56-sonli maktabda davra suhbati oʻtkazildi

Tumanimizda faoliyat yuritayotgan “Jayxun ilhomlari” nodavlat notijorat tashkiloti tomonidan eʼlon qilingan “Yoshlar – yangi Oʻzbekiston bunyodkorlari” loyihasining kalendar rejasi boʻyicha joylarda adabiy-badiiy uchrashuvlar, davra suhbatlari oʻtkazilib kelinmoqda. Ovul va mahallalar fuqarolar yigʻinlarida, maktablarda va boshqa jamoat joylarida oʻtkazilayotgan uchrashuvlarda yoshlarning maʼnaviyatini yuksaltirishga oid masalalar muhokama qilinmoqda.

Ayniqsa “Oilada farzand tarbiyasining ahamiyati, yoshlarni zararli illatlar va turli illatlardan himoya qilishda ota-onalar va mahallaning oʻrni”, “Yoshlarning maʼnaviyatini yuksaltirish, shu orqali ularni giyohvandlik, axloqsizlik va zararli taʼsirlardan himoya qilish”, “Yoshlar oʻrtasida sogʻlom turmush tarzi koʻnikmalarini keng targʻib qilish” mavzularidagi suhbatlar barchada birdek qiziqish uygʻotmoqda.

Bu davra suhbatlarida mahalla faollari, imomlar, maʼnaviyat targʻibotchilari, shifokorlar, ijodkorlarning ishtirok etishi olib borilayotgan tushuntirish ishlarining yanada samarali boʻlishiga salmoqli hissa qoʻshib kelmoqda.

Tashkilot tomonidan navbatdagi davra suhbati Mangʻit shahridagi Durunki mahalla fuqarolar yigʻinida oʻtkazildi.

“Oilada farzand tarbiyasining ahamiyati, yoshlarni zararli illatlar va turli axloqsizliklardan himoya qilishda ota-onalar va mahallaning oʻrni” mavzusida oʻtkazilgan davra suhbatida mahalla faollari, imomlar, maʼnaviyat targʻibotchilari, 56-sonli umumtaʼlim maktabining oʻqituvchilari ishtirok etdilar.

Davra suhbatini Durunki mahalla fuqarolar yigʻini raisi Shuhrat Jumaniyozov kirish soʻzi bilan ochdi hamda mahalla hududida yoshlar tarbiyasiga oid olib borilayotgan ishlar, yoshlar orasida bandligini taʼminlash, ularga har tomonlama moddiy va maʼnaviy yordamlar koʻrsatilayotgani haqida batafsil toʻxtalib oʻtdi.

“Jayxun ilhomlari” nodavlat notijorat tashkiloti raisi Oʻrozali Reyimov oʻz soʻzida tashkilot tomonidan eʼlon qilingan grant loyihasining mazmun-mohiyati va ahamiyati, loyiha doirasida amalga oshiriladigan ishlar va ulardan kutilayotgan natijalar haqida soʻz yuritdi. Loyihaning asosiy vazifasi yoshlar maʼnaviyatini yuksaltirish, tumanimizdagi ijodkor yoshlarga keng imkoniyatlar yoʻlini ochib berish uchun tumanimizda barcha sharoitlar mavjud. Tumanda “Taraqqiyot koʻzgusi” va “Mening oilam” gazetalari, amunews.uz veb-sayti hamda Amudaryo televideniyesi muntazam ravishda ijodkor yoshlarni elga tanitib kelmoqda. Bundan tashqari “Taraqqiyot koʻzgusi” gazetasi qoshidagi nashriyotda ikki yildan buyon tumanimiz ijodkorlarining kitoblari chop etilmoqda.

Faxriy jurnalist Allambergan Jumaniyozov ham oʻz soʻzida yosh ijodkorlarga yaratilayotgan keng imkoniyatlar haqida gapirib oʻtdi.

Durunki mahalla fuqarolar yigʻini profilaktika inspektori Jaqsiliq Ataniyazov mahallada osoyishtaligini saqlash, yoshlar orasida huquqbuzarliklarning oldini olish boʻyicha olib borilayotgan ishlar haqida gapirib, barchani osoyishtalikni saqlashda faol boʻlishga chaqirdi.

Mahalla hududida yaqinda ish boshlagan hokim yordamchisi Sarvarbek Komiljonov yoshlarning iqtisodiy ahvolini yaxshilash borasidagi ish rejalari bilan barchani tanishtirdi. Yigʻilganlar oʻzilarini qiziqtirgan savollarga tegishli javoblar oldilar.

Oʻrozali Reimov