13-oktyabr – Xalqaro tabiiy ofatlar xavfini kamaytirish kuni

FAVQULODDA HODISALAR DOIMO HUShYoR VA SERGAK BOʻLIShNI TALAB ETADI

Maʼlumki, Birlashgan Millatlar Tashkiloti Bosh Assambleyasining 1992-yil 22-dekabrdagi rezolyutsiyasiga muvofiq, 1990-1999-yillar, yaʼni Xalqaro tabiiy ofatlar xavfini kamaytirish oʻn yilligi davomida oktyabr oyining ikkinchi chorshanbasi Xalqaro tabiiy ofatlar xavfini kamaytirish kuni sifatida nishonlanishi eʼlon qilindi.

2001-yilning 21-dekabr kuni Bosh Assambleyaning rezolyutsiyasi bilan anʼanani davom ettirishga va har yili kunni tabiiy ofatlar xavfini kamaytirish madaniyatini shakllantirish, jumladan tabiiy ofatlarning oldini olish, oqibatlarini yumshatish va ularga tayyorgarlikni taʼminlash vositasi sifatida nishonlanishga qaror qilindi. Shundan boshlab, har yili oktyabr oyining ikkinchi chorshanbasida dunyo hamjamiyati Xalqaro tabiiy ofatlar xavfini kamaytirish kuni nishonlana boshladi.

2009-yilning 21-dekabr kuni esa 13-oktyabr Xalqaro tabiiy ofatlar xavfini kamaytirish kuni deb eʼlon qilindi.

Hech bir mamlakat favqulodda vaziyatlardan toʻla kafolatlanmagan. Tabiiy ofatlarning katta-kichigi boʻlmaydi, u mavsum tanlamaydi. Ayrim mamlakatlarda jazirama issiq hukm sursa, baʼzi oʻlkalarda  kutilmaganda sel va suv toshqinlari yuz bermoqda. Qaysi bir davlatda yongʻin boʻlsa, boshqasida buning aksi boʻlmoqda. Yer silkinishi, koʻchki hodisalari ham koʻplab kuzatiladi. Joriy yilda ham dunyoning koʻpgina mamlakatlar tabiiy ofatlardan ancha jabr koʻrdi.

Birlashgan millatlar tashkiloti  Bosh Assambleyasi Xalqaro tabiiy ofatlar xavfini kamaytirish kunini oʻtkazish toʻgʻrisidagi rezolyutsiyasini bejiz qabul qilmagan.

Favqulodda vaziyat vaqt tanlamaydi. Favqulodda vaziyatlarning yuz berishiga, xususan, tabiiy ofatlarga tayyor turish, undan muhofazalanish qoidalarini yoshlikdan boshlab oʻzlashtirish joizdir. Ofatlar xavfini kamaytirish faoliyatini maktabdan boshlash kerakligi bejiz aytilmagan.

 Shuning uchun ham yuz berishi ehtimoli boʻlgan tabiiy ofatlarning oldini  olish va bartaraf etish, aholini favqulodda vaziyatlardan ogoh qilish borasida aksariyat davlatlar muhofaza tadbirlar oʻtkazib kelinmoqda.

Jumladan, mamlakatimizda ham har yili Xalqaro tabiiy ofatlar xavfini kamaytirish kuni keng nishonlanadi. Zero, respublikamiz maydonining katta qismi seysmik faol hududda joylashganligi, zilzila, sel va suv toshqinlari, tuproq va qor koʻchkilari, togʻlardan tosh tushishi hodisalari bogʻliq tabiiy ofatlar yuz berishi ehtimoli mavjudligi bizdan bu masalaga jiddiy eʼtibor qaratishni, doimo hushyor va sergak turishni talab etadi.

Begzod Tajiboyev, tuman FVB boʻlinma boshligʻi.