“OʻZARXIV” AGENTLIGI DIREKTORI AMUDARYo TUMANIDA SAYYoR QABUL OʻTKAZDI

Oʻzbekiston Respublikasi “Oʻzarxiv” agentligi direktori Ulugʻbek Yusupov Amudaryo tuman Davlat arxivida sayyor qabul oʻtkazdi.

4-oktyabr kuni  boʻlib oʻtgan ushbu sayyor qabulda Qoraqalpogʻiston Respublikasi Arxiv ishi boshqarmasi boshligʻi Maqset Qayipnazarov, tuman Davlat arxivi boshligʻi Bahodir Jumaniyozov, tegishli korxona-tashkilotlar, davlat organlari mutasaddilari va boshqalar ishtirok etishdi.

“Oʻzarxiv” agentligi direktori Ulugʻbek Yusupov dastlab yurtimizda arxiv hujjatlarini qamrab olish imkoniyati kengaytirilib, davlat arxivlarida saqlanayotgan hujjatlarning soni ortayotgani, tizimning moddiy-texnik bazasi ham bosqichma-bosqich rivojlantirilayotgani xususida soʻz yuritdi. Shuningdek, hududlardagi davlat arxivlarida barcha sharoitlar yaratilib, zamonaviy kompyuter texnikalari bilan jihozlanayotgani, tizim faoliyatini takomillashtirishga doir hukumat va Prezident qarorlari asosida ishdagi samaradorlik ortayotganiga keng toʻxtaldi.

Amudaryo tumani Davlat arxivida ham milliy arxiv fondi hujjatlarini toʻplash ishlariga alohida eʼtibor qaratilayotgani, arxiv fondida 2006-yildan hozirgi davrga qadar 220 ta fond mavjudligi, ularda milliy arxiv fondi tarkibga kiruvchi doimiy saqlanadigan 20417 ta hujjatlar, shaxsiy tarkibga oid 14606 ta, jami 35023  hujjatlar saqlanayotganligi qayd etildi.

Milliy arxiv fondi hujjatlarining davlat hisobi ilmiy maʼlumotlar apparatini tashkil etish va rivojlantirish, fondlar va hujjatlarni qabul qilish boʻyicha 2021-yilning oʻtgan davri davomida  doimiy va shaxsiy tarkibga oid 7 fondga 1232 ta hujjat qabul qilingani haqida maʼlumot berildi.

Davlat arxivida saqlanayotgan hujjatlarning mavjudligini va xatlovini tashkil qilish boʻyicha 2021-yilning oʻtgan davri davomida 700 dan ortiq hujjatlarning mavjudligi tekshirilgani aytib oʻtildi.

Tuman Davlat arxivi boshligʻi Bahodir Jumaniyozov shu paytga qadar tuman Davlat arxivida saqlanayotgan hujjatlar doirasida fuqarolardan ijtimoiy-huquqiy va mavzuli soʻrovlar boʻyicha jami 2081 ta murojatlar kelib tushganligi, shulardan 2056 ta murojaat koʻrib chiqilgani va barchasiga ijobiy javoblar berilgani haqida soʻzladi.

Shuningdek, arxiv hisobiga 2021-yilning shu kuniga  qadar pullik koʻrsatiladigan  xizmatlar boʻyicha hujjatlarni tartibga keltirish, arxiv sohasiga oid normativ hujjatlarni tayyorlash, hujjatlarni depozitar saqlovga qabul qilish, mavzuli soʻrovlar va boshqa yoʻnalishlar boʻyicha 75 mln. soʻm mablagʻ kiritilganini, ushbu mablagʻlar sohaning asosiy yoʻnalishlariga sarf qilinib kelinayotganini ham maʼlum qildi.

Sayyor qabul davomida jismoniy va yuridik shaxslar asosan pensiya, uy-joy masalalari boʻyicha murojaat qilishdi. Mazkur murojaatlar atroflicha oʻrganilib chiqildi va barchasiga ijobiy yechim topish choralari koʻrildi.

“Oʻzarxiv” agentligi direktori Ulugʻbek Yusupov Amudaryo tuman Davlat arxivida Prezidentimizning “Oʻzbekiston Respublikasida arxiv ishi va ish yuritishni takomillashtirish chora-tadbirlari toʻgʻrisida”gi Farmoniga asosan olib borilayotgan ishlar, binodagi yaratilgan shart-sharoitlar  bilan yaqindan tanishdi. Shuningdek, arxivda faoliyat olib borayotgan mutaxassislar bilan uchrashib, ularning arxiv sohasi boʻyicha qiziqtirgan savol va takliflarini oʻrgandi.

O.Xudoyberganova.