JUMURTOV ShAHARChA VA NAMUNA MAHALLA FUQAROLAR YIGʻINLARINING YaNGI QURILGAN XIZMAT BINOLARI FOYDALANIShGA TOPShIRILDI
Yurtimizda mahalla tizimiga berilayotgan katta eʼtibor hamda soha xodimlariga qulay shart-sharoitlar yaratib berish borasida keng koʻlamli islohotlar amalga oshirilmoqda. Soʻnggi davrlarda eng chekka hududlarda ham qator fuqarolar yigʻinlarida xizmat binolari yangidan qurilib, zamonaviy koʻrinishga keltirilib, foydalanishga topshirilmoqda.
Amudaryo tumanida ham bu borada alohida eʼtibor qaratilib, ovul va mahalla fuqarolar yigʻinlarining maʼmuriy binolari qaytadan taʼmirlanib, xodimlarga qulay sharoitlarda xizmat qilishlariga imkoniyat yaratilmoqda. Qator ovul va mahallalarning xizmat binolari yangi qiyofa kasb etib, hudud koʻrkiga koʻrk qoʻshilmoqda, ishdagi samaradorlik ham ortmoqda.
1-dekabr kuni Jumurtov shaharchasida fuqarolar yigʻini yangi xizmat binosining ochilish marosimi boʻlib oʻtdi. Tantanali marosimda tuman Mahalla va oilani qoʻllab-quvvatlash boʻlimi boshligʻi Alisher Yoʻldoshev, oʻrinbosari Bahodir Boltaboyev hamda tuman hokimligi mutasaddilari, fuqarolar yigʻinlari xodimlari va faollari ishtirok etdilar.
Jumurtov shaharcha fuqarolar yigʻini bugungi kunga qadar oʻz binosiga ega emas edi. Shu sababli “Obod qishloq” dasturi doirasida shaharcha fuqarolar yigʻiniga zamonaviy loyiha asosida yangi bino qurildi. Ushbu loyihani amalga oshirish uchun mahalliy byudjet mablagʻlaridan jami 340,1 mln. soʻm mablagʻ ajratildi.
Ochilish marosimida soʻzga chiqqanlar avvalo barcha ishtirokchilarni qoraqalpoq tiliga davlat tili maqomi berilgan kun bilan samimiy tabrikladilar. Shundan soʻng, davlatimiz rahbari tomonidan mahalla tizimiga berilayotgan yuksak eʼtibor natijasida soʻnggi yillarda fuqarolar yigʻinlari uchun qulay shart-sharoitlar yaratib berilayotganligini alohida qayd etib oʻtishdi. Shuningdek, tadbirda ishtirok etgan shaharcha nuroniylari va faollari ham ushbu maskanning hudud aholisi uchun juda muhim ekanligini, bu orqali odamlarga qator qulayliklar yaratilganligini taʼkidlashdi.
Tadbir davomida ishtirokchilar bu yerda fuqarolar yigʻini xodimlariga yaratilgan shart-sharoitlar bilan yaqindan tanishdilar.
Shu kuni tumandagi Namuna mahalla fuqarolar yigʻinida ham yangidan qurib bitkazilgan xizmat binosi foydalanishga topshirildi. Shu munosabat byuilan oʻtkazilgan ochilish marosimida ham tuman Mahalla va oilani qoʻllab-quvvatlash boʻlimi boshligʻi Alisher Yoʻldoshev, oʻrinbosari Bahodir Boltaboyev hamda tuman hokimligi mutasaddilari, fuqarolar yigʻinlari xodimlari va faollari ishtirok etdilar.
Marosimda soʻzga chiqqanlar “Obod qishloq” dasturi doirasida Namuna mahalla fuqarolar yigʻini binosi mukammal taʼmirlangani, bunga jami 283,8 mln. soʻm mablagʻ ajratilgani xususida maʼlumot berishdi. Namuna mahalla fuqarolar yigʻiniga Qoraqalpogʻiston Respublikasi Mahalla va oilani qoʻllab-quvvatlash vazirligi tomonidan 3 komplekt yangidan mebel jamlanmasi berilganini mamnuniyat bilan eʼtirof etishdi. Shuningdek, mazkur mahalla binosi aholiga uzoq yillar xizmat qilib, fuqarolarning oʻzlarini qiziqtirgan barcha masalalarda murojaat qiladigan manzilga aylanishini taʼkidlab oʻtishdi.
Mazkur hududlarda yangi va zamonaviy koʻrinishdagi fuqarolar yigʻini binolari qurilgani, qoraqalpoq tili bayrami kuni foydalanishga topshirilgani u yerda istiqomat qilayotgan aholini nihoyatda mamnun qildi.
O.Xudoyberganova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
