XALQARO NOGIRONLAR KUNI MUNOSABATI BILAN TADBIR OʻTKAZILDI

Mamlakatimizda keksalar va nogironligi boʻlgan shaxslarni ijtimoiy himoya qilish va qoʻllab-quvatlash masalasiga alohida eʼtibor qaratilmoqda. Buni ushbu yoʻnalishda amalga oshirilayotgan chora-tadbirlarda ham koʻrishimiz mumkin.

Har yili 3-dekabr sanasida Xalqaro nogironlar kunining nishonlanishidan asosiy maqsad – butun dunyoda amalga oshiriladigan dastur va loyihalarda nogironligi boʻlgan shaxslar boshqa kishilar bilan teng huquqlilik asosida ishtirok etishini, ularning manfaatlari, huquqlari inobatga olinishini, barcha mamlakatlarda nogironlarning qadr-qimmatini himoyalovchi qonunlarning joriy etilishini taʼminlab, barcha uchun ochiq va doʻstona boʻlgan jamiyat qurishdan iboratdir.

Ayni paytda tumanimizda 4 079 nafar nogironligi boʻlgan shaxslar, 86 nafar oʻzgalar parvarishiga muhtoj kishilar, 42 nafar yolgʻiz pensionerlar istiqomat qilishadi. Aholi salomatligini muhofaza qilishga, nogironlikning oldini olishga va nogironligi boʻlgan shaxslarning jamiyat bilan uygʻunlashib ketishi uchun shart-sharoitlar yaratishga, ularda sadoqat va fidoyilik, shukronalik tuygʻularini shakllantirishga qaratilgan keng koʻlamli ishlar olib borilmoqda.
Shu yilning 3-dekabrida Mangʻit shahrida joylashgan “Nur” toʻyxonasida Xalqaro nogironlar kuniga bagʻishlangan tadbir boʻlib oʻtdi. Unda Nogironlar jamiyati tuman boʻlimi,  Koʻzi ojizlar jamiyati tuman boʻlimi hisobida turuvchi, yakka-yolgʻiz yashovchi imkoniyati cheklangan 50 nafar fuqarolar ishtirok etdilar.

Toʻkin dasturxon atrofidan joy olgan nogironligi boʻlgan fuqarolarni tuman hokimi oʻrinbosari Mahmudjon Shermetov, Mahalla va oilani qoʻllab-quvvatlash boʻlimi boshligʻi oʻrinbosari Muqaddas Beknazarova, Nogironlar jamiyati tuman boʻlimi boshligʻi Nilufar Xolboyeva, Qoʻngʻirot tuman Koʻzi ojizlar jamiyati raisi Maxset Qilichevlar bayram bilan qizgʻin qutladilar.

Tuman hokimligi tashabbusi bilan tashkillashtirilgan bayram tadbirida mehmonlarga xalqimizning milliy taomi – palov tortildi.

Shuningdek, sovgʻa-salomlar bilan bir qatorda qoʻltiqtayoq, tayoq, aravacha, eshitish moslamasi kabi zarur protez ortopediya vositalari ham topshirildi.

Tadbirda tuman Madaniyat boʻlimi tomonidan tayyorlangan maxsus kontsert dasturi namoyish etildi.

Shuningdek, tuman axborot – kutubxona markazi xodimlari tomonidan “Hech kim mehr-eʼtibordan chetda qolmaydi” shiori ostida kitoblar koʻrgazmasi tashkil etildi, kitobsevar imkoniyati cheklangan mehmonlarga kitoblar sovgʻa qilindi.

Bu kabi xayrli ishlarning amalga oshirilishida katta maʼno bor. Chunki davlatimiz siyosatida ham, muqaddas dinimizda ham inson eng aziz va mukarram sanaladi. Koʻngli yarim, imkoniyati cheklangan insonlarga quvonch ulashish, ularning bayram kunlarida bir dasturxon atrofida oʻtirib, samimiy suhbatlashishlari, diydorlashishlari uchun imkoniyat yaratish ham savobdir.

Oygul RAJABOVA.