KEKSALAR HAFTALIGI DOIRASIDAGI TADBIRLAR BOBUR NOMLI OVUL VA AYoQChI MAHALLASIDA HAM DAVOM ETDI

Oʻtgan hafta Amudaryo tumanida “Keksalar haftaligi” doirasidagi tadbirlarga boʻy boʻldi.  Haftalik doirasida ovul va mahallalarda uchrashuvlar, salomatlik, xayriya tadbirlari, yangi binolarning ochilish marosimlari oʻtkazildi.

7-oktyabr kuni haftalik doirasida Bobur nomli ovulda yangidan taʼmirlangan fuqarolar yigʻini binosining ochilish marosimi boʻlib oʻtdi. Tadbirga hududdagi aholi, yoshlar, jamoatchlik vakillari, keksa avlod vakillari, nuroniylar, faxriylar ishtirok etdi.

Tadbirni tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshev ochib berdi va yigʻin masʼullarining kelgusi ishlarida zafarlar tiladi. Jumladan, haftalik munosabati bilan hududlarda oʻtkazilayotgan tadbirlar, keksa avlod vakillariga koʻrsatilayotgan eʼtibor va ehtirom haqida soʻz yuritdi.

Bobur nomli ovul fuqarolar yigʻini raisi Gulbahor Rayimova, fuqarolar yigʻini raisining Keksalar va faxriylar masalalari boʻyicha maslahatchisi Murodboy Soburovlar ham soʻzga chiqishdi hamda binoning taʼmirlanishida yaqindan koʻmak bergan tegishli tashkilotlar mutasaddilari va masʼullarga minnatdorchilik bildirishdi.

Shundan soʻng, mahalla faoli Davlatboy Xudoyberganov, “Qurilish xizmat” masʼuliyati cheklangan jamiyati rahbari Abror Tohirovlar soʻzga chiqib, fuqarolar yigʻini masʼullari va boshqalarni yangi binoning ochilishi bilan tabrikladilar. Yigʻin masʼullari va ovul aholisining kelgusi ishlarida yangi muvaffaqiyatlarni, yutuqlarni qoʻlga kiritishlariga tilakdoshlik bildirdilar.

Marosimda tuman Madaniyat boʻlimi havaskorlarining musiqiy dasturi tomoshabinlar eʼtiboriga havola etildi. Havaskorlar ijrosidagi kuy-qoʻshiqlar, raqslar bilan tadbirga yanada fayz kirdi.

Tadbir ovul hududidagi “Jasurbek” kafesida dasturxon atrofida davom ettirildi. Haftalik munosabati bilan tashkil etilgan ushbu tadbirning eng ardoqli mehmonlari ovul nuroniylari boʻlishdi. Ularga tadbir tashkilotchilari esdalik sovgʻalarini taqdim qilishdi.

Xuddi shunday tadbir Ayoqchi mahallasida ham tashkil etildi. Mahalla fuqarolar yigʻini raisi Allayor Qalandarov tashabbusi bilan hududdagi “Otalar choyxonasi”da oʻtkazilgan haftalik doirasidagi ochiq dasturxon atrofidagi tadbirga elning keksa nuroniy otaxonlari va onaxonlari tashrif buyurishdi.

Tadbirda ishtirok etgan “Nuroniylar” jamoatchilik kengashi raisi oʻrinbosari Bekman Allaberganov hamda tuman Mahalla va oilani qoʻllab-quvvatlash boʻlimi xodimi Bahriddin Toʻraboyevlar yurt fayzi boʻlgan keksa avlod vakillariga davlatimiz tomonidan koʻrsatilayotgan alohida eʼtibor, gʻamxoʻrliklar xususida soʻzlashdi.

Shuningdek, “Keksa avlod vakillarining jamiyatdagi oʻrni va ijtimoiy faolligini yanada oshirish chora-tadbirlari toʻgʻrisidagi” Hukumat qaroriga koʻra har yili oktyabr oyining ilk haftasi “Keksalar haftaligi” deb belgilangani, shu munosabat bilan keksalarni eʼzozlash, ularga hurmat-ehtirom koʻrsatishga qaratilgan tadbirlarni tashkil etish anʼanaga aylanganini aytib oʻtishdi. Noz-neʼmatlarga toʻla dasturxon atrofida kechgan samimiy suhbat bilan tadbir nihoyatda zavqli, mazmunli oʻtdi.

Tadbirda ishtirok etgan 70 nafarga yaqin keksa nuroniylar va faxriylarga milliy taom – osh tortildi. Mahallaning keksalari, mehmonlar oʻzlariga koʻrsatilayotgan eʼtibor va gʻamxoʻrliklar uchun davlatimizga, tashkilotchilariga minnatdorchiliklar bildirishdi va elimizda tinchlik barqaror boʻlishini, obod Vatanimiz yanada ravnaq topishini tilab, duolar qildilar.

Ozoda Xudoyberganova.