YoShLAR IShTIROKIDA SAYYoR QABUL OʻTKAZILDI

Mamlakatimizda inson manfaatlari oliy qadriyat darajasiga koʻtarilgan. Bugun barcha davlat idoralari faoliyatida aholining murojaatlari bilan ishlash boʻyicha sifat jihatidan mutlaqo yangi tizim yaratildi.

Joylarda oʻtayotgan sayyor qabullar xalqning dardini eshitish, ularning muammolarini hal etishda, shak-shubhasiz kutilgan natijalarni bermoqda. Shu maʼnoda aytish mumkinki, 8-yanvar kuni Amudaryo tumanining Xitoy ovulida joylashgan 85-sonli umumtaʼlim maktabida oʻtkazilgan yoshlar ishtirokidagi navbatdagi sayyor qabul ham yoshlarning mushkulini oson qilish, ularni qiynayotgan muammolarning yechimini topishda muhim vosita boʻlishi aniq.

Sayyor qabulda tuman Xalq qabulxonasi vakillari, Ichki ishlar organlari xodimlari, mahalla raislari, sektor rahbarlari, Yoshlar ishlari agentligi tuman boʻlimi xodimlari, mahalla yoshlari va tegishli tashkilot masʼullari  ishtirok etishdi.

Bugungi kunda yoshlarning taʼlim olishlari va oʻz qobiliyatlarini roʻyobga chiqarishlari uchun barcha shart-sharoitlar yaratilgan. Galdagi vazifa, ushbu yoshlar bilan birma-bir suhbatlashib ularni kasb-hunarga oʻrgatish, bandligini taʼminlash, biznes tashabbuslarini qoʻllab-quvvatlash, ijtimoiy himoyasini kuchaytirish va muammolarini hal etish borasidagi ishlarni tizimli yoʻlga qoʻyishdir.

Uchrashuv avvalida, Yoshlar ishlari agentligi tuman boʻlimi xodimi Sardor Islomov soʻzga chiqib, bugungi kunda yoshlarga yaratilayotgan keng imkoniyatlar, ayniqsa, Muhtaram Prezidentimiz tomonidan “Yoshlar daftari” tizimi joriy etilganligi bu boradagi ishlarni toʻgʻri tashkil etishda bosh omil boʻlib xizmat qilayotganligini taʼkidlab oʻtdi.

Shundan soʻng, yoshlarning murojaatlari tinglandi. Mahalla yoshlaridan, Xushnud Mambetov ishsizlik masalasi boʻyicha murojaat qilgan boʻlsa, Xosiyat Bobojanova tikuv mashinasi olishda subsidiya ajratilishida amaliy yordam soʻrab murojaat qildi. Ogʻabek Jumaniyazov esa tadbirkorlik qilish istagi borligini bildirib, imtiyozli kredit olishda amaliy yordam soʻradi.

Qabulda har bir muammoga yechim topish choralari koʻrildi va masʼullar biriktirildi. Tegishli idoralar rahbarlarining muayyan topshiriqni bajarishga oid vaʼdalari olindi.

Aytish joizki, oʻtkazilayotgan bunday tadbirlar yoshlarning ijtimoiy-iqtisodiy muammolarni hal etish, orzu-istaklarini roʻyobga chiqarishlariga qulay sharoitlar yaratib berishda muhim omil boʻlib xizmat qilmoqda.

Shundan soʻng, sektor rahbarlari va Amudaryo tumani Ichki ishlar boʻlimi boshligʻi urinbosarlari mayor, Baxtiyor Oʻrazov va mayor Muhtor Raxmatullayev hamda Xalq kabulxonasi Amudaryo tumani bulimi mudiri Erkin Rajabovlar tomonidan 3-sektor hududidagi “Temir daftar”ga kiritilgan “Namuna”, “Kuyuk koʻpir”, “Xitoy” ovullarida  yashovchi 3 nafar fuqarolarga yogʻ, un, tuxum hamda shirinliklardan iborat jami 1,2 mln. soʻmlik oziq-ovqat mahsulotlari etkazib berildi.  

Bugungi kunda Amudaryo tumani boʻylab “Yoshlar daftari”, “Temir daftar” va “Ayollar daftari” ga kiritilgan fuqarolarni qoʻllab-quvvatlash, ularga moddiy, psixologik, ijtimoiy yordam koʻrsatish borasida koʻplab chora-tadbirlar amalga oshirilmoqda. Xususan, ishsiz fuqarolarning bandligi taʼminlanib, ishga joylashtirilmoqda. Tadbirkorlik qilish istagidagi fuqarolarga kredit olishlarida amaliy yordam berilmoqda, uy-joy bilan bogʻliq masalalarda murojaat qilgan fuqarolarning muammolari ham imkon qadar bartaraf qilinayotir.

 Fuqarolarning murojaatlarini tinglash, ularga amaliy yechim topishda hududlar boʻylab oʻtkazilayotgan bu kabi sayyor qabullarning ahamiyati katta. 

F.Eshimbetova.