RESPUBLIKA MAʼNAVIYaT VA MAʼRIFAT MARKAZI AMUDARYo TUMAN BOʻLINMASI FAOLIYaTIGA BIR NAZAR

Shiddat bilan rivojlanayotgan dunyoda fuqarolarni milliy urf-odat va anʼanalarga sodiq inson sifatida tarbiyalash, manʼaviyatini yuksaltirish, ajdodlarga hurmat, avlodlarga ibrat ruhida tarbiyalash bugungi kunning dolzarb vazifasidir. Albatta, bu borada Respublika Maʼnaviyat va maʼrifat markazining oʻrni alohida ahamiyatga ega ekanligini eslab oʻtish joizdir.

Maʼlumot uchun, 2017-yilda Prezident qarori bilan Maʼnaviyat targʻibot markazi hamda Milliy gʻoya va mafkura ilmiy-amaliy markazini birlashtirish yoʻli bilan Respublika Maʼnaviyat va maʼrifat markazi qayta tashkil etilgan edi. Markazning maqsadi, ezgulik va insonparvarlik tamoyiliga asoslangan “Milliy tiklanishdan – milliy yuksalish sari” gʻoyasini keng targʻib etish orqali jamiyatda sogʻlom dunyoqarash va bunyodkorlikni umummilliy harakatga aylantirishdir.

Respublika Maʼnaviyat va maʼrifat markazi Amudaryo tuman boʻlinmasi ham ushbu gʻoya asosida tumanimiz fuqarolariga turli tadbirlar, uchrashuvlar, koʻrik-tanlovlar orqali maʼrifat ulashmoqda. Bunda asosan yoshlar keng qamrovga olinib, ularning turli vayronkor gʻoyalarga ergashib ketmasligining oldi olinmoqda.

2021-yil davomida markaz tomonidan 200 dan ortiq turli tadbirlar koʻrik-tanlovlar oʻtkazilgan. Ushbu tadbirlar kitobxonlik maʼdaniyatini oshirish, diniy ekstremizmga qarshi kurashish, millatlar totuvligi, yoshlar tarbiyasi va boshqa turli mavzularda tashkil etildi.

Maʼnaviy va marifiy ishlarni tashkil etishda umumtaʼlim maktablarda faoliyat yuritayotgan targʻibotchilar va Yoshlar ittifoqi yetakchilarining mehnati diqqatga sazovor ekanligini eslab oʻtish joizdir. Markaz tomonidan ularni ragʻbatlantirish, qoʻllab-quvvatlash, boʻyicha koʻplab ishlar amalga oshirilmoqda. Shu bilan birga, targʻibotchilar oʻrtasida turli bellashuvlar tashkil qilinib, bilim va koʻnikmalari oshirilayotir. 2021-yil davomida mana shunday tadbirlardan bir nechtasi boʻlib oʻtdi.

 Xususan, 38-sonli umumtaʼlim maktabda boʻlib oʻtgan “Eng namunali targʻibotchi” tanlovida tumanimizdagi barcha maktab targʻibotchilari qatnashdilar. 40-sonli maktab targʻibotchisi, Umida Karimova faxrli 1-oʻrinni olishga muvaffaq boʻlib, Respublika bosqichiga yoʻllanmani qoʻlga kiritdi. Bu kabi tanlovlarda ishtiroq etgan targʻibotchilar tajriba almashishdan tashqari, bilim va koʻnikmalarini yanada mustahkamlab borishadi.

Maʼnaviyat va maʼrifat markazi tuman boʻlinmasi isteʼdodli yoshlarni aniqlash, ularga qulay imkoniyat va shart-sharoitlar yaratish borasida Yoshlar ishlari agentligi tuman boʻlimi bilan doimiy ravishda hamkorlik qiladi. Turli koʻrik-tanlovlar orqali yoshlar koʻplab yutuqlarga erishmoqda. “Vatan taraqqiyotiga mening hissam” tanlovining tasviriy va amaliy sanʼat yoʻnalishi, adabiyot va publitsistika, milliy maqom va milliy estrada yoʻnalishlari boʻyicha bir guruh iqdidorli yoshlar aniqlanib ragʻbatlantirildi.

Yoshlar – bizning kelajagimizdir. Ularning turli yot gʻoyalarga ergashib ketmasli, vatanimizga munosib farzand boʻlib voyaga yetishlarida markaz tomonidan amalga oshirilayotgan saʼy-harakatlar alohida eʼtirofga loyiqdir.

Mamlakatimizda amalga oshirilayotgan ijtimoiy-iqtisodiy islohotlar, qabul qilinayotgan qonun hujjatlari, davlat dasturlarining mazmun va mohiyatini aholining keng qatlamlariga yetkazishga qaratilgan targʻibot ishlarini tizimli va izchil amalga oshirish, jamiyatimizning barqaror rivojlanishiga toʻsqinlik qilayotgan ichki tahdidlar — el-yurt taqdiriga loqaydlik, mahalliychilik, urugʻ-aymoqchilik, oilaviy qadriyatlar va yoshlar tarbiyasiga eʼtiborsizlik kabi holatlarga barham berishga qaratilgan kompleks tadbirlar amalga oshirishda jonbozlik koʻrsatayotgan Respublika Maʼnaviyat va maʼrifat markazi Amudaryo tuman boʻlinmasi xodimlarining kelgusidagi faoliyatiga rivoj tilaymiz.

F.Eshimbetova