib, tushunchalarini kengaytirishda koʻmak bergan boʻlim xodimlariga minnatdorchilik bildirishdi.

M.Eshmuradova, tuman FHDYo boʻlimi inspektori.