Yoshlar ishtirokida uchrashuvlar, mahorat darslari va sport musobaqalari boʻlib oʻtdi

Prezidentimiz tomonidan ilgari surilgan 5 ta muhim tashabbus doirasida tumanimiz boʻylab koʻplab tadbirlar amalga oshirilmoqda.

Xususan, 2-fevral kuni Amudaryo tumani boʻylab yoshlarning boʻsh vaqtini mazmunli oʻtkazish maqsadida tuman hokimligi, Yoshlar ishlari agentligi tuman boʻlimi, turizm va sportni rivojlantirish boʻlimi bilan hamkorlikda turli sport musobaqalari, mahorat darslari boʻlib oʻtdi.

Kun davomida oʻtkazilgan mazkur tadbir va musobaqalarda tuman yoshlarining 500 dan ortigʻi qamrab olindi.

Kun davomida Yangiobod mahallasi hududidagi 40-sonli maktabda “Zakovat” intellektual oʻyini oʻtkazildi. Intellektual oʻyinda jami 8 ta mahalla yoshlaridan iborat jamoa qatnashib, oʻz mahallasi shaʼnini himoya qilishdi. Yakuniy natijalarga koʻra Tosh-yop ovuli yoshlari 1-oʻrinni, Oʻrta-qalʼa ovuli yoshlari 2-oʻrinni, Bosuv mahallasi yoshlari 3-oʻrinni egallashdi.

Shuningdek, Yangiobod mahallasi hududidagi raqamli texnologiyalar markazida Prezidentimiz tomonidan ilgari surilgan “Besh tashabbus” ning 3-yoʻnalishi − aholi va yoshlar oʻrtasida kompyuter texnologiyalari va internetdan samarali foydalanish, IT va robototexnika boʻyicha “Mahorat darsi” oʻtkazildi. Yoshlarga raqamli texnologiyalar markazi taʼlim boʻyicha mutaxassisi Abdullo Hayitboyev tomonidan hozirgi zamonaviy axborot texnologiyalaridan toʻgʻri foydalanish, dasturlash, frilanserlik boʻyicha maʼlumotlar berib oʻtildi.

Bundan tashqari, Boyovul mahallasi hududidagi 16-sonli maktabda sportning stol tennisi va shaxmat turlari boʻyicha “Yoshlar kubogi” musobaqasi tashkil etilib, gʻoliblar munosib taqdirlandi.

Musobaqaga tumanimizning 16 ta mahalla va ovullarida istiqomat qiluvchi stol tennisi va shaxmatga qiziquvchi 18 yoshdan 30 yoshgacha  boʻlgan  uyushmagan yoshlar qatnashishdi.

Murosasiz kechgan bellashuvlar yakuniga koʻra shaxmat boʻyicha 1-oʻrinni Begzod Boltabayev qoʻlga kiritdi. Stol tennisi boʻyicha esa mutlaq  gʻoliblik Diyordek Shomuradovga nasib qildi.

Shuningdek, tuman Madaniyat markazida yoshlar uchun tadbirkorlik sohasida “Mahorat darsi” oʻtkazildi.

Mahorat darsida tuman ishbilarmonlari, oʻz biznesini yoʻlga qoʻygan yoshlar oʻz tengdoshlariga biznesga qanday kirib kelganliklarini, tadbirkorlikni yoʻlga qoʻyguncha qanday muammolarga uchrab, ularni qanday yengib oʻtgani haqida gapirib berdilar. Qolaversa, tumanimizdagi 40-sonli maktab direktori, Joʻqorgʻi Kenges deputati, Qoraqalpogʻiston Respublikasi Xalq oʻqituvchisi unvoni sohibasi Sanobar Xoʻjamuratova ham yoshlarga oʻz tavsiyalarini berdi. Tumanimizda oʻz tadbirkorlik faoliyatini namunali tarzda yoʻlga qoʻygan Tamara Yusupova ham biznesda muvoffaqiyatga erishish sirlari haqida yoshlarga oʻz tavsiflarini berdi.

Kunning ikkinchi yarmida Choykoʻl ovuli hududidagi 22-sonli maktabda sportning voleybol turi boʻyicha musobaqa boʻlib oʻtdi. Musobaqada Bobur nomli ovul yoshlari faxrli 1-oʻrinni, Oq oltin ovuli jamoasi 2-oʻrinni egallashgan boʻlsa, Toʻlqin ovuli yoshlaridan iborat jamoa 3-oʻringa munosib deb topildi.

Shuningdek, Olmazor mahallasi xududida joylashgan futbol maydonida sportning mini futbol turi boʻyicha oʻtkazilgan musobaqada ham koʻplab yoshlar ishtirok etishdi. Musobaqa shiddatli va murosasiz kechib, 1-oʻrin Chordara mahallasi yoshlariga nasib etdi.

Kun davomida oʻtkazilgan tadbirlar va uchrashuvlar yoshlarning boʻsh vaqtlarini mazmunli oʻtkazish, ularni tadbirkorlik bilan shugʻullanishga, sportga oshno boʻlib, sogʻlom turmush kechirishga hamda zamonaviy bilim va koʻnikmalarni, kasblarni egallab, Vatan taraqqiyotiga munosib hissa qoʻshishga chorlagani bilan ahamiyatli boʻldi.

Tuman hokimligining axborot xizmati