TUMAN XALQ QABULXONASI – MUAMMOLARNI HAL ETIShDA AHOLIGA YaQIN KOʻMAKChI

Xalq qabulxonalari aholining hayotiy muammolari tezkorlik bilan hal etilishida muhim ahamiyat kasb etmoqda. Olis hududlarda yashaydigan fuqarolarning ham ogʻiri yengil boʻlib, ertangi kunga boʻlgan ishonchi yanada ortmoqda. Qabulxonalarda fuqarolarning ariza va shikoyati belgilangan tartibda, xolislik tamoyillari asosida koʻrib chiqilayotgani, ijobiy hal etilayotgani mamlakatimizda inson huquq va manfaatlariga oliy qadriyat sifatida qaralayotganining yana bir yorqin ifodasidir.

Tuman Xalq qabulxonasi tomonidan ham aholi murojaatlari va muammolari bilan ishlash borasida samarali ishlar amalga oshirilib, xalqimizning davlatdan rozi boʻlib yashashi taʼminlanmoqda, ular uchun farovon turmush tarzi yaratilishiga yaqindan koʻmak berilmoqda.

Oʻtgan davr mobaynida tuman Xalq qabulxonasiga jismoniy va yuridik shaxslardan jami 966 ta murojaatlar kelib tushgan boʻlib, shundan, 846 tasi yozma, 103 tasi ogʻzaki, 10 tasi elektron va 7 tasi videokonferentsaloqa davomida kelib tushdi. Ularni qonunchilikka qatʼiy rioya qilgan holda, oʻz vaqtida, xolis koʻrib chiqish, jismoniy va yuridik shaxslarning huquq hamda erkinliklari, qonuniy manfaatlarini himoya qilish Qabulxona xodimlari zimmasidagi asosiy vazifalar sirasiga kiradi. Shu bois murojaatlardan birontasi eʼtibordan chetda qolmadi.

Ushbu murojaatlardan 906 tasi hududdagi tashkilotlarga, 39 tasi yuqori tashkilotga yuborilgan, qolgan 21 tasi Xalq qabulxonasida koʻrib chiqish uchun qoldirildi. Mazkur murojaatlarning 923 tasi, yaʼni 98 foizi qanoatlantirildi. Shundan, 844 tasiga ijobiy yechim topishga koʻmaklashildi, 78 tasiga huquqiy maslahat va maʼlumotlar berildi, 1 tasi uzoq muddatli nazoratga olinib, 22 tasiga asosli tushuntirishlar berildi. Qolgan 21 ta murojaatlar ayni paytda qoʻshimcha oʻrganish jarayonida.

Tuman Xalq qabulxonasiga jismoniy va yuridik shaxslardan eng koʻp kelib tushgan murojaatlar ish bilan taʼminlash, sogʻliqni saqlash, moddiy yordam va aliment undirish masalalaridir. Asosiy maqsad “Xalq davlat idoralariga emas, davlat idoralari xalqimizga xizmat qilishi kerak”, degan tamoyilni hayotda qaror toptirishdan iborat boʻlgan tuman Xalq qabulxonasi tomonidan aholini qiynayotgan bunday masalalar yechimiga koʻmaklashish maqsadida oʻtgan davr mobaynida tumandagi sektor rahbarlari ishtirokida jami 137 marotaba sayyor qabullar tashkil etildi. Qabullar davomida 226 nafar fuqaro tomonidan 236 ta murojaatlar kelib tushgan boʻlib, shundan, 179 ta murojaat qanoatlantirildi. Qolgan 51 nafar fuqaroning murojaatlariga asosli tushuntirish berildi, 6 nafar fuqaroning murojaati tegishli tashkilotlar tomonidan oʻrganib chiqilmoqda.

  Undan tashqari, tumandagi kam taʼminlangan, “Temir daftar” va “Ayollar daftari”ga kiritilgan extiyojmand oilalarni holidan xabar olish kabilar ham amalga oshirildi. Bunday tadbirlar davomida 51 ta oila farzandlariga yangi oyoq kiyimlar, 21 ta oilaga oziq-ovqat mahsulotlari va bir martalik pul mablagʻlari berildi.

  Shu bilan birga, tumandagi 3-sektor rahbari bilan hamkorlikda Jumurtov shaharchasi hududida eski bino qayta taʼmirlab berilib, joriy yilning iyun oyidan boshlab, tikuv tsexi tashkil qilindi. Bugungi kunda mazkur tikuv tsexi faoliyati yoʻlga qoʻyilib,  15 nafardan ortiq xotin-qizlarning bandligi taʼminlandi.

Aytish joizki, tumandagi Xalq qabulxonasi davlat organlari bilan aholi oʻrtasida ochiq muloqotni yoʻlga qoʻyish, dolzarb muammolarni aniqlash, murojaatlar qonuniy va sifatli koʻrib chiqilishini taʼminlashda alohida oʻrin tutib aholining eng yaqin koʻmakchisiga aylandi. Mazkur tashkilot xalqimizning hayotdan rozi boʻlishi uchun yanada keng imkoniyat va shart-sharoitlar yaratishga xizmat qilmoqda.

E.Rajabov, tuman Xalq qabulxonasi mudiri.