NURONIYLAR UChUN TADBIR OʻTKAZILDI

Mamlakatimizda hech bir soha vakili eʼtibordan chetda qolayotgani yoʻq. Buning isbotini esa yangidan qabul qilinayotgan qonun va qarorlardan yaqqol koʻrishimiz mumkin.

2017-yil avgustda qabul qilingan Qonunga muvofiq dekabr oyining ikkinchi yakshanbasi “Oʻzbekiston Respublikasi qishloq xoʻjaligi xodimlari kuni” qilib belgilandi. Shuningdek, qishloq xoʻjaligi xodimlarining jamoa-shartnomaviy hujjatlarda mehnat xavfsizligi darajasini koʻtarish, ish oʻrinlarida sanitar-gigiyenik vaziyatni yaxshilash, xodimlarni yakka tartibdagi va jamoaviy himoya vositalari, sanitar-maishiy xonalar bilan taʼminlash, mehnat muhofazasi qoidalariga rioya etish masalalariga alohida eʼtibor qaratilmoqda.

Ha, halol, mashaqqatli mehnatlari evaziga xalqimizning rizqini butun, dasturxonini toʻkin qilayotgan qishloq xoʻjaligi xodimlari har qancha eʼzoz-eʼtirofga sazovordir.

Shuni taʼkidlash joizki, oramizda tumanimiz qishloq xoʻjaligi rivojiga munosib hissa qoʻshgan, bugungi kunda oʻzlarining dehqonchilikdagi tajribalarini yoshlarga oʻrgatib soha sir-asrorlaridan saboq berib kelayotgan nuroniylar talay.

Yangi yil bayrami munosabati bilan tuman Mahalla va oilani qoʻllab-quvvatlash boʻlimida ana shunday tabarruk insonlar uchun bayram tadbiri tashkil etildi.

Tadbir boshlanishidan oldin nuroniylar Mahalla va oilani qoʻllab-quvvatlash boʻlimi huzurida tashkil etilgan “Nuroniylar” maskani, nuroniylar kutubxonasi, maʼnaviyat xonasi va trenajer zali bilan tanishib, bu yerda ular uchun yaratilgan shart-sharoitlar va eʼtibordan mamnun boʻldilar, trenajer zalida oʻrnatilgan sport anjomlarida jismoniy mashqlar bajarib, tanalarini chiniqtirdilar.

Tadbirda tuman hokimining qishloq va suv xoʻjaligi masalalari boʻyicha oʻrinbosari Islom Matkarimov, Mahalla va oilani qoʻllab-quvvatlash boʻlimi boshligʻi oʻrinbosari Bahodir Baltabayev, Fermer, dexqon xoʻjaliklari va tomorqa yer egalari Kengashi raisi Ilhom Polvonovlar nuroniylarni bayram munosabati bilan tabrikladilar.

Amudaryo tumanida istiqomat qiluvchi, qishloq xoʻjaligi sohasiga munosib hissa qoʻshgan 12 nafar nuroniylarga “Nuroniy” jamgʻarmasi Respublika Boshqaruvi raisi, Mahalla va oilani qoʻllab-quvvatlash vaziri oʻrinbosari, Oʻzbekiston Qahramoni, Senat aʼzosi Sodiqjon Turdiyevning bayram tabriknomasi va esdalik sovgʻalari taqdim qilindi. Shundan soʻng, nuroniylar bayram munosabati bilan tashkil qilingan “Diydor shirin” bayram dasturxoniga taklif qilindi va bir piyola choy ustida birgalikda suhbat qurdilar.

Tadbir yakunida nuroniylar oʻzlariga koʻrsatilayotan hurmat va eʼtibordan mamnun boʻlib, tashkilotchilarga raxmat aytdilar va duo qildilar.

Aslida birovning koʻnglini koʻtarish, uning ertagi kunga ishonchini mustahkamlash uchun dunyolar shart emas, ozgina mehr-eʼtibor kifoya. Buni qishloq xoʻjaligi sohasida fidoyi mehnat qilgan nuroniylar uchun tashkillashtirilgan tadbir misolida ham yaqqol koʻrish mumkin edi.

Oygul RAJABOVA.