3 gektar maydonga 6 ming tupdan ziyod tut koʻchatlari oʻtqazildi

“Yashil makon” umummilliy loyihasi asosida  Amudaryo tumanidagi korxona va tashkilotlar oʻquv muassasalari rahbarlari hamda mehnat jamoalari, jamoatchilik faollari saʼy- harakatlari bilan yangi-yangi koʻchatzorlar paydo boʻlmoqda. Ariq va yoʻllar boʻylarida yuzlab manzarali va mevali daraxt nihollari qatorlari saf tortib, atrof-muhit tobora  obodonlashib bormoqda.

Yaqinda Oʻzbekiston Respublikasi Ekologiya partiyasi raisi Narzulla Oblomurodov hamda Oʻzbekiston Respublikasi Ekologiya partiyasi Qoraqalpogʻiston Respublikasi Kengashi raisi Oysanam  Begimovalar tumanimizga tashrif buyurib, “Yashil makon” umummilliy loyihasi doirasida amalga oshirilayotgan ishlar bilan  yaqindan tanishdilar. Shu bilan birga, mehmonlar Mangʻit shahrining soʻlim goʻshalaridan biri – Olmazor mahallasi hududida barpo etilayotgan deputatlar bogʻini borib koʻrdilar hamda deputatlar bogʻiga koʻchat ekdilar.

Amudaryo tumanining ovul va mahallalarida “Yashil makon” umummilliy loyihasi asosida amalga oshirilayotgan ishlar izchillik bilan davom ettirilmoqda. Xususan, tumanning Bobur nomli ovul fuqarolar yigʻini hududidagi 760-konturdan 3 gektar yer ajratilib, yoshlar agentligi tuman boʻlimi xodimlari ishtirokida ushbu yerga 6 ming  tupdan ziyod tut koʻchatlari oʻtqazilib, yangi tutzor barpo etildi. Yangi tutzorni barpo etish jarayonida “Qoraqalpoq Agropilla” masʼuliyati cheklangan jamiyati bosh agronomi Rohatoy Oʻrozimbetova ham ishtirok etib, tut koʻchatlarini  oʻtqazish boʻyicha amal qilinadigan agrotexnik tadbirlar yuzasidan zarur tavsiyalar berdi.

Joriy 2021-yil kuz mavsumida Amudaryo tumanidagi pillachilik tarmogʻiga ega fermer xoʻjaliklari hududidagi avvaldan mavjud boʻlgan tutzorlar mutaxassislar tomonidan puxta oʻrganilib, mazkur tutzorlardagi kasallangan va qurigan tut daraxtlari olib tashlandi. Ularning oʻrniga hamda fermer xoʻjaliklari hududlaridagi ariqlar boʻyiga dalalar chetlariga ekish uchun “Jayxun Silk” masʼuliyati cheklangan jamiyati tomonidan Amudaryo tumani iqlim sharoitiga mos va serhosil, tez yetiluvchi tut koʻchatlari oʻtqazildi.

Umuman olganda, Amudaryo tumanida pillachilik sohasini yanada rivojlantirish, mavjud tutzorlarda kuzgi-qishgi agrotexnik tadbirlarni samarali tashkil etishga qaratilgan mavsumiy ishlar davom ettirilmoqda. 2021-yil kuz mavsumida 710 ming tup yangidan tut koʻchatlari ekish rejalashtirilib, shu asosda  amaliy ishlar olib borildi. Pillachilik tarmogʻiga ega fermer xoʻjaliklari hududlarida “Har qarich yerda yangi nihol undiramiz”, “Yurtimizni yashil makonga aylantiramiz!” shiori ostida 411 ming tupdan ziyod tut nihollari sifatli qilib ekildi. Bundan tashqari, har bir ekilgan tut niholining tuproqqa ildiz qoʻyib, unib-oʻsib ketishi uchun masʼul ishchilar biriktirilib, kuz mavsumi davomida yangidan barpo etilgan tutzorlarda oʻz vaqtida agrotexnik tadbirlar amalga oshirildi. Tutchilik boʻyicha mutaxassislar tavsiyalari asosida yangidan ekilgan koʻchatlarning ildizlari qishda zararlanmasligi uchun koʻchatlar oʻtqazilgan chuqurlar tuprogʻi  yaxshilab zichlandi.

Ayni kunlarda ham yer yuzasi muzlamasidan avval tutzorlardagi qurigan tut daraxtlari kovlab olinib, oʻrniga yangi nihollar oʻtqazish ishlari amalga oshirilmoqda.

Robiya YOʻLDOShEVA.