ONA TILIMGA

Oʻtgan asrlardan minnatdorman men,
Shu davr olim-u shoiridan ham.
Ajdodlar tufayli bugun avlodlar,
Ona til boyligin koʻrmoqda baham.

Onalarga rahmat allalar aytgan,
Ertaklar soʻylagan momolarga ham.
Barida bolalar uchun dunyoning,
Barcha-barcha sehr-u amallari jam.

Navoiy bobomdan minnatdorman men,
Imkoniyatin ochgan turkiy kalomning.
Shu sabab ushbu kun oʻzbekni tanir,
Sheʼriyat muxlisi butun olamning

Ona tilim, seni alqab yuraman,
Sheʼr oʻqib, qayerga yetsa oyogʻim.
Chunki sensan mening, toki hayotman,
Yoʻlim koʻrsatuvchi porloq mayogʻim!

Ahmad Nafasov. 21.10.2021