OʻZBEKISTON KONSTITUTsIYaSI – BARQAROR TURMUSh ASOSI

Mustaqillik yillarida jamiyatni harakatga keltiruvchi kuch hisoblanmish inson huquqlarini himoya qilishga qaratilgan keng koʻlamli islohotlar amalga oshirildi. Mamlakatimiz Asosiy Qonuni – Konstitutsiyasida xalq  hokimiyatchiligi printsipining muhim qoidalaridan biri sifatida inson, uning hayoti, erkinligi, shaʼni, qadr-qimmati va boshqa daxlsiz huquqlari oliy qadriyat hisoblanishi belgilab qoʻyildi.

Konstitutsiyamizning “Shaxsiy huquq va erkinliklar” deb nomlangan VII bobi, “Siyosiy huquqlar” deb nomlangan VIII bobi, “Iqtisodiy va ijtimoiy huquqlar” deb nomlangan  IX bobida fuqarolarning shaxsiy, siyosiy, iqtisodiy va ijtimoiy huquq va erkinliklari hamda ularning kafolatlari belgilab berilgan. Xususan VII bobida insonning shaxsiy huquq va erkinliklari belgilangan boʻlib, ular tizimida fuqarolarning ularning huquq va manfaatlariga daxldor boʻlgan hujjatlar, qarorlar va boshqa materiallar bilan tanishib chiqish huquqi muhim ahamiyat kasb etadi. Bu orqali fuqarolar boshqa konstitutsiyaviy huquqlarini amalga oshirish uchun oʻzlariga sharoit yaratadilar.

Umuman olganda, Oʻzbekiston Respublikasi Oliy Kengashining 1992-yil 8-dekabrda boʻlib oʻtgan oʻn birinchi sessiyasida qabul qilingan mamlakatimiz Asosiy qonuni – Konstitutsiyamiz irqi, dini, jinsi va mavqeidan qatʼiy nazar, barcha fuqarolar uchun shu goʻzal va jannatmakon yurtda yashash, ilm olish, munosib sharoitlarda mehnat qilish, keksayganda va mehnat layoqatini yoʻqotganda ijtimoiy taʼminot olish, malakali tibbiy xizmatdan foydalanish imkonini yaratgan. Qisqa qilib aytganda, har bir fuqaro oʻz konstitutsiyaviy huquqlaridan foydalangan holda emin-erkin  va baxtiyor yashash imkoniga ega. Uning shaxsiy daxlsizlik huquqiga rahna solishga hech kim haqli emas.

Fuqarolik shaʼni, mavqei yuksak maqomlarda ifodalangan Konstitutsiyamizni shu boisdan ham mamlakatimizning barcha fuqarolari qadrlaydi, hurmat qiladi. 8-dekabr – Konstitutsiyamiz qabul qilingan kun har yili mamlakat boʻylab keng tantana qilinishi ham bejiz emas.

Barcha yurtdoshlarimizni bayram bilan qutlab, oilalariga tinchlik-omonlik, baxtiyorlik tilayman.

Q.ATAMURODOV,

Fuqarolik ishlari boʻyicha tuman sudi raisi.