OLIY MAJLIS QONUNChILIK PALATASI DEPUTATLARI TUMANIMIZNING YaShIL HUDUDI KENGAYIShIGA HISSA QOʻShDILAR

Mamlakatimizda Prezidentimiz tomonidan ilgari surilgan “Yashil makon” umummiliy loyihasi doirasida koʻchat ekish zarbdor 40 kunligi davom etmoqda. Koʻchalar, yashil maydonlarga, korxona-tashkilotlar, oʻquv muassasalari atroflariga, ariqlar boʻylariga mevali va manzarali daraxtlar, butalar koʻchatlarini ekish, chor-atrofda havo musaffoligini taʼminlaydigan koʻkalamzorlar barpo etish ishlari olib borilmoqda.

Tumanimizda ham bu umummilliy harakati tufayli daraxt koʻchatlari ekish ishlariga ulkan eʼtibor qaratilmoqda.

Shu yilning 30-noyabr kuni Oʻzbekiston Respublikasi Oliy Majlis Qonunchilik palatasi deputatlari Zumrad Bekatova, Ruslan Jumamurodovlar tumanimizga tashrif buyurdilar va Mangʻit shahrining “Olmazor” mahallasi Barkamol avlod koʻchasi boʻyidagi “Yashil hudud” uchun ajratilgan maydonga mevali, manzarali daraxtlar, koʻpyillik butalar koʻchatlarini oʻtqazishdi. Ular bilan birga tuman hokimi Sultonboy Yoʻldoshev, Xalq  deputatlari tuman Kengashi deputatlari hamda keng jamoatchilik bu harakatda faol ishtirok etdilar.

Maʼlumki, Oliy Majlis Qonunchilik palatasi deputatlari joriy yilning 26-noyabridan 1-dekabrga qadar hududlardagi ijtimoiy-iqtisodiy ahvol, fuqarolarning turmush sharoitlarini oʻrganish, joylarda mavjud muammolarni aniqlash va kechiktirmasdan hal etish maqsadida joylarda boʻlib, fuqarolar bilan jonli muloqotlar tashkil qilishi rejalashtirilgan edi.

Mazkur reja asosida Zumrad Bekatova va Ruslan Jumamurodovlar Qilichboy ovulida joylashgan, Zumrad Bekatova taʼlim olgan 15-sonli maktabga tashrif buyurdilar. Ularni maktab oʻqituvchilar jamoasi va oʻquvchilar musiqa sadolari ostida non-tuz bilan shodon qarshi oldilar.

Maktab oʻquvchilari masʼullar tashrifidan minnatdorligini sheʼrlar, qoʻshiqlar bilan ifoda etdilar. Zumrad Bekatova va Ruslan Jumamurodovlar oʻzlariga bildirilgan hurmat-ehtirom uchun minnatdorchilik bildirib, hozirgi kunda oʻquvchi-yoshlarning bilim olishlari va intillektual salohiyatini rivojlantirishlari uchun ulkan imkoniyatlar yaratilayotganligi, yoshlar bundan unumli  foydalanishlari lozimligini taʼkidladilar, maktab kutubxonasi ahvoli bilan qiziqib, oʻquvchilarni koʻproq kitob oʻqishga chorladilar.

Samimiy, ochiq muloqot tarzida oʻtgan uchrashuvda 15-sonli maktab oʻqituvchisi Goʻzal Bekmurodova maktabda variativ sinf tashkil etganligini, biroq sinfga Beshovul, Yuqori qishloq mahallalaridan oʻquvchilarning  qatnashi qiyin boʻlayotganini, bu muammoni hal etish uchun ushbu hududlarga yoʻnalishli transport qatnovini yoʻlga qoʻyishda yordam soʻradi.

Shuningdek, Qilichboy ovuli koʻchalariga, xususan, maktab atrofiga tungi chiroqlar oʻrnatish lozimligi taʼkidlandi.

Deputat oʻqituvchining va boshqa fuqarolarning murojaatlarini hal qilishga amaliy yordam berishga vaʼda berdi.

Ovul aholisi oʻzlarining hayotidagi muammolarni oʻrganish uchun tashrif buyurgani uchun Oliy Majlis Qonunchilik palatasi deputati, shu ovulda oʻsib, voyaga yetgan Zumrad Bekatovaga chuqur minnatdorlik bildirdi.

Oygul RAJABOVA.