“KEKSALAR HAFTALIGI” DOIRASIDA XAYRIYa TADBIRLARI OʻTKAZILDI

Yurtimiz boʻylab, barcha hududlarda “Keksalarni eʼzozlash, ularga hurmat-ehtirom koʻrsatish – xalqimizga xos ezgu fazilat” degan gʻoya ostida “Keksalar haftaligi” doirasidagi tadbirlar oʻtkazilmoqda. Joʻshqinlik va yuqori kayfiyatda boshlangan haftalik davomida nuroniylar ishtirokida uchrashuvlar, sport musobaqalari va turli targʻibot tadbirlari tashkil etilmoqda.

Amudaryo tumanida ham “Keksalar haftaligi” doirasidagi tadbirlar boshlab yuborildi. Tuman Mahalla va oilani qoʻllab-quvvatlash boʻlimi hamda tegishli tashkilotlar hamkorligida oʻtkazilayotgan haftalik tadbirlarida elimiz keksalariga alohida eʼtibor va ehtirom koʻrsatilmoqda.

5-oktyabr kuni navbatdagi uchrashuv tadbiri Boʻston mahallasi hududidagi 98-sonli saylov uchastkasida tashkil etildi. Tadbirda 8-son Boʻston saylov okrugi deputati, Xalq demokratik partiyasi tuman Kengashi raisi Maqsud Saʼdullayev bir guruh keksa-nuroniylar bilan uchrashib, yaqinda boʻlib oʻtadigan Prezident saylovi, qonunchilikdagi oʻzgarishlar xususida soʻz yuritdi. Mahalla nuroniylari tomonidan berilgan savollarga koʻra tushuntirishlar berib, oʻzaro fikr almashishdi.

Undan tashqari, ushbu haftalikning “Keksa avlod vakillarining jamiyatdagi oʻrni va ijtimoiy faolligini yanada oshirish chora-tadbirlari toʻgʻrisidagi” Hukumat qaroriga koʻra tashkil etilganini,  har yili oktyabr oyining ilk haftasida keksalarni eʼzozlash, ularga hurmat-ehtirom koʻrsatishga qaratilgan tadbirlarni tashkil etish anʼanaga aylanganini aytib oʻtdi. Haftalik doirasida mehnat jamoalarida pensiyaga chiqish arafasida boʻlgan mehnat faxriylari taqdirlash va nafaqaga kuzatish tadbirlari oʻtkazilayotgani, shuningek, tadbirlar davomida keksa avlod vakillarining respublika boʻylab tarixiy shahar va ziyoratgohlarga sayohati uyushtirilishi, keksalarning muammolarini manzilli oʻrganish va bartaraf etishga ham alohida eʼtibor qaratish koʻzda tutilgani toʻgʻrisida maʼlumot berdi.

Shundan soʻng, tuman Mahalla va oilani qoʻllab-quvvatlash boʻlimi boshligʻi oʻrinbosari, “Nuroniylar” jamoatchilik kengashi raisi Bahodir Boltaboyev, “Nuroniylar” jamoatchilik kengashi raisi oʻrinbosari Bekman Allaberganov hamda Xalq demokratik partiyasi tuman Kengashi raisi Maqsud Saʼdullayevlar Boʻston mahallasida yashovchi nuroniy onaxonlar va otaxonlarning holidan xabar olishdi. Mahalla hududidagi yakka-yolgʻiz va oʻzgalar parvarishi muhtoj boʻlgan Rahimboy ota Jumaniyozov hamda front orti mehnat faxriysi Toʻlgʻon momo Nurimbetovalar xonadonlariga tashrif buyurib, oziq-ovqat mahsulotlari hamda esdalik sovgʻalarini topshirishdi.

Xayrli tadbirlar boshqa mahallalarda ham davom ettirilib, keksalar holidan xabar olindi. Tashkilotchilar Gulzor mahallasiga tashrif buyurib, hududda yashovchi nogironligi boʻlgan keksa Saʼdulla ota Mamutov xonadonida boʻlishdi va unga nogironlik aravachasi berishdi.

Doʻstlik mahallasi hududida ham xonadonlarga borilib, yakka yolgʻiz yashovchi va oʻzgalar parvarishiga muhtoj qariyalar bilan suhbatlashildi. Yakka oʻzi yashaydigan Rajab ota Rahimov, Jumaboy ota Xudoyorov, Kamol ota Yangaboyevlarga, shuningdek, Navoiy nomli mahalla hududidagi oʻzgalar parvarishiga muhtoj boʻlgan Xudoybergan ota Norimovlarga moddiy koʻmak sifatida pul mablagʻlari topshirildi.

Shu kuni Bogʻ mahallasida “Yangi Oʻzbekistonni barpo etishda nuroniylarning oʻrni” mavzusida nuroniy va keksa avlod vakillari hamda yoshlar oʻrtasida davra suhbati boʻlib oʻtdi. Suhbat davomida nuroniylar oʻzlarining hayotiy tajribalari haqida gapirib, bugungi tinch va osoyishta zamonning qadriga yetish, shu yurt ravnaqi uchun tinim bilmay mehnat qilish lozimligini taʼkidlashdi. Suhbat soʻnggida keksalar mamlakatimiz farovonligi va ravnaqi uchun duolar qildilar.

Kun oxirida “Keksalar haftaligi” doirasida bir guruh keksa avlod vakillari tuman markazidagi tarixiy Muzeyga sayohatga olib borildi va muzeydagi tarixiy yodgorliklar va eksponatlar bilan tanishtirildi.

Ozoda Xudoyberganova.