“OʻZBEKISTON YoShLAR FORUMI – 2021”: AMUDARYo TUMANIDAGI TADBIRLARDA YoShLAR FAOL IShTIROK ETDI
Yurtimizda yoshlarning gʻoya va takliflarini eshitish uchun maydon yaratish, zamon qahramonlarini kashf etish, ularning ilmiy va ijodiy salohiyatini roʻyobga chiqarish va mamlakatdagi yangilanishlarga faol jalb qilish maqsadida 18-dekabrdan 25-dekabrgacha «Oʻzbekiston yoshlari forumi – 2021» boʻlib oʻtishi maʼlum qilingan edi. Shunga koʻra mamlakatimizning barcha hududlarida forum doirasidagi tadbirlarga yoshlarni jalb qilish ishlari boshlab yuborildi.
Amudaryo tumanida ham yoshlarni ushbu forumga jalb etishga bagʻishlangan tadbirlar tashkil etildi va ularda yoshlarning faol ishtiroki taʼminlandi.
15-dekabr kuni boʻlib oʻtgan ushbu tadbirlar dastlab Doʻstlik mahallasidan “Sogʻlom turmush uchun 5000 qadam” ommaviy piyoda yurish aktsiyasi bilan boshlandi. Koʻtarinki kayfiyat bilan boshlangan tadbirda tuman Turizm va sport boʻlimi, Tibbiyot birlashmasi, Ichki ishlar, Madaniyat, Xalq taʼlimi boʻlimlari, umumtaʼlim maktablaridan 500 nafarga yaqin xodimlar va yoshlar ishtirok etishdi. Hokimlik binosiga karnay-surnay sadolari ostida yetib kelgan aktsiya ishtirokchilari salomatlik mashgʻulotlari, jismoniy tarbiya mashqlarini bajarishdi.
Shundan soʻng, yoshlar tuman hokimligi binosi oldida Shimoli-gʻarbiy harbiy okrugi harbiy orkestr hamda faxriy qorovul qismi, tumandagi DXX chegara qoʻshinlariga qarashli 9202 harbiy qism harbiylari, tuman Madaniyat boʻlimi, Xalq taʼlimi boʻlimi tomonidan tashkil etilgan orkestr va harbiy xizmatchilarning koʻrgazmali chiqishlarini tomosha qilish uchun tashrif buyurdilar. Harbiy texnikalar, qurol-aslahalar, xizmat hayvonlarini yoshlar juda katta qiziqish bilan tomosha qildilar. Harbiy xizmatchilar ularga qurollarni qismlarga ajratish va yigʻish tartibi, xizmat hayvonlarini boqish va ularni jangovarlikka tayyorlash haqida batafsil tushunchalar berishdi. Yoshlar harbiy ansambl, orkestr ijrosidagi harbiycha kuy va qoʻshiqlarni maroq bilan tinglab, kompozitsion dasturlarni tomosha qildilar.
Bir guruh faol yoshlar Olmazor mahallasidagi Yoshlarlar bogʻiga tashrif buyurib, “Yashil makon” umummilliy loyihasi doirasida 200 tup daraxt koʻchatlarini ekishdi. Ushbu ezgu va xayrli ishlarda 50 nafarga yaqin yoshlar ishtirok etdilar. Maʼlumki, loyiha doirasidagi koʻchat ekish ishlarida yoshlar hamjihatlikda ishtirok etishmoqda. Yaqinda tumanning Bobur nomli ovul fuqarolar yigʻini hududidagi 760-konturdan 3 gektar yerga Yoshlar agentligi tuman boʻlimi xodimlari, faol yoshlar ishtirokida 6 ming tupdan ziyod tut koʻchatlari oʻtqazilib, yangi tutzor barpo etildi. Yangi tutzordagi nihollarni yoshlar astoydil parvarish qilib, muhim agrotexnik tadbirlarni amalga oshirishdi.
Tadbirlar Yangiobod mahallasi hududida joylashgan sunʼiy qoplamali mini futbol stadionida davom ettirilib, tuman Turizm va sport, Yoshlar ishlari agentligi, Mahalla va oilani qoʻllab-quvvatlash boʻlimlari tomonidan sportning futbol turi boʻyicha musobaqalar tashkil qilindi. Musobaqalarda tumandagi 50 nafar sportsevar yoshlar ishtirok etib, mahoratlarini namoyish etdilar. Qizgʻin oʻtgan musobaqalarda gʻolib boʻlgan jamoa tashkilotchilar tomonidan faxriy yorliqlar va sovgʻalar bilan ragʻbatlantirildi.
Koʻtarinki kayfiyatda oʻtayotgan tadbir ishtirokchilari tuman Madaniyat markazi foyesida tashkil etilgan “Besh tashabbus” koʻrgazmasiga tashrif buyurishdi. Koʻrgazmada umumtaʼlim va kasb-hunar maktablarida tahsil olayotgan yoshlarning besh tashabbus doirasida amalga oshirayotgan ishlari, yaʼni yosh qalamkashlar tomonidan chizilgan suratlar, chevar qizlar tikkan yumshoq oʻyinchoqlar, turli kiyimlar namoyish etildi. Yosh kitobxonlar uchun kitoblar koʻrgazmasi tashkil etilib, ularga turfa va qiziqarli kitoblar haqida maʼlumotlar berildi. Bunday kitoblardan bahramand boʻlish uchun tumandagi Axborot kutubxona markaziga aʼzo boʻlish kerakligi tushuntirilib, istak bildirgan kitobxon yoshlar mazkur maskanga taklif etildi.
Shundan soʻng, tadbirkorlikka qiziquvchi yoshlar “Muvaffaqiyatga erishish sirlari” mavzusidagi mahorat darsiga taklif etildi. Tadbirkorlikka koʻmaklashish markazi tuman boʻlimi tomonidan tashkil qilingan ushbu tadbirda taniqli, oʻz sohasida yuksak natijalarga erishayotgan tadbirkor - "KUSHMAG" brendining asoschisi Marat Kumekov tomonidan yoshlarga biznes sirlari haqida maʼlumotlar berilib, tushunchalari kengaytirildi. Qizgʻin kechgan dars davomida tijorat banklaridan kredit olish, turli yoʻnalishdagi tadbirkorlikni yoʻlga qoʻyish kabilar boʻyicha yoshlarni qiziqtirgan savollarga batafsil javoblar berildi.
Madaniyat markazida milliy liboslar koʻrgazmasi ham oʻtkazildi. Koʻrgazmada yosh dizaynerlar tomonidan yaratilgan zamonaviy bichimdagi milliy va zamonaviy liboslar namoyish etildi. Ushbu tadbirda yoshlar dizaynerlarning mahorati, sharqona qadriyatlarning zamonaviy kiyinish meʼyorlari bilan uygʻunligi, kiyinish madaniyati, milliy va zamonaviy ruh uygʻunlashgan betakror didni yaqqol his qildilar. Modalar namoyishi, zamonaviy va milliy liboslar koʻrgazmasi ishtirokchilarda yorqin taassurot qoldirdi.
Forum doirasidagi tadbirlar barcha yoshlarga nihoyatda manzur boʻldi va ruhan koʻtarinkilik baxsh etdi.
Jasur Davletov, Yoshlar agentligi tuman boʻlimi boshligʻi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
