Prokuratura organlari xodimlari kuni oldidan targʻibot tadbirlari oʻtkazildi

Prakuratura organlari vazirliklar, davlat qoʻmitalari, idoralar, fuqarolarning oʻzini oʻzi boshqarish organlari, jamoat birlashmalari, korxonalar, muassasalar, tashkilotlar, hokimlar va boshqa mansabdor shaxslar tomonidan qonunlarning ijro etilishi ustidan nazorat qiluvchi organ hisoblanadi. Prokuratura organlari tomonidan jamiyatda qonuniylikni mustahkamlash, qonun ustuvorligini taʼminlash, jinoyat va huquqbuzarliklarning oldini olish, umuman, barcha yoʻnalishlarda salmoqli ishlar qilinmoqda va muhim natijalarga erishilmoqda.

Mamlakatimizda ushbu organ faoliyatini tashkil etish, qoʻllab-quvvatlashga doir bir qancha huquqiy-meʼyoriy hujjatlar qabul qilingan.  Xususan, 1992-yil 8-yanvarda Oʻzbekiston Respublikasi Prezidentining “Oʻzbekiston Respublikasi prokuratura organlari toʻgʻrisida”gi farmoni qabul qilindi. Ushbu sana prokuratura organlarida xizmat qiladigan barcha xodimlar, jumladan, faxriylar qalbidagi orzu-umidlar roʻyobga chiqqan sanadir. 2016-yildan buyon 8-yanvar prokuratura organlarining kasb bayrami sifatida keng nishonlanib kelmoqda.

Shu munosabat bilan ayni kunlarda Respublikamizning barcha hududlarida  prokuratura organlari tomonidan  bayramoldi  targʻibot tadbirlari, insholar tanlovlari, konferentsiyalar oʻtkazilmoqda.

Shunday tadbirlardan biri 23-dekabr kuni Amudaryo tumanidagi 9-sonli Bolalar musiqa va sanʼat maktabida ham boʻlib oʻtdi. Tadbirda Amudaryo tumani prokurori Javlonbek Muftullayev, tuman hokimining Yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Mahmud Shermetov, Mahalla va oilani qoʻllab-quvvatlash boʻlimi boshligʻi Alisher Yoʻldashev, Xalq taʼlimi boʻlimi mudiri Akmal Ismoilov, Yoshlar ishlari agentligi Amudaryo tuman boʻlimi boshligʻi Jasur Davletov hamda muassasa rahbarlari, tegishli tashkilot masʼullari, umumtaʼlim maktabi oʻquvchilari qatnashdilar.

Tadbir avvalida Amudaryo tumani prokurori Muftullayev Javlonbek soʻzga chiqib,  mamlakatimizda soʻnggi yillarda amalga oshirilayotgan ishlar natijasida prokuratura isloh qilinib, jazolovchi organ emas, balki tom maʼnoda inson huquq va erkinliklari himoyasini taʼminlovchi idoraga aylanganini, butun faoliyat tizimli muammo va kamchiliklarni aniqlab bartaraf etishga yoʻnaltirilayotganligini, prokuratura organlari xodimlari xalq bilan bevosita muloqot qilib, ularning muammolarini joyida hal etishayotganligini taʼkidlab oʻtdi. Bu boradagi ishlar ayniqsa, prokurorlarning oʻzlari biriktirilgan sektorlardagi faoliyatlarida yanada yaqqol namoyon boʻlayotir.

Shuningdek, sektor rahbarlari ham soʻzga chiqib, prokuratura xodimlari tomonidan tumanda qonun ustuvorligini  taʼminlash, adolatni qaror toptirish borasida qilinayotgan ishlar alohida eʼtirofga sazororligini va bu borada tinimsiz mehnat qilayotgan xodimlarning oʻrni katta ekanligini alohida taʼkidladi.

Tadbirda kelgusida huquqni muhofaza qiluvchi organlarda ishlashni niyat qilgan oʻquvchilarga tavsiyalar berildi.

Shundan soʻng, tumandagi kam taʼminlagan oilalarning 50 nafar bolalariga prokuratura tomonidan Yangi  yil sovgʻalari topshirildi.

Tadbir yakunida mutassaddi tashkilot rahbarlari hamda ishtirokchilar prokuratura organlari xodimlarini kasb bayrami bilan tabriklab, oliyjanob xalqimizning haqiqiy himoyachisi, adolat va qonuniylik posboni boʻlib, xalq manfaati yoʻlida sidqidildan xizmat qilishlarida muvafaqqiyatlar  tiladilar.

Fotima Eshimbetova