QUM YoP MAHALLASI OBOD GOʻShAGA AYLANADI

Prezidentimizning bevosita tashabbusi va saʼy-harakatlari bilan hududlarning iqtisodiy-ijtimoiy infratuzilmasi rivojlanib, shahar va qishloqlarimiz zamonaviy qiyofa kasb etmoqda. Yurtimizning eng chekka hududlari ham oxirgi yillarda koʻrkamlashib, aholi uchun barcha zarur sharoitlarga ega fayzli va obod maskanlarga aylanib bormoqda.

Amudaryo tumanida ham chekka hududlardagi ovul va mahallalarda aholi turmush tarzini yaxshilashga alohida eʼtibor qaratilmoqda. Shu kunlarda Oʻzbekiston Respublikasi Prezidentining 2022-yil 15-yanvardagi mahallabay ishlash va kambagʻallikni qisqartirish hamda aholi bandligini taʼminlash boʻyicha 2022-yilda amalga oshiriladigan ustuvor vazifalarga bagʻishlangan kengaytirilgan videoselektor yigʻilishida belgilangan vazifalar ijrosini taʼminlash maqsadida amaliy ishlar boshlab yuborildi.

Mazkur yilda bu boradagi ezgu ishlarni tumanning olis hududi boʻlmish Qum yop mahallasida amalga oshirish rejaga kiritilgan.

28-yanvar kuni tuman hokimi Sultonboy Yoʻldashev obodonlashtirish ishlari bilan yaqindan tanishish maqsadida mahalla hududida boʻldi.

Tumandagi ijtimoiy muhiti qoniqarsiz deb topilgan Qum yop mahallasi hududida Qum yop, Qaragʻay, Jumabay sagʻa, Boʻz yop aholi punktlari mavjud. Aholi soni esa 4 ming 655 nafarni tashkil qilib, 710 ta xonadonlarda yashashadi. Shundan 2 ta oila “Temir daftar”da, 143 nafar yoshlar “Yoshlar daftari roʻyxatida turadi.

Aholining turmush darajasini yaxshilash, farovon hayot kechirishlariga imkoniyat yaratish maqsadida hududdagi 9 kilometr uzunlikdagi ichki yoʻllarga tosh-shagʻal yotqizish, 2 ta ichimlik suvi inshootini qurish kabilar koʻzda tutilgan. Shuningdek, 3 ta transformator, 8,7 kilometr uzunlikdagi elektr liniyalarini taʼmirlash, 55 ta yangi tayanch ustunlarini oʻrnatish rejalashtirilgan.

Shu kuni ertalab yuk avtomobillarida Jumurtov shaharchasidagi tosh maydalash va saralash zavodlaridan tosh ortib kelinib, mahalla hududidagi koʻchalarga tosh toʻshash ishlari boshlandi.

Rejaga koʻra, hududdagi irrigatsiya tarmoqlari, yaʼni ariq va zovurlar tozalanadi. Koʻchalar obodonlashtiriladi hamda mevali, manzarali daraxtlarga shakl berilib, yangidan koʻchatlar oʻtqaziladi. Aholi xonadonlari fasadi va kirish yoʻlaklari, qoʻshimcha yordamchi xoʻjalik binolari va daraxtlarni oqlash ishlari ham amalga oshiriladi.

Ayni kunlarda hududda boshlab yuborilgan ushbu ezgu ishlar aholiga nihoyatda koʻtarinki ruh baxsh etmoqda. Chunki bu qumyopliklar uchun ayni muddao, koʻpdan kutilgan, koʻngildagi ish boʻlmoqda. Mahalla fuqarolari ham tozalik va obodonchilik ishlariga bosh qoʻshib, imkon boricha hissa qoʻshishmoqda. Ularning fidoyiligi hudud chiroyiga chiroy qoʻshilishiga zamin yaratmoqda.

Hududlarning yoʻl-transport infratuzilmasini takomillashtirish, muhandislik-kommunikatsiya tarmoqlari hamda ijtimoiy soha obʼektlarini yanada yaxshilash va shu asosda aholi farovonligi hamda turmush darajasini oshirishga qaratilgan mazkur amaliy qadamlar natijasida bugun tumanimizdagi koʻplab mahalla, koʻcha va aholi xonadonlari butunlay yangi qiyofa va chiroy kasb etmoqda. Shuni ham aytib oʻtish joizki, tumanda bugungi kunda barcha mahallalar obod goʻshalarga, koʻrkam maskanga aylanib, obod, fayzli xonadon va koʻchalar soni ortib bormoqda. Bu xalqimizning oʻz hayotiga boʻlgan ishonchi yuksalib, yashashga, kelajakka boʻlgan intilishi kuchayayotganidan darak beradi. Zero, obodlik bor joyda, fayzu-baraka, rivojlanish boʻladi.

O.Xudoyberganova