FIRIBGAR AYoL JAZOGA MAHKUM ETILDI

Oʻzganing ishonchiga kirib, mulkini talon-taroj qilish, yaʼni firibgarlik ogʻir jinoyatlardan biri hisoblanadi. Ushbu jinoyat uchun qonunlarga koʻra javobgarlik belgilangan.

Shunga qaramasdan Nukus shahrida yashovchi Nazira (ismlar oʻzgartirilgan) firibgarlikni “kasb” qilib oldi. Hatto buning uchun sud hukmiga koʻra 5 marotaba jazoga tortildi. Lekin bu unga kor qilmadi. Navbatdagi jazo muddatini oʻtab kelganidan soʻng, toʻgʻri yashash oʻrniga yana “kasb”ini davom ettira boshladi. Oʻlja izlab yurgan kunlarining birida uning uyiga boshqa viloyatda yashovchi Sanamjon va uning dugonasi oʻz oyogʻi bilan kirib keladi.

Sanamjon dugonasi bilan qoʻshni davlatdagi oliy taʼlim muassasasida oʻqiydigan nevaralarini yurtimizdagi oʻquv dargohlaridan biriga koʻchirish kerakligini aytganida shunday sodda odamlarning koʻpligidan, ishi oson koʻchganidan juda xursand boʻldi. Bu ish qoʻlidan kelmasligini aytsa, oʻzi kelgan “moʻmay daromad”dan bebahra qolishini oʻylab, darhol ishga kirishdi. Vaʼdalarni kattadan berib, ayollarning ishonchiga kirdi. Sarf-xarajatlarga deb Sanamjondan  10 mln. soʻm pul, dugonasidan esa 17 mln. soʻm pul olishga muvaffaq boʻldi. Qoʻshni davlatdagi oʻquv yurtida qizlarini oʻqitayotgan Yusufjon ham aldovlarga uchib, 50 mln. 600 ming soʻm pulni firibgarga osongina berib yubordi. Ruxsora ismli ayol esa farzandining oʻqishini koʻchirishiga ishonib, Naziraga 1050 AQSh dollari miqdorida pul beradi.

Nazira osongina “daromad” topayotganiga xursand boʻlib, yana jinoyat sodir qilayotganini unutdi. Ammo ishi bitmagandan keyin aldanganini tushunib yetgan ushbu fuqarolar huquqni muhofaza qilish organlaridan yordam soʻrashdi. Firibgar ayol jinoyat sodir qilganlikda ayblanib, yana jazoga mahkum etildi.

U.Orazbayeva, Nukus shahar IIO FMB 1-son IIB huzuridagi Tergov guruhi tergovchisi.